Tartelettes الوردة

fatimazahra09 · 2014-06-14, 18:16

السلام عليكم ..... ومن الورد ماناش خارجين ......ههههه...... ربي يدومها .

عندي وصفة جميلة لحلوة سميتها تارتولات الوردة ....ساهلة وغير مكلفة نوعا ما ....تحب الاتقان برك مع شوية صبر مارايحينش تندمو عليها ... جيكم معسلة وطرية ودوقها رائع .....و اول وهلة كي تشوفوها تطنو انها مزينة برقـــــائق اللوز.....
مقاديرها :
عجينة التارتولات :
ديري 250 غ زبدة طرية تظربيها بالخلاط الكهربائي مليح مع 125 غ سكر ناعم حتى تولي قريب بيضاء اللون عاد ضيفيلها 3 صفار بيض ( البياض خبيه في كيس بلاستيكي ديريه في الكونجيلاتور و مركي بالفوتر عليه رقم 3 هاكدا كي تبغي ديري مرانغ وحدهم للاطفال ماعليك غير تجبديهم من قبل وديري لكل 1 بيض 1 م سكر عادي كبيرة و ضربي بالخلاط وزيدي 1 م ك مايزينا و الملون بودرة من الاحسن لا درتيه ديريه في الاول مع البيض قبل مع يطلع اما السائل تقدري ديريه في المرحلة الاخيرة كي يطلع طبعا مع الدوق لي تبغيه وعمريها في لابوش ادوي وعملي خطوط طوال على ورق الزبدة و لا وريدات ودخليهم يطيبو في فرن متوسط كي تشوفيهم حمارو من تحت نحيهم و خليهم يبردو ... مالازمش يتلونو من فوق و خليهم يبردو و رايحين ينشفو....و ييبس السطح نتاعهم و اكيد ولادكم رايحين يموتو عليهم .هههههه..... هانا خرجنا كامل من الموضوع ..لكن ماعليش ماتسالوني والو لا بياض بيضة لا زوج ...ههههههه)
بالوحدة ترمي في الخليط حتى تشوفيها ماكانش تزيدي الثانية ثم الثالثة ... وتزيديلها 1 م ص فاني نتاع الميزان... باش تبقى ريحتها خليها في الاخير و حبسي هنا بالخلاط وارواحي شمري على دريعتيك العزاز وابداي مع الفرينة غيـــــــر بالشوية وماتنسايش قرصة .... قرصة برك نتاع خميرة الحلوى ... ماشي باش تخمر وتنتفخ العجينة لكن باش جيك خفيفة وماشي مدكوكة و كملي بالفرينة حتى تحسيها عجينة قابلة للتشكيل ... ديريها في كيس بلاستيكي و بداي شكلي كرات بحجم لمول نتاع التارتولات لي عندك ومن الاحسن يكونومتوسطين و مدورين يجوك يهبلو كيما هادا لي في الصورة القطر نتاعه 4 سم و العرض 2 سم .... المهم ارفدي بيدك مباشرة من الكيس شوية بحجم حبة المشمش او اقل وشكلي كرات و ابسطيهم في لي مول مباشرة و اقرصيهم في الاسفل باش مايهبطوش في الطياب ... وماتخافيش ... مايبقاوش لي سيكاتريس من بعد ....هههههه
تحضير الحشو :
و تكوني من قبل وجدتي حشو... خلطي فيه زوج عبار نتاع الكوكاو مقلي اصفر برك مقدار 500غ مع عبر نتاع نواة كوكو 250غ....اطحنيهم مع بعض رايح ليدام نتاع نواة كوكو يتلق في الكوكاو ويجيك حشو طري وخفيف و يجي يبان كيما اللوز خاصة لا زتيلو معطرو ملون اللوز مارايحاش تفرا .....ههههه .....و بالطبع ديري الفاني 1 م ص و معطر وملون اللوز لي في الصورة هادا خرج جديد و كاين شحال من عطر ولون فيه ... هادا هايل ديري 1 م ص منو فقط .
و زيديلهم 1 عبر سكر قل اصبع و خلطي مليح بيدك وضيفي البيض بالوحدة ... ديري 1 بيضة كاملة و1صفار ... وشوفي لاكان تلمت ماتزيديش ... ولا خاصها لاكان دوبليتي المقادير زيدي 1 بيضة كاملة ...بالشوية لا يجرالك الحشو
تتفلطحلك الحبة ويخسر الديكور من فوق .....لازم يجي الحشو شاد روحو وماشي يابس وماشي يسيل ....
هادي العقدة تصلح حتى لحلوة الدزيريات لي موحال تخدميها بكاوكاو وحدو صاريلها كي مقروط اللوز المسكر ... لانها رايحا جيك يابسة .... ديري نفس طريقة الحشو و لابات نتاع الدزيريات ديري هادي عجينة الديكور هي نفسها .....ننصحك برك خليهم يرتاحو قبل ما طيبيهم ..و التعسال كيف كيف ... وانشاء الله نديرلها موضوع وحدو و نوريلكم طريقة تزيين مختلفة ... انشاء الله ...المهم نرجعو نكملو.... شكلي كريات بحجم حبة الجوز و حطي فوق كل عجينة حليتيها في المول نتاع التارتولات كرة وحدة و اضغطي شوية قيس ما تابلاتيها برك .....

عجينة الديكور :
ديري عجينة بـ 300 غ فرينة و حطي في وسطها 75 غ زبدة دايبة و شوية فاني وحكي مليح بيدك ولميها بماء الزهر حتى تولي عجينة متماسكة ....ديريها في كيس تريح 5 د .
وحليها في ماشينة البقلاوة رقم 6 قطعي دوائر صغار بأي حاجة تقطعلك ولا ماكانش تقدري تستعملي بوشون قارورة المسك .......( الله يطيب روايحنا بريحوانشاء الله)
و ارفدي كل دائرة و حطي السكين مقلوب في وسطها تماما بحيث تثنيها على زوج بلا ما تقطعيها وتحطيها مباشرة في حاشية الحبة و انتي حاملة دايما السكين بشكل مائل وكملي واحدة امام اختها و حاولي كي تحطيهم دخليهم شوية بالسكين وفتحي الثنية و كي تكملي عاودي شوفي مليح وافتحي باقي الدوائر لي تغلقو.
هنا في هادي المرحلة لاكان نشفلك سطح الحشو حطي صباعك في بياض البيض ومشي على كامل السطح و لااستعملتي البانسو ما ترفديش بالحفاني .......حق ما يلصقو الوريدات برك و اقسمي حبة كرز حمراء او خضراء وننصحك لا درتي كمية كبيرة من هادي الحلوة خلطي الاتنين .......قلت اقسميها على اثنين و حطيها في الوسط و اظغطي عليها شوية ..

خليهم يريحو على الاقل 7 ساعات و من الافضل اخدمي حلوتك في الحشية و خليها تبات باش يبقى الشكل نتاعها على حالو .. وفي الصباح دخليهم يطيبو 180درجة في فرن محمى مسبقا ....حتى تشوفي لابات نتاع التارتولات خدات لون دهبي فاتح والوريدات كدالك يكون لونهم دهبي قليلا من فوق نحيهم مالازمش يحمارو ...
خرجيهم تكوني موجدة من قبل العسل نتاعك : ديريه بشاربات : حطي فيها كيلة سكر وكيلة و نصف ماء على ناراحسبيلهم من بداية الغليان 10د او ملي تحطيهم فوق النار 15 د كي طيب طفي عليها و ديري كيلة منها ضيفيلـــــــــها 1 م ص عطرماء الزهر مع كيلة عسل نات مافيه والو...خلطيهم مليح ... وعسلي الحلوة نتاعك مباشرة و من الاحسن غير يخرجو ويبردو 5 د ابداي نحي وعسلي( ويكون خليط العسل والشاربات بارد طبعا ) وحطي في كسكاس يقطرو ....
ديريهم في لي كيسات نتاع الدونتال وزيديلهم لــكيسات على حساب دوقك انا نستعمل بزاف البيض ......نحب نخدم بيهم لان كل نوع نتاع حلوة ديريها فيها تبان بشكل رائع ... راهم كاين نتاع المادلان يجو كبار ...خاطي هوما ...هادو صغار عليهم ....المهم دري شوية باييت اليمونتار فضية او دهبية فوق نصف حبة الكرز المجففة .......ويبقى دايما الاختيار ليك ..وكيما يقولو
....المهم تكون عجبكم الوصفة انشاء اللهLes gouts et les couleurs ne ce discute pas
...... و بصحتكم و انشاء الله تستغلو هادي الانواع لقدمتها مأخرا في حفلات نجاح ولادكم انشاء الله واعراسكم وختاينكم و اعيادكم وكامل افراحكم ....يا رب دومها فرحة .......انشاء الله.........وكلشي مبروك ...
ماتنساونيش في دعوة نتاع خير من القللللللللللللللللللللب عندي تسوا الدنيا وما فيها .........سلامي الحار.

sissou nrdn · 2014-06-14, 18:25

يعطيك الصحة جاك هايل شهيتيني

Maria dadi · 2014-06-14, 18:37

يعطيك الف عافية

2014-06-14, 18:54

ما شاااااااااء الله حلوى توووب وجديدة ومتميزة يسلموووووووووووووووووو حبيبتي

fatimazahra09 · 2014-06-14, 19:39

اقتباس:

المشاركة الأصلية كتبت بواسطة sissou nrdn

يعطيك الصحة جاك هايل شهيتيني

جربيه ورايح يعجبك ويعجب ضيافك انشاء الله
شكرا حبيبتي

fatimazahra09 · 2014-06-14, 19:40

اقتباس:

المشاركة الأصلية كتبت بواسطة Maria dadi

يعطيك الف عافية

الله يسلمك حبيبتي
حتى نتي ياتيك الصحة

fatimazahra09 · 2014-06-14, 19:44

اقتباس:

المشاركة الأصلية كتبت بواسطة ام يسرا

ما شاااااااااء الله حلوى توووب وجديدة ومتميزة يسلموووووووووووووووووو حبيبتي

ام يسرا غاليتي ..... شكرا على التقييم الشخصي ...
نوع من الحلوة حقيقة قديمة عندي .... و الله و باءذن الله .... نعاود نراجع كل ارشيفاتي و نحاول نحط قدر المستطاع من الوصفات وساعة على ساعة راني نحط الجديد .....

عندي مشكل مع الصور
كن راني كل يوم نحط زوج ........لكن كل حاجة بوقتها الله يقدرنا انشاء الله
سلام

:mh3 1:

سهومةج · 2014-06-14, 19:50

الللللللللللللللللللللللله ايبارك
والله صباح قلت لاختي فاطمة الزهراء ما حطت والو اليوم
راني كل يوم نستنى جديدك واصلييييييييييييييييييي روعة والله روعة
ربي يعطيك ما تتمناي و يفتح ربي في وجهك كل بيبان الخير و يعلي شانك ف الدنيا و الاخرة
نحسك ناس ملااااااااااااااااااح بزاف والله نحبك بلا ما نعرفك شكرا ع الوصفة تهببببببببببببببببل

scorpionoir1982 · 2014-06-14, 20:04

تححححححححححححححفة ربي يحفظك

oumibni · 2014-06-14, 20:08

يعطيك صحة ،

bella12 · 2014-06-14, 20:09

يعطيييييييييييييك الصحة انا لعشية خلطت درت ك و ك ي ز و مبعد نحط كيفاااه جااني

ikhlasse25 · 2014-06-14, 20:24

ما شاء الله عليك اختي اكيد ندعيولك من القلب
لانك كل ما تقدميه راه من قلبك الصافي النقي
ربي يبشرك بالجنة يا رب

fatimazahra09 · 2014-06-14, 20:39

اقتباس:

المشاركة الأصلية كتبت بواسطة سهومةج

الللللللللللللللللللللللله ايبارك
والله صباح قلت لاختي فاطمة الزهراء ما حطت والو اليوم
راني كل يوم نستنى جديدك واصلييييييييييييييييييي روعة والله روعة
ربي يعطيك ما تتمناي و يفتح ربي في وجهك كل بيبان الخير و يعلي شانك ف الدنيا و الاخرة
نحسك ناس ملااااااااااااااااااح بزاف والله نحبك بلا ما نعرفك شكرا ع الوصفة تهببببببببببببببببل

سهومة حبيبتي

يحبك ربي والنبي يا اختي
المحبة في الله مليحة بزاف بزاف
انشاء الله نكون عند حسن ظنك وظن كل المشاركات في هاد المنتدى
وانشاء الله دعواتك تلحق ... محتاجة ليها كتير .......
سلام

fatimazahra09 · 2014-06-14, 20:46

اقتباس:

المشاركة الأصلية كتبت بواسطة ikhlasse25

ما شاء الله عليك اختي اكيد ندعيولك من القلب
لانك كل ما تقدميه راه من قلبك الصافي النقي
ربي يبشرك بالجنة يا رب

ياتيك الصحة حبيبتي ....حابة نوصل كل فكرة عندي صحيحة و مانخليش فكرة صنع الحلوة حاجة خاصة بالمحترفين فقط
كل وحدة عندها فكرها وخيالها الواسع وخاصة ارادتها لي توصلها وين راهي باغية
وانا باغية دعوة خير فقط
وراهي لحقتني
الله يسترك ويحفظك ورمضان مبارك مسبقا

fatimazahra09 · 2014-06-14, 20:49

اقتباس:

المشاركة الأصلية كتبت بواسطة scorpionoir1982

تححححححححححححححفة ربي يحفظك

انشاء الله تجربيه ونقولك انا تحفة
الله يحفظك