باتيسري رووووووووووووووعة...

RIMA.87 · 2014-12-30, 17:22

السلام عليكم أخواتي الكريمات اليوم جبتلكم باتيسري ديالي ،نعتمد في تحضير الكعكة الاسفنجية على وصفة الاختfella food art و ستجدون الوصفة في هذا الرابط
https://www.djelfa.info/vb/showthread.php?t=1116647
و هذي طريقتي الخاصة و المتواضعة في التزييين إن شاء الله تنال إعجابكم ،في المرة الاولى لم اوفق جيدا كيما راكم تشوفو في الصورة ،كريمة الشونتي باللون شوكولا راهي ذايبة ، لكن البنة مانحكيلكمش ،كل من تذوقها في العايلة ،أبدى إعجابا كبيرا ،حبيتكم تشاركوني رايكم أنتم أيضا،راني مانسيتكمش ،خليتلكم كامل حقكم عندما تشرفوني بمروركم العطر
نخليكم الآن مع الصور هي الي راح تتكلم

الخطوة الاولى:تحضير الجينواز
عملت 2 جينواز أي كعكة اسفنجية لكن بالمول المربع
الجينواز الاولى خليتها عادية و الثانية نحيت 2 ملاعق كبيرة فرينة و عوضتهم بالكاكاو الاسود وخرجت بنية بالطبع و بنة اخرى بعدما بردو لجينواز مليح قسمت كل واحدة على 2 اصبح عندي 4طبقات بلونين مختلفين
الخطوة الثانية: تحضير الكريمة و رغوة الشوكولا و القطر
من ناحية اخرى حضرت كريمة الشونتي (100غ بودرة الشونتي+100غ حليب بارد جداا جداا من الثلاجة مباشرة عندما قلت 100غ حليب يعني توزني الحليب كيما المواد الجافة ثم بالباتور تضربي الحليب مع بودرة الشونتي مليح حتى تصبح كريمة تضعيها في الثلاجة اذا لم تستعمليها في الحين و بالنسبة la mousse de chocolat موس (رغوة ) الشوكولاطة( انانعطيك مقادير مصغرة و اذا حبيتي كمية اكبر ضاعفي المكونات) ;على حمام مائي ديري علبة100غ شوكولاطة سوداء بالطبع تقسميها قطع او تقدري حتى تكرفجيها باش تذوب بسهولة تضيفيلها حوالي ملعقة كبيرة مارقرين و حركي حتى تتجانس و تذوب كلية تنحيها من الفرن و تضيفيلها 2 صفار بيض و تحركي بالفوي اليدوي بسرعة و دون توقف حتى لا ينضج البيض من ناحية اخرى البياض طلعيه بالباتور على شكل مادة ثلجية و دخليه في الخليط نتاع شوكولا مارقرين و صفار بيض بملعقة خشبية و برفق و بفس الاتجاه حتى يدخل مليح و تتجانس كل المواد و بهذا تكوني تحصلتي على رغوة الشوكولا خليها تبرد قليلا في هذه الاثناء تكوني مسبقا حضرتي القطر او sirop و كيفية تحضيره كالآتي:
(1 كأس سكرعادي+2كأس من الماء+قطعة من الليمون،ضعي الكل في كسرونة على نار متوسطة حركي حتى يذوب السكر ثم أتركيه يغلي حتى يصبح ثقيل قليلا(قوام {texture}متوسط لا هو خفيف جدا كالماء و لا هو ثقيل جدا كالعسل). و ممكن تضيفيلو أي نكهة تحبيها

الخطوة الثالثة:تركبيب الكعكة
: لازم تحضري كل شئ امامك ديري كمية كريمة الشونتي في الكيس الحلواني poche àdouille و تتركي كمية باشتطلي بيها كل الجينواز
اولا القطعة الاولى نتاع الجينواز شربيها بالسيرو مايكونش سخون ثم ديري كمية من الكريمة و وزعيها على كل الطبقة ثم ضيفي الطبقة الثانبة نتاع الجينواز لي درناها بالكاكاو ثم شربيها هي الاخرى و ضيفيلها موس الشوكولا و هكذا حتى تكملي كل الطبقات و الطبقة الاخيرة ماتشربيهاش بالسيرو مباشرة طليها بالكريمة و غلفي كل الكعكة نتاعك بالشونتي
بالنسبةللتزيين الجوانب استعملي مكسرات تكون مرحية خشين او شوكولت مبشورة حسب واش يتوفر عندك
و التزيين من الفوق بالكريم شونتي و اذا حبيتي تعطي عدة الوان و اذواق للكريمة نتاعك عندما تحضريها قسميها و جزء ضيفيلو علبة فلان فاني و ضربيها مع الكريمة او فراز او كاكاو انت و الذوق ديالك و ممكن تزينيها بالفواكه الي تتوفر في الموسم
و في التزيين يكتشف الانسان قدراته و ابداعاته
و في الاخير نقولك ان شاء الله تجربيها و تنجحي فيها و تاكليها انت و احبتك بالصحة و العافية
و ان شاء الله نكون وصلتك الفكرة و شرحتلك شرح كافي حتى تتحصلي على اروع كيكة

الى الملتقى ان شاء الله