الماندو الكورية من مطبخي روووعة

yuuke-chan · 2015-02-27, 14:24

جبتلكم اليوم اكلة عندي بزاااااااااف و انا نحوس عليها و لقيتها صدفة
اول مرة شفتها في مسلسل كوري نتاع وحدة تموت على الماكلة و كل حلقة يهدرو على اكلة المهم شفتها تاكل فيها و هي اكلة تقليدية عندهم اسمها الماندو او الزلابية الكورية و منتشرة في اسيا كثيرا

حوست عليها حتى لقيتها في الانترنت و جربها لقيتها مليحة بزاااف
هذي صورتها في الانترنت

المقادير :
العجينة ولا اسهل لازم تبداي بيها باه تخليها ترتاح و مبعد روحي للحشو
انا درت 4 فناجل فرينة + فنجال ماء و ملعقة صغيرة ملح و ملعقة صغيرة زيت و حطيت كلش يترحا ماتحيروش خاطر العجينة هذي مافيهاش الماء بزاف و صعيبة باه تعجنيها بيديك و احسن حاجة ترحيها و مبعد تلميها برك و تخليها ترتاح في ساشية نصف ساعة

نفوتو للحشو ساهل ماهل فيه خضر : جزرة و حبة جريوات و حبة بصلة صغيييرة و شوية كرمب و ثوم حسب الرغبة و فلفل حار و شوية لحم مرحي اختياري تقدري تبدليه بالفرماج و التون و لا ديري واش تحبي لاكن خليط الخضر هذا مبعد يمدلها طعم مميز ارحيه الخضر مع بعضاهم و ديري الفلفل الاسود و الملح و الفرينة باه تمتص الماء نتاع الخضر

و مبعد كيما ترتاح العجينة حليها ملييح لازم تكون رقيقة كيما تاع البقلاوة و ديري الفرينة باه ماتلصقلكش

طبعيها دوائر

و حطي الحشو في كل دائرة بلا ما طيبيه لازم يكون نيء باه مبعد يطيب مع العجينة

و امسحي الحاشية بشوية ماء باه تلصق كي تقفليها على شكل نصف دائرة و مبعد كي تقفليها زيدي طبقي الحاشية هاذيك باه يجيك الشكل المميز نتاها

و ادهني الكسكاس بالزيت و حطيهم يطيبو فيه و غلفي الغطاء نتاع الكسكاس بمنديل باه يمتص البخار تاع الماء و مايرجعش على الحبات و يفسدهم

و اخيرا خليهم يطيبو مليح و مبعد نحيهم من النار
supprimali خويا الصور و درت وحدو اخرين و صورتهم المرة الاولى لي درتهم صورتهم واضحة و كبار شوي لكن خلي برك المهم تفهمو كيفاه يجيو
بعدما طابوا لازم تلقاوهم تنفخو و كي تنحي الغطاء يهبطو

و كاينة طريقة اخرى لطهيهم و هي في المقلى اقليوهم و مبعد زيدو عليهم شوية برك ماء و خليوهم يطيبو حتى ينشفو يجيو ملاح لكن تاع الكسكاس احسن الله غالب صورتهم و راحولي الصور هاذي صورتهم من الانترنت

واش رايكم نتاعي خير ولا نتاع الانترنت ؟؟؟؟؟
حشيتهم بالفرماج فقط و جاو ملاح يهبلو

راهي قالتكم راني مليحة و عاقلة و فحلة جربونييي و ماتندموش

قبل ما تروحو صلوا على رسول الله عليه الصلاة و السلام

*أم جابر* · 2015-02-27, 15:02

واااااااو و الله روووووووووعة خرجولك لنشاء الله نجربها اختي
صراحة لوكان حطيتي الصور و ما قلتيش بلي الاولى تع النت يبانو بين 2 دياولك و الله خرجت طبق الاصل اللله يجازيك خير اختي

زينب 83 · 2015-02-27, 15:29

يعطيك الصحة يا لفحلة و صفة صحية و كون نزيدولها شوي صوص امممممم نعطيوها الجنسية الجزائرية

yuuke-chan · 2015-02-27, 15:49

اقتباس:

المشاركة الأصلية كتبت بواسطة ام اسيد1

واااااااو و الله روووووووووعة خرجولك لنشاء الله نجربها اختي
صراحة لوكان حطيتي الصور و ما قلتيش بلي الاولى تع النت يبانو بين 2 دياولك و الله خرجت طبق الاصل اللله يجازيك خير اختي

شكراااااا على الرد الجميل طلعتيلي المورال

اخررر كي تجربيها قوليلي زيماه جاتك

yuuke-chan · 2015-02-27, 15:58

اقتباس:

المشاركة الأصلية كتبت بواسطة زينب 83

يعطيك الصحة يا لفحلة و صفة صحية و كون نزيدولها شوي صوص امممممم نعطيوها الجنسية الجزائرية

بلا مزية زينوبة صح عندها لاصوص تاعها لكن مادرتهاش فيها صويا و قصايص صعاب علينا :d درتلها من قبل لا صوص نتاع الكفتة لي درناها للعشاء لكن جات بلاشي صوص خير شوفي تره قداه فيها سعرات