طاجين الزيتون المحشي المفضل عند يما لعزيزة ربي يحفضلنا امهاتنا كامل يا رب

[انا هي رزيقة]

اليوم حبيت نحطلكم هذ الطبق في خاطر يما لعزيزة لانو من اطباقها المفضلة على الاطلاق و كي نحب نفششها نعرضها عليه


هو يحتاج زيتون طبعا استعملت ثلاث أنواع الزيتون الكبير لي يستعمل في الدولمة و الزيتون ايفيلي و الزيتون المنزوع النوى العادي . الزيتون هذاك الكبير خليتو في الماء البارد طول النهار لانو مر كثير اومبعد غليتو في الماء ثلاث مرات لمدة 10 د تقريبا لكل مرة . اما الزيتون الاخر فانا عادة نخليه في ماء نقي و بارد لمدة ليلة كاملة و استعمله مباشرة منغليهش .
و نحتاج ايضا بصلة كبيرة استعملت النصف الكبير في صوص الزيتون و الكفتة و النصف الصغير في رولي الدجاج بالزيتون
و المكونات الاخرى هي 3 فصوص ثوم و ورقة رند و معدنوس و صدر دجاج و ملح و كمون و ملعقة صغيرة طماطم مصبرة و كركم و رشة فلفل عكري لرولي الدجاج و ملعقة شابلور و قرفة و فلفل اكحل و 2 جزر. اولا نطحن نصف البصلة الكبير مع فصين ثوم كبار في الروبو و نحط نصف الخليط مع عظم الصدر و ورقة رند و شوية زيت و ملح و فلفل اكحل و رشة كمون و رشة قرفة و نصف ملعقة كركم و ملعقة صغيرة طماطم مصبرة والجزر مقطع الى دوائر كبار انتم و ذوقكم

نقلي الكل مليح مليح تقدري تزيدي طماطم صغيروة انا ماكنش متوفرة. ثم ديري الماء على حساب مرايح يطيب الزيتون و بولات الكفتة لي راح تحطيهم متكثريش الماء من الاحسن تزيدي اومبعد الا خصك


من جهة اخى تخلطي الكفتة مع باقي نصف البصلة المطحونة مع ملح و نصف بيضة مضروبة مليح النصف الاخر درتو في رولي الدجاج . زيدي معاهم معدنوس مقطع رقيق جدا انا نقصه بالمقص هكذا يجيني رقيق و قرفة . ديري كور بنفس حجم زيتون الدولمة و زيدي عمري الزيتون تاعك باللحم . تسهيلا للمهمة انا نقطع الزيتونة من واحد الجهة و نعمرها برفق متخافيش الحشو مرايحش يخرج دخليه فقط مليح

نقطع الزيتونة بهذا الشكل

في هذ الاثناء يكون الصوص غلا نقصي على النار و ارمي فيها برفق لي بولات مع الزيتون المعمر و الزيتون ايفلي ايضا . و خلي الكل يطيب على نار متوسطة الى هادئة . متنسايس تذوقي الصوص تاعك دايما ذوقي الماكلة تاعك باه تشوفي كاش متزيدي ملح او توابل على حساب ذوقك.

من جهة آخرى حطي في الروبو صدر الدجاج مع هذاك نصف البصلة لي بقى و معدنوس و ثوم و ملعقة كبيرة شابلور و نصف بيضة لي هدرت عليه فوق و ملح و فلفل اكحل و كمون و شوية فقط قرفة و رشة فلفل عكري . ثم فرشي الخليط على ورق بلاستيك اذا كان يلصق شمخي يديك بالماء ثم حطي فوقه زيتون انا حطيتو هكاك دون قطعه . ثم لفي بحذر باه تحصلي على رولو دجاج ولفيه في ورق بلاستيكي باحكام و زيدي لفيه في ورق الومنيوم ثم حطيه في قدر فيه ماء يغلي لمدة حوالي 15 الى 20 دقيقة . بعد متنحيله الورق حمريه في شوية مرغارين مخلطة مع زيت زيتون


كي يبرد قطعيه و زيني بيه طبق الزيتون المحشي تاعك. . و التزيين اكيد راكم فحلات اكثر مني في هذ الشيء . انا عن نفسي نحب البساطة و زيد وقتي ضيق جدا علابيها نركز اكثر على البنة ...... احم احمم حوحو يشكر روحو ..... خخخخخخ لي يعجبها طبقي دعوة خير تكفيني و لك بالمثل اختي.

هذ هو الطبق سبقت حطيتو في كوزينة فحلات الجلفة مكانش عندي الوقت نصور و نزوق طبق اخر

علابالي الموضوع طويل لكني تعمدت هذ الشيء افادة للبنات لي راهم داخلين عالم الطبخ و راهم يتعلمو وحدة وحدة حبيت نفيدهم و لو بالشيئ القليل كما استفدت من اللواتي سبقنني لهذا العالم الجميل

[الجمان]

الله يبارك فيك تحفة

[ام عبدو و ملاك]

والله من هاداك النهار وانا حابة نسقسيك عليه وننسى روعة روعة روعة يعطيك الصحة راهو جاي رمضان ان شاء الله نجربو باين بنين بصحتكم

[rotouj25]

baraka allaho fik

[فايزة1207]

ما شاء الله عليك ربي يحفظهالك وتزيدي طيبيلها

[أم سدرة]

اممممممممم زقزوقة يعطيك الصحة وربي يحفظلك الأم الغالية

[رزيقة16]

ختيتي دائما مبدعة تسلم الايادي ا يحفض ماما ك الغالية و كل المهات امين يا رب

[fatisousou]

بارك الله فيك غير انشوف اسمك ندخل مباشرة ربي يحفظهالك وطول في عمرها انشاء الله
مع تحياتي لك

[x ام رحاب x]

ماشاء الله عليك حنونة وتسلم الايادي تحفة من يديك يصلح بزاف لرمضان وبريزونتابل روعة

[oum islem]

ربي يحفظك ويحفظ الغالية عندها الحق يكون طبقها المفضل لانو رائع جدا وباهي بزاف
لك مني الشكر والتقييم لهدا الموضوع اللذيذ
بارك الله فيك

[أم محمد تاج]

رااااائع والله تسلم ايديك وربي يحفظ ست الحبايب يارب

[wahibaazel]

اممممم تسلم الايااادي رووووعة

[hab12456]

جزاك الله خير

[حياة مليزي]

يعطيك صحة اختي ماشاء الله

[ريحانة24]

طبق ماشاء الله تتتتتتتتتتتتتحفة لكن اتحفيينا باطباق راقية كهده بوركت اخيتي