قاطو يذوب في الفم....زاكي واقتصادي

[*توبــــة*]

بسم الله الرحمن الرحيم
أحلى سلام على أعضاء وزوار منتدى الجلفة
أول موضوع ليا معاكم ان شاء الله تستفيدو منو

هذي حلوة سهلة في تحضيرها واقتصادية في مكوناتها و الاهم الذوق راااااااائع وتذوب في الفم



المقاديـــــــر :

- 500 غ مرغرين طرية
- كأس زيت
- كأس سكر رطب
- ملعقة صغيرة خميرة قاطو
- فاني
- رشة ملح
- 1 كغ فرينة


التزييــــــــــن :
- عسل
- ماء الزهر
- كاوكاو محمص ومرحي او قوفريط مرحي أو نوا د كوكو


التحضيــــــــر :
نحطو ملعقة الخميرة مع شوي فرينة و الملح ونخلوهم بجهة


المرغرين نكونو نحيناها بمدة من الثلاجة باش تكون طرية
ونخدموها باليد مليييييييح


ثم الزيت و السكر و باقي المكونات
حتى نتحصل على عجينة طرية


نشكل كويرات بنفس الحجم ونحطوهم في بلاطو مرشوش بالفرينة ويمكن استعمال ورق الشمع للطهي


ندخلوهم لفرن سخون مسبقا يطيبو على 180 درجة لمدة 10 دقائق من تحت وحمروهم غير شوي من فوق


شوفو كيفاه طابو من تحت


خلو حبات القاطو يبردو مليح مبعدا زينوهم


نسخنو العسل غير شوي ونخففوه بماء الزهر......العسل يجي أخف على العسل تاع المقروط و البقلاوة
نغطسوهم ف العسل ونحوهم مباشرة بلا ميطولو ونرمدوهم ف الكاوكاو المرحي
ونحطوهم ف الحاويات




ملاحظـــــــة:
- أنا استعملت كيلو فرينة وحوالي 2 مغارف كبار
- يمكن بعد التزيين السابق تزيدو خطوط بالشوكولا وفوقها نصف حبة سوريز
- هدي الكمية قطعتلي 155 حبة

ان شاء الله وفقت في الشرح وتعجبكم وتجربوها لأنها فعلا راااااااااائعة


وصلى الله وسلم على سيدنا محمد وعلى آله وصحبه أجمعين

[malek firdaouss]

ماشاءالله روعة و اقتصادية

يعطيك الصحة

[oummalak]

حلوى سهلة واقتصادية شكرا اختي ننتظر مواضيع اخرى ونحن علينا التطبيق

[النرجووسة]

اممممممممممممممممم توبة اتاريك مو هينة زيدي كتبيلنا وصفات باينة شطووووووورة
عجبتني هدا الوصفة نهار نطبقها نحطك الصورة

[tokio hotel]

شكرااااااااااااااااااااااااا حبيبتى على الوصفة ربى يجعلها فى ميزان حسناتك

[ام سوهيل]

يعطيك الصحة كنت انقارع فيها ربي يحفدك كي نجربها نحطلك الصور
شكر شكرا

[سحابة أمل]

يعطيك الصحة ساهل وزاكي

[ام رشدى]

شكرا عزيزتي الحلوة اقتصادية وخفيفي تعيشي حنونة والا عنك وصفات حطي اكيييد من يدك كل شىء ملييييييح

[هالة اسماء]

اممممممممممممممممممممم بارك الله فيكي حبيبتي هذا ما نبغي الساهل و يقطع بزاف في ميزان حسناتك
اللهم صلي وسلم على الحبيب المصطفى

[ام سهام 02]

هااااااااايلة بارك الله فيك

[yasmalak]

يعطيييك الصحة ختيتي هايلة تليق مع الحليب

[طيف السعادة]

يعطيك الصحة ختي غدوا صباح نجربها ان شاء الله

[idron0]

الله يعطيك الصحة

[جيجلية]

شكلها هايل ما شاء الله عليك

بصح تبانلي اجي مبسسة بزاف انا نحب الحلوى اللي تكون حاكمة روحها

جزاك الله خيرا

[أم محمد تاج]

خفييييف كيما دمك حنووووونة وممممم ومممم ومممممم الف شكر