تطبيقي للخبز العربي للاخت سمراء الدنيا

[جوهرة الغرب.]

السلام عليكم
اخواتي راني جربت وصفة الخبز العربي ولكن مانجحتليش ...من جربتها ونتفخلها كيما ورتلنا الاخت سمراء الدنيا
ارجو الرد
عاودتلو زوج مرات وطيبتو في المقلة وفي الطاجين والنتيجة 0

[جوهرة الغرب.]

مانيش مصدقة عينيا اكثر من 400 مشاهدة ولا رد ؟؟؟؟؟؟؟؟؟؟؟؟؟؟؟؟؟؟؟ظ
لماذا؟؟؟؟؟؟؟؟؟؟؟؟؟؟؟؟؟؟؟؟
اذا انعدمت المساعدة فهذا يعني انه لا فائدة من هذا المنتدى؟؟؟

[scorpionoir]

بالشوي بالشوي علينا برك .يا ختي .
400 مشاهدة ماهوش معناها شهدناك وبخلانك .ممكن هاذ 400 كلهم زوار للمنتدى ماهومش اعضاء .والزوار ما يقدروش يردو عليك .هنا الاعضاء كي يشوفو تساؤل يجاوبو حتى مايعرفوش يقولو الله غالب .راني نحكي وعلابالي بيهم خاصة اصحاب الكوزينة .
المهم انا جربتو وصلحلي .شوفي نتي الموضوع هذا بلاك يفيدك
https://www.djelfa.info/vb/showthread.php?t=1224807

[oum radja]

صباح النور اختي
انا درت هاذ الخبز عشرات المرات و ينجحلي الحمد لله
القرصة تاعك رققيها مليح و خليهم يريحو 10دقايق
وكي تسخني المقلاة تاعك ارمي القرصة واقلبيها بسرعة قبل ما دير هاذوك الفقاعات و اقعدي تحركي فيها يعني دوريها ورايحة تتنفخ اكيدوكي تحمار من تحت عاودي اقلبيها
غير جربي بهاذ النصائح و ان شاء الله تنجحي

[إلهام07]

أولا : نحب نقولك ليك وللاخوات اللي يقولو 200 مشاهدة ولا رد ؟ نعم ممكن المشاهدات تكون من زوار المنتدى وليس الأعضاء وثانيا ممكن كل من زار الموضوع ماجربش الوصفة كيفاش حبيتيه يجاوبك ؟

ثانيا : نقولك متتقلقيش راهو الخبز العربي عندو شوييييييييية أسرار كي تعرفيهم تلقايه من أسهل مايكون :
- أعجني الخبز مليح
- العجينة تكون شوية جارية ماشي يابسة باش ينتفخ
- خمريه مليح
- ماترققيهش بزاف كي تقرصيه
- خليه يخمر شوية قبل ما طيبيه ماشي طول للمقلاة أو الفرن خاصة ضرك راهو البرد خليه يخمر أكثر من 10د قبل الطياب
- ننصحك طيبيه في الفرن أضمن من المقلاة لانو على حساب نوعية المقلاة ممكن ماينجحش بصح في الفرن اضمن لانو الحرارة من كل جهة
- هذي الطريقة نتاع الطياب تبعيني واش نقول بإذن الله ينتفخ بالسيف عيله :
1- شعلي الفرن نتاعك يسخن ( شعليه من تحت ) وحطي صينية نتاعك لداخل في الفرن تسخن ( في الرف السفلي خلاص )
2- كي يسخن الفرن طفي النار من تحت وشعليها من فوق ( نعم من فوق ) وابداي لوحي بالوحدة في هذيك الصينية
أما إذا عندك فرن يشعل من تحت ومن فوق في نفس الوقت راكي هايلة شعليه من تحت وفوق في نفس الوقت وكي يسخن أبداي لوحي بالقرصة وطيبي من تحت وفوق في نفس الوقت
3- في أقل من 5د رايحة تنتفخ القرصة نتاعك عسيها راهي تحمار ثمثم وقلبيها تتحمر مليح على الجهتين اما إذا الفرن نتاعك يشعل من تحت ومن فوق ماتقلبيهاش رايحة تتحمر على الجهتين
- منين تنحيها من الفرن غطيه باش يبقى طري

* ملاحظة : الصينية ديما تبقى لتحت .

أعتقد الشرح راهو واضح صدقيني هذي أضمن طريقة باش ينتفخ الخبز العربي على ضمانتي

[جوهرة الغرب.]

شكرا لكن اخواتي والله نتقلق كي نشوف مشاهدات بزاف والردود مكانش الله غالب معندناش بيت واسرة اخرى من منتدى الجلفة ربي يحفظهولنا ويحفظ كل اللي قايمين بيه وكل الاعضاء والعضوات ...
شكرا على النصائح رايحة نعاود نجربو وان شاء الله ننجح فيه ونحط صورو
تحياتي

[ام نهوله]

الهام فعلا متالقه شرح رائع