كواليس عيد الأضحى 2016 * 2017

*توبــــة* · 2017-09-08, 19:12

بسم الله الرحمن الرحيم

جبتلكم كواليسي المتأخرة لعيد الأضحى ... يارب تستمتعو معي

هذو كواليس العيد اللي فات

طبعا قبل العيد ننظفو البيت تنظيف عميق.. انظف الثلاجة.. نوجد الحميص والفلفل الطرشي وهريسة بروقة
نوجد الحلويات ووووووووو ككل بيت جزائري

يوم العيد بعد الذبح والسلخ نبداو على الكبدة

نشوطو بوزلوف وانقيو الدوارة

الغداء يكون بكبوكة بصوص بلونش ومقالي مع كسرة طبعا

وهذا مصران محشي بكبدة وقلب وطحال.. امممممم هااايل

العشا شواء.. انا على الاغلب ناكل شوي فواكه وبسسسس

ثاني يوم لازم بربوشة بالكتف الايمن.. مع لحم محمر ف الكوكوط

هذو بعض الاطباق.. شربة فريك وخبز الدار.. لابيري.. شخشوخة وووووو

وكي نتقهمو من اللحم والشحم خخخخخخ لازم كسرة باللبن ولا شكشوكة ولا بربوشة بالحليب

وهذو كواليس عيد الاضحى 2017 نفسها بالتقريب

هذا ثاني يوم العيد

امي هي ادير الخليع وتقسم اللحم .. انا غير نطيب .. وطبعا ماننساوش جزء الصدقة.. ربي يتقبل منا

اللي تحتاج اي وصفة تقولي

يا رب تقبل منا و اغفر ذنوبنا واعده علينا يا الله باليمن و البركات

وصلى الله وسلم على نبينا محمد وعلى اله وصحبه اجمعين

اسيل الباتول · 2017-09-08, 19:22

اولا نقولك عيد مبارك كل عام ونتي وكل عائلتك بالف خير
الله يبارك فعلا استمتعت وانا نشوف في كواليسك
يعطيك الصحة اختي توبة
وربي يعيدو علينا بالصحة ولهنا
واذا مزال ماكيش مزوجة ان شاء الله العام الجاي تنقلينا كواليسك من بيت زوجك
امين يا رب العالمين

سحابة باردة · 2017-09-08, 20:27

توبة عيشتينا أجواء العيد في بلاد الشاوية الله يبارك كلش روعة
من الحلويات لطعام لدوارة للمشوي والمقلي والحميص والمخللات للبوزلوف اللي يشعل هه ولابيري مع هذاك المطلوع ماخليتي والو نقلتينا كلشي يعطيك الصحة
كواليس تامة كاملة لاعقوبة للعام الجاي تحياتنا الكل اللي ساهموا في الشغل والأطباق
وطبعا شكرا على مجهودك الكبير في الطبخ والتصوير
تساهلي أحلى تقييم حبيبتي

أم حمزة السلفية · 2017-09-08, 20:49

سلام الله عليك أسومة حنونتي يعطيك ألف ألف صحة أنت والوالدة ويسلم يديكم والله كلشي روعة
أسأل الله أن يرزقك الزوج الصالح والذرية الصالحة ودوام الصحة والعافية والشطارة أخيتي
بلغي سلامي الحار للوالدة الكريمة ربي يخليهالك ويبارك فيها وفيك حبوبتي

أم فاطمه · 2017-09-08, 22:25

السلام عليكي اختي توبة مشاء الله خلتينا نعشو اجواء العيد بكل تفاصيله منستي حتى حجة المشوي الكسرة المشوي الزليف حتى. الخليع الله يعطيك الصحة
تحياتي

ام هدول · 2017-09-08, 22:41

تحياتي اسومه ربي يبارك كلش روعه ومتقون خليتينانعيشو كوااليس العيد روعه ....سلميلي على الوالده
فحله وجابت احلى فحله ماشاإالله طلبي كي نرجع اعطيني وصفت المصران محشي بالكبده والقلب والطحال عجبني بزاف وفكرتو جديده عليا

روعة الصحراء · 2017-09-09, 00:29

ماشاء الله اختي اطباق في غاية الرروعة ربي يحفظك
حبيت نسقيك على الفلفل المشوي شويتىه على الطاجين تاع الطين اي تاع الكسرة ولا وثاني وصفة البربوشة تاع الحليب حنامانديروهاش وشكرا ليك

omjoujou · 2017-09-09, 14:00

ماشاء الله لاحول ولاقوة الا بالله
تبارك الله عليك غاليتي كلش تووووب عشت معاك الكواليس لحظة بلحظة كلش عحبني يعطيك الصحة نتي وماماك
انا تاني نطالب بوصفة المصران المحشي شهيتيني فيه حتى سااالو ريوقي
ربي يرزقك الزوج الصالح ان شاء الله المرة الجااية تجيبيلنا كواليس تاع بيتك نتي

kouka a · 2017-09-10, 09:32

مشاءالله كلشي يشهي سيرتو المسران مممممممممممم
لعقوبة نهار نشوفو كوليس في دارك

nihal159 · 2017-09-10, 10:56

الله يبارك كلشي كامل مكمّل؛ رجعتيلنا نكهة اليوم الأول تاع العيد هههههههههههههه ربي يحفظلك الوالدة و قوليلها صح عيدها و يعطيها الصحة و لعقوبة لعام الجاي تصوريلنا كواليس العيد من دار زوجك.

*توبــــة* · 2017-09-10, 12:10

اسيل.. سحوووبة.. ام حمزة.. ام فاطمة.. ام هدول.. روعة.. ام جوجو.. كاوكا.. نهال..

شكرا شكرا غالياتي.. والله نورتوني بكلامكن الرائع ودعواتكن الاروع

وصفة المصران المحشي ضرك نحطها من عيوني حبيباتي

روعة الحميص نشوي الطماطم والفلفل على طجين يجي مثقب خاص بالحميص
مش غالي نظن شريتو ب 40 الف برك
والبربوشة تاني رايحة نحطلك الوصفة باذن الله

*توبــــة* · 2017-09-10, 12:16

وصفة المصران المحشي درتها من مخاميخي خخخخ والفكرة هزيتها من عند ابداع جزائرية
الطحال مايحبوهش ولكن فيه فوائد كثيرة قلت ملا بهاذ الطريقة مايفيقوش بيه خخخخخخخ

نشوي شوي لحم وشوي من القلب والكبدة غير شوي مش بزاااف ونشوي الطحال واللي
يحبو الرئة تاني يشويوها احنا نرميوها واحد ماياكلها
بعد ما تشويوهم حطوهم ف الخلاط وارحوهم يرجعو كي الفيونداشي وخلاص ههههههه
وزيدو معاهم نصف ولا ربع بصلة صغيرة ونصف حبة طماطم صغيرة حبة فلفل وزوج سنينات ثوم
ومعدنوس ارحيوهم كامل خلطوهم مع الخليط السابق مع ملح وفلفل اسود وشوي كمون
احشي المصران تاعك مي ماتعمريهش بزاااااااف بسك كون يتعمر يخرج الحشو
ويلا خفتي زيديلو المصران اللي فيه الشحمة بزاااف يعني دوبليلو ههههههه فهمتو؟؟؟؟؟
اثقبيه مليييييييييييييييييح واربطيه بخيط من الطرفين
وحطيه في مول تاع الفرن ودخليه يطيب دون اضافات
ومرة على مرة طلي عليه ويلا تنفخ زيدي اثقبيه
قطعيه دوائر وقدميه مزين بالدبشة والقارص اممممممممممم والله هايل بشهادة اللي ذاقو عندنا
ماتقطعيهش برك وهو سخون بزاااف
مدة الطياب حوالي نصف ساعة او ساعة على الاكثر

ان شاء الله تكونو فهمتو.. لانو عندي مشكل ف الشرح مانعرفش نوصل الفكرة خخخخخخخ

lyzzabel · 2017-09-10, 17:52

كواليس رااااااااائعة أسووومتي والله استمتعت بززززاف اللهم بارك تسلم ايديك و أيدين الماما ربي يحفظها و يطول في عمرها .. كل عام و انتم بخير ينعاد علينا و على الأمة الإسلامية بالخير واليمن والبركات. . بصح سخفتيني بالملفووف توحشته ههههه

حياة مليزي · 2017-09-10, 18:22

صح عيدكم روعة اطباق العيد تشهي الله يبارك بصحة لهنا لعقوبة لعام لجاي

crono · 2017-09-10, 19:29

[/SIZE][/B][/COLOR][/QUOTE]

عيدك سعيد اختي *توبــــة* شكرا على مشاركتنا هذه الاجواء العائلية البهيجة ربي يعيدو علينا و عليكم بالف صحة و هنا يا رب ....
هل انتي عاشقة الجنة غيرتي اسمك