اقتباس:
المشاركة الأصلية كتبت بواسطة نسائم الهدى
بارك الله فيك اخي حمزة
مازلت كما اعتدناك لم تتغير
و مازلت اعجز عن الرد على اسلوبك بنفس الاسلوب
و عذرا منك اخي و لكنني ساكتب بالعامية
لان اللغة العربية تحتاج لتركيز و انا و الحمد لله هذه الايام اتذكر كيف اطبخ الاكل بطلوووووع الروح
المهم نعود للموضوع
انا ما نقدرش نحكم او نحكي او نقول كيف تتصرف الزوجات الاخريات
لان هذه في الاغلب لحظات خاصة و في عائلتي نحن لا نتحدث عن لحظاتنا الخاصة و دقائق حياتنا مع ازواجنا
رغم انني مقربة جدا جدا جدا من زوجات اخوتي و خالاتي
و لكن هذه اللحظات تبقى سرنا الصغير الجميل
الذي نبتسم عندما نتذكره دون ان يعلم الآخرون لماذا نبتسم // و صدقني انه شعور منعش كنسمة باردة في ليلة صيف //
و بسبب ما سبق و ذكرته // اشعر فجأة انني في مرافعة في المحكمة //
المهم لن استطيع ان اخبرك سوى بتجربتي الشخصية
انا ملي اتخطبت و انا نخمم
كيفاش نحكي مع هدا مخلوق ربي؟؟؟؟؟
هو صحيح انا راديو مكسر //كيما يقولو خاوتي :-) //و لكن مع المقربين فقط و هم يعدون على الاصابع
و لكن مع الناس افضل الصمت و الاستماع و التركيز // لدي عقدة الخوف من الاحتكاك بالٱخر //
عندما عقدنا قراننا انا و تاج راسي كان يكلمني بالهاتف
يبقى يحكي و يحكي و يحكي عن حياته و طفولته و رحلاته و مواقف مضحكة حدثت له و......... و........... و
و انا في الحقيقة يعجبني الحال و نبقى نسمع و انا ساكتة
و من شدة صمتي رجع يعرف وين راني قاعدة من الاصوات التي يسمعها
مثلا يقولي :
راكي قاعدة في الصالون
نقولو وعلاش؟؟؟
يقولي سمعت تكات الساعة
او راكي في غرفتك
وعلاش؟؟؟
سمعت صوت السرير راكي قاعدة طرف السرير
راكي قاعدة في غرفة خوك؟
وعلاش؟؟؟
سمعت صوت المقنين اللي حاطو في النافذة
و في تلك الفترة ما كانش يتقلق من سكوتي حتى و يتقلق ماشي بزاف
و كي يقولي :
احكي حبيت نسمع صوتك
نقولو :
واش نقول؟؟؟
يقولي قولي اي حاجة
معليهش اكذبي عليا احكي على الدين على السياسة او الرياضة او اي شي
اقول له :
انا لا اكذب و لا اتجمل
و لان الفترة كانت قصيرة و لاننا لم نعرف بعضنا قبل العقد كانت تجيه عادي اني ما نحكيش معاه بزاف
و عندما تزوجنا بقيت نفس الشي
هو بطبعه مختلف قليلا
مع الناس هو غير اجتماعي لديه القليل من الاصدقاء بالإضافة لاولاد خالته
و بعد زواجنا رجع مقرب بزااااااااااااف من خاوتي
و رغم ذلك ما يتكلمش بزاف مع الناس خير الكلام ما قل و دل هكذا يقول
اما معي فهو لا يسكت الا اذا كان مريض او زعفان
كنت عندما اتحدث في موضوع ما يبقى مدهوش و فاهي فيا و يقولي :
الحمد لله كي سمعت صوتك عندبالي ما تعرفيش تشاركي في حوار
و من بعد رجع يتقلق
هو دايرلي فلم هندي و انا ساكتة
كي رجع يتقلق ما عجبنيش الحال //هو زوجي و لاااااااازم يرضى بأي طريقة //
اكتشفت حاجة بان الرجل في داخله طفل صغيييير
جا في بالي نعاملو كيما نعامل اولاد اخوتي // يعني تفشاش و تقلاش و دلال //
هو عجبو الحال و تغير الوضع و اقلب السحر على الساحر
رجعت انا نتقلق نحكي و نحكي و نحكي و ندلل و هو صمت لا يتكلم الا اذا طلب شيئا
حسبتها من جديد في راسي
طلعتها و هبطتها و وزنتها و كيلتها و عرفت واش نعمل
تقنية الري بالتقطير // gــوت آ gــوت //
يعني لا ارويه دفعة واحدة
بل قطرة و اتركه يشتاق للقطرة التي بعدها
و بهذا عاد كما كان في الاول
و لكنه ما عادش يتقلق لانه دائما ينتظر المفاجأة
و التي لا يعلم من اين او متى تأتيه
@
@
@
و هكذا اخي حمزة يجب ان تكون العلاقة بين الرجل و المرأة او بمعنى اصح بين الزوجين
أخذ و عطاء
و كيما نقولو عندنا
شوية من الحنة و شوية من رطابة اليدين
و
من عندي وعندك تنطبع من عندي برك تنقطع
ربما كتبت كثيرا بل هو اكيد
و الاكيد اكثر انني لم احسن الكتابة او الشرح
و ربما لم اوصل الفكرة حتى
و لكنها حوصلة تجربتي الشخصية البسيطة خلال الـــ 18 شهرا الماضية
بارك الله فيك اخي حمزة
و كما قالت الاخوات :
ان كانت المراة صامتة او خجولة
فعلى الرجل الالمام بفن اذابة الجليد و هذا من طبع المراة و الرجل
لكن المشكل اذا كان الرجل جبل جليد هنا تكمن الصعوبة
ليس مستحيلا و لكنه صعب جدا
|
هههههه يا حنونتي كتبت كامل هذي و انت سكوتية؟ مالا لوكان جيتي هدارة نتسلفوا منتدى جديد تكملي فيه, من كتابتك يظهر انك كثيرة الكلام ,
متزعفيش مني اشكرك بالعكس, من خلال كتابتك قدرت نفهم واش كان يقصد هذا الاديب ,