السلام عليكم و رحمة الله و بركاته
و الله العظيم يا أختي م الصباح و انا نكتب مع الأخير راحتلي الصفحة راح كلش هههه
بالنسبة للغلاصاج كاين 3 أنواع :
الطريقة الأولى : هو تاع فنجان كاكاو بني و فنجان حليب و فنجان سكر ( و فنجان و نص أو فنجانين إذا استعملتي كاكاو أسود ) و كاس زيت
و هذا مليح بزااف و طعمه بنين و ما ينشفش يقعد سائل
الطريقة الثانية: هو أنك تذوبي شوكولا عادي و تزيديلها شوية ماء و تحركي جيدا ,, الشوكولا في العادة مين تزيديلها الماء تحسيها فسدت و ما راهاش تلمع و لكن فقط اخلطي مليح ترجع ملساء
الطريقة هذي مليحة بزاف لكنه ينشف شوية مقارنة بالأول ,, ما عدا مرة نتذكر استعملت شوكولا MAXON قعدت سائلة نوعا ما
الطريقة الثالثة : تحتاجي الشوكولا الخاصة بالغلاصاج و ديري لكل 200 غرام شوكولا ملعقة كبيرة سكر ناعم و علبة yaourt nature (أو 25 مل crème fraiche على حسب لي عندك ) و تذوبيهم في حمام مائي
هذا لامع الطعم تاعه بنين بزاااف و لكنه ينشف شووووويييييية شوييييية
و كاين نوع آخر يستعملوا فيه الحليب المحلى المركز مرانيش متذكرة نسب المقادير حتى نتأكدلك منهم
فيما يخص الجينواز من الأحسن ديريها نهار قبل أو ديريها الصباح و تخلي ال montage تاع الكيكة في المساء
خليها تبرد شوية و غلفيها بالورق الغذائي الشفاف أو غطيها مليح بطرشونة و دخليها الثلاجة ( يمكن تلصق الجينواز عند نزع الورق الشفاف أو تلصقلك شوية ف ال moule أو الطبق لكن عادي فقط حاولي تكوني ظريفة معاها )
الآن لما تجي تشربيها ب sirop ننصحك تستعملي ال pinceau افضل من استعمال الملعقة و أيضا إذا كانت أختك تحب نكهة عصير معينة يمكن تشربي الجينواز بالعصير هذاك تجي مليحة أيضا
و كذلك لما تقسمي الجينواز تاعك باش تشكلي الطبقات خلي الطبقات لي ما تفتتوش و ما تكسروش للأعلى لأنو طبقات الوسط عادي تكون مقسمة أو مشي مثالية و لكن من الأحسن ما ديريش جينواز طالعة ديري وحدة مستوية ( هابطة ) باش تنزعي على نفسك عناء تقسيمها لطبقات يعني مباشرة تعمليها مستطيل رقيق و تقطعيها على أربعة أو تعملي مستطيل و تقسمي منه دوائر ب emporte pièces
شيء أخر بين الطبقات يمكن تحطي فوق الشانتيي قطع فواكه أو حبيبات شوكولا أو مكسرات أو جوز الهند حسب لي عندك
بعدها لما تغطي الجينواز تاعك كاملة بالشانتيي دخليها للمجمد أحسن من الثلاجة و خليها على الأقل ساعتين
لازم تجمد الشانتيي مليح يعني لما تلمسيها ما تلصقلكش الكريمة في أصابعك
بعدما تجمد فرغي فوقها الغلاصاج من الأحسن ما توزعيهش على السطح بالملعقة أووو باش يجيك السطح مستوي و لامع
مين تفرغيه حاولي تميلي الطبق و تحركيه حتى تغطيلك الشوكولا كامل السطح
ممبعد ف التزيين لك الإختيار إذا بقاتلك الشانتيي يمكن تعمليها وردات
أو تقطعي الفواكه بطرق مختلفة و ديريلهم la gelée أو عصير الليمون باش ما تتأكسدش الفاكهة
فكرة أخرى ف التزيين يمكن تذوبي القليل من الشوكولا و ترسمي بيها وردات أو شبكة أووو الشكل لي تبغي على ورق الزبدة و تخليها تجمد و تزيني بيها
أما بالنسبة لوصفة الجينواز القاعدة هي
لكل حبة بيض تحطي 30 غ فرينة و30 غرام سكر و ضاعفي الكمية
كيكة متوسطة تجيك 5 / 6 بيضات
و كاين طريقتين إذا تحبي نحطهملك أيضا
أعلم أنني أكثرت الكلام ههه
لكن قتلك على كل الاخطاء لي تعلمت منهم و كل الملاحظات
دمت في حفظ المولى و رعايته â¤