الجزء 189 من كوزينة حراير الجلفة ..كوزينة أغلى حراير

[أم فاطمه]

السلام عليكن اخواتي و حبيباتي الغاليات عيدكن مبارك و كل عام وانتن بخير و تقبل الله منا و منكم و غفر الله لنا و لكم أحلى سلام لكل فحلات الكوزينة والمنتدى.

[nihal159]

السلام عليكم و رحمة الله و بركاته، صباح الخير و صح عيدكم ياحراير الجلفة، كل عام و اانتم بألف خير و ياربي ينعاد عليكم بالخير و الصحة و لهنا.
سامحوني أرجوكم علي الغياب و التقصير، اسفة جدا، ربي عالم ان ضروف أقوى مني هي لي بعدتني عليكم، المنتدى كان تقيل كالسلحفاة و زادت الانترنيت خلاصتلي يعني الدنيا كاملة تفاهمت على راسي ههههههههه.
هذي صينية الحلوى لي بعثتها لست الحبايب أمي فالعيد، عملت مخبز اللوز، حلوى المهراس، تشراك، كعيكعات، بقلاوة، مقروظ.

[nihal159]

نفس الصحن من زاوية تصوير اخرى.

[nihal159]

بالنسبة للمخبز، جربت وصفة شفتها في حصة زين و همة، دارت حبة مخبز و لصقتها مع حبة صابلي، و من بعد غلفتهم بالقلاصاج و زينتهم بورود بعجينة السكر

[nihal159]

صينية البقلاوة الله الله هههههههه

[nihal159]

مقروظ غني عن التعريف ههه

[nihal159]

بريوش درتو في رمضان باش نسحرو به، الوصفة خذيتها من اليوتيوب ، رووووووووووعة ، خفيف كالريشة، كلمة روعة قليلة عليه.

[nihal159]

غذانا نهارالعيد، شخشوخة الضفر، للأمانة الصورة من الارشيف، الشخشوخة تاع نهار العيد درتها باللحم و الجاج، جات بنيييييييينة هههه

[nihal159]

غذانا لبارح لوبيا فصاصة مع الكسرة سخونة من الطاجين ههه

[nihal159]

عشانا لبارح همبرغر ههههههههههههههههههه، مول الخيمة مسكين اشتاق البنة تاع السندويشات تاعي احم احم هههههههههههههههه.
الصورة من الارشيف،

[nihal159]

أم هدول؛ ريتال؛ فاتي؛ فيفيو؛إبتسامة حلوياتك روعة ؛سوسو ؛أم رحاب؛حيوتة؛ سعيدة؛ مريومة؛ أم هزار؛ أم فاطمة؛ سحابة؛ أم لجين؛ الأميرة سميرة؛ هيلينا؛ زيكا؛ أم مهدي؛ أم يوسف؛ ريمة؛ أروى ألاء، رندة؛ و كل حراير الجلفة لي شاركونا بمائداتهم الرمضانية و يومياتهم و تحضيراتهم ، عشنا مع بعض طول أيام الشهر الفضيل و كأننا عايلة واحدة؛ نحب نشكرهم كلهم و كل كلمات الثناء و الشكر ستكون قليلة لقاء ماقدموه من مجهودات فالكوزينة؛ يعطيكم الصحة و صح عيدكم و كل عام و أنتم بألف خير.
سوسو كنت متميّزة و معطاءة و مابخلتيش علينا بوصفاتك و إكتشافاتك المطبخية ههههههه يعطيك الصحة.
حبيباتي البابيشات ريتال؛ فيفيو؛ إبتسامة رغم صغر سنكم لكن شاركتونا و زهيتيو الكوزينة بأطباقكم؛ شكرا ليكم و ربي ينجحكم في قرايتكم.
أم هدول و حيوتة و أم رحاب؛ أعمدة الكوزينة و ركيزتها؛ بيكم و معاكم تحلى الكوزينة و يكون ليها معنى؛ ربي مايحرمناش من حضوركم المتميّز.
أم فاطمة؛ أم الكل و جوهرة الكوزينة؛ مازلنا نأمل رجوعك للكوزينة؛ ربي يحفظك و يشفي زوجك.
ريمة يا ريمة أنتي قمر و النجوم كواكب ههههههههه ماشاء الله؛ حلوياتك تحفة حرقتينا يابنت الإيه ههههههههههه.
شكرا شكرا شكرا ليكم كامل

[سحابة باردة]

السلام عليكم عيدكم مبارك وكل عام وكامل حراير الكوزينة بخير
توحشتكم بزاف الله غالب المرض هو اللي خلاني ماقدرتش نشارك بزاف في كوزينة صديقتي الغالية نهال
نقولها معذرة والله ربي عالم بضروفي
سلامي لكل الحراير أم هدول ونقولها الف مبروك نجاح البنات
حيوتة أن شالله تكوني بخير نتي والبنات والامير الصغير
مننساش أم فاطمة وأم رحاب سعدودة ومريومة وريمة ورزيقة وكل الحراير
نحيي ثاني الشيرات اللي نشطو الكوزينة في رمضان سوسو وريتاج وفيفي

طبعا مجيتش يديا فارغين هذوا حبيبات قاطو خدمتهم أمي وخوتاتي ليا كي كانو عندي ونا مريضة الله يحفظهم
حقا شفت قاطو أم هدول علامة ومخبز مع البقلاوة والمقروط نهال وأبدعتي في قاطو المهراس يعطيك الصحة ويابخت المسيو بيك ههه و بصحتكم لاعقوبة للعام الجاي أن شالله
فاتي حلوياتك أجمل من الخيال
فيفي نتي ثاني القاطو تحفة
الله يحلي أيام الجميع

[أم رقية نسرين]

سلام نهولة و سحابة حلوياتكم ماشاء الله بصحتكم وسينية البقلاوة يا نهولة معندي منقول تاع الحراير
حلوياتي مصورتهمش درت صابلي سيليكون و ديليس بالكابريس وصفة ام اماني تهببببببل و مقرود و بقلاوة و قاطو بشكل دمعة باا قلاساج

[أم رقية نسرين]

url=https://up./][/url]

[x ام رحاب x]

السلام عليكم ورحمة الله وبركاته
صحة عيدكم حتا وهي روطار الله غالب عليا انا في العيد انكون المورال طايح علابيها مانقدرش ندخل كل عام وانتم بالف خير ينعاد عليكم بالخير واليمن والبركة ان شاء الله
حبيت انبشركم وليدي جاب الرابعة الحمد لله ولعقيبة لوليداتكم جميعا امبعد انحطلكم الباروك استناو عليا تنوض بنتي واتحطلي الصور انحطهالكم
سلامي لكامل لبنات الحراير الي جاهدو في الكوزينة طيلة شهر رمضان انقلهم في ميزان حسناتكم ان شاء الله
نهولة انت تاني اليقلك وسام الشجاعة تستاهليه
سحابة الحمد لله الي ريحتي طهور ان شاء الله
طالبة التاريخ صحة عيدك حبيبتي