بعض أطباقي لرمضان 2017 - منتديات الجلفة لكل الجزائريين و العرب

العودة   منتديات الجلفة لكل الجزائريين و العرب > منتدى شقائق الرجال > قسم الطبخ و المأكولات > قسم الأطباق الرئيسية

قسم الأطباق الرئيسية الأطباق الرئيسية حصرية لأعضاء المنتدى

في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة تقرير عن مشاركة سيئة ( تقرير عن مشاركة سيئة )، و الموجودة أسفل كل مشاركة .

آخر المواضيع

بعض أطباقي لرمضان 2017

إضافة رد
 
أدوات الموضوع انواع عرض الموضوع
قديم 2017-06-10, 15:28   رقم المشاركة : 1
معلومات العضو
إلهام07
متألقة ركن المعجنات
 
الصورة الرمزية إلهام07
 

 

 
الأوسمة
الموضوع المميز لسنة 2013 وسام نجمة التطبيقات 
إحصائية العضو










Flower2 بعض أطباقي لرمضان 2017

البسملة1



صباح الخير حبيباتي

راني نشوف فيكم راقدين خلاص واش هذا

جبتلكم بعض اطباقي وأعتذر عن تاخري في الرد على بعض الأخوات مادخلتش منذ مدة كان جدي توفى ثم جاونا الاختبارات
والعسة نتاع الامتحانات ثم الصيام ورمضان قلت نخطف شوية وقت نحطلكم الصور لأنو غدا إن شاء الله نعسو امتحان البكالوريا ماعنديش وقت .. حبيت نحطلكم الصور كاشما تحبو تهزو أفكار ولا تكوبيو أطباق للفطور ههههه


نبداو بحاجة حلوة طلعو بيها السكر
مادلان جوز الهند والليمون درتو عدة مرات وخرج طبعا روعة وكيما راكم تشوفو يجي بومبي مايهبطش ... اللي مازالت ماجرباتوش واش راهي تستنى ؟

الرابط : https://www.djelfa.info/vb/showthread.php?t=2030453


الكيكة المحشية بالبيسكوت والقرفة والكارميل بنكهة النيسكافي ... طبعا ماهيش حاجة جديدة ولكن ماشفتش الاخوات هنا جربوها انا عجبتني القرمشة نتاع الحشوة و النكهات المختلفة مع صوص النيستلي والكيري وكاين اللي ماتعجبوش ريحة القرفة ممكن الأذواق تختلف اللي تحب الوصفة تكتب في قوقل كيكة محشية بيسكويت تلقاوها

من داخل .... فقط نصيحة راهي جي حلوة بزاف نقصي كمية السكر والصوص ماتكثروش


هذا بريوش رولي بالحشوة السكر البني والقرفة وصوص النيستلي والشوكولا ..حنا نموتو عليه .. هذي وصفة خليجية لقيت وحدة غيرت مكان السكر فلان كاراميل وتلمي العجين بالفرينة وبودرة الشانتيي جي بنينة وخفيفة وريحتها فعلا رائعة بصح مايجيش العجين مقطن ... لهذا فيما بعد رجعت للوصفة نتاعي الأصلية .... (يتبع)




المقرونة نتاعي الرهيبة في المقلاة باللحم المفروم والفراميج ممممم
الرابط: https://www.djelfa.info/vb/showthread.php?t=1978428


هذي حلوة التاج خليت الوصفة كيما (راهي مضبوطة) وزدت فيها عصير ليمون جات تحححححفة ننصحكن جربوه ساهل وبنين وزاكي وخفيف ونكهة الليمون رائعة مع المعجون

الرابط: https://www.djelfa.info/vb/showthread.php?t=1314758

هنا درتو في مول مختلف والمعجون مادرتلوش ملون


هذي وصفة شفتها في اليوتيوب اللي هي كرات البطاطا محشية بالجبن مع صوص السلق والجبن وصفة خفيفة ولذيذة طبعا حرفت فيها باش جي بنينة والنتيجة ...






هذي مقلوبة الباذنجان بالأرز واللحم المفروم طبعا كامل تعرفوها وبما أنو عائلتي تموت على الباذنجان طاحو فيها هَمْ هَمْ هَمْ

وصفة الرولي هذي لأم أنس جي خفيفة وماشي أول مرة نديرها ولكن كنت نحوس على رولي مثل المحلات مايجيش خفيف بزاف ويجي متماسك وبقيت نجرب ونحوس (وسلاحف النينجا ياكلو
) حتان لقيت الوصفة المثالية .... (يتبع)
كيكة الشامواه تحلية رائعة ووصفة قديمة ومعروفة خاصة في الخليج مدايرين بيها حالة وفعلا لذيذة تبرد القلب زدت من مخاميخي هذيك الطبقة الفوقانية بالشوكولا وجات أحسن ... فقط ملاحظة جربتها أختي ونقصت في كمية الكاكاو وجات أحلى من نتاعي جربوها الوصفة موجودة في اليوتيوب وفي قوقل




هذه صينية او غراتان شرائح خبز التوست بالدجاج والخضار والجبن فعلا رائعة والشيء المضحك فيها ماتحتاجوش خبز الجواز راهو في الطبقة السفلية يعني طبقة شرائح خبز مدهونة كريمة وجبن سائل ثم طبقة الدجاج والخضار و مغطى بالجبن السايح مممممم اللي تحب الوصفة فقط تكتب في عمي قوقل صينية التوست بالدجاج والخضار تلقاوها ... طبعا وصفة نالت إعجاب الجميع




وهنا تكملة القصة عاودت البريوش بعجينتي وحشوة القرفة والسكر البني وزدت معاها فلان كاراميل غبرة ومغطية بصوص نيستلي وشوكولا طبعا الطعم والريحة يا خرابي تححححفة مليح لرمضان

ومقطن من داخل


هذي كيكة البيسكويت لأم كوثر لذيذة ومختلفة وعمرتها بحشوة كيكة الشامواه جات خفيفة وباردة تهبل الرابط: https://www.djelfa.info/vb/showthread.php?t=595465


العوامة لقهوة العشية مممممم


فطيرة الجبن ومسقية بالعسل الوصفة ياكلوها الأتراك و المشارقة مع الشاي أنا كي درتها ماعجبتهمش الخلطة نتاع الجبن مع العسل لاخاطر كلاوها مع الحليب بصح جات خفيفة تهبل






أرز خليجي من مطبخي لذيذ ممممم نستنة غير وكتاش يخلاص رمضان باش نديرو : الرابط : https://www.djelfa.info/vb/showthread.php?t=1649711


هذي بطاطا محشية باللحم المفروم الوصفة لأم وليد صراحة ماعجبتناش خلاص ولوكان ماشي نعمة رانا رميناها والله ماتتكل ماجات تخلاص غير بالسيف ياكلو يومين وحنا نحتمو فيها ويعلقو خرجولي قلبي


هنا جربت وصفة حشوة جديدة وهذي أحسن حشوة بريوش رولي ذقتوها ننصحكم بيها اللي هي : سكر بني + قرفة+غبرة فلان كاراميل+ بيسكويت شاي مكسر صغير(استعملت كروستي)+جوز مكسر خشين شوية مع صوص النيستلي والشوكولا خرجت فيلم مممم والله حطة حطة

من داخل


هذي كيكة التمر بنكهة القرفة وصوص الكاراميل جات حلوة تقتل ومعسلة من داخل بزاف وشوية ثقيلة اللي يذوق يحبس هذي الوصفة من اليوتيوب




هذي بيتزا بالاونشوا غاضوني دراهمي هههههه هذي الانشوا مالحة تقتل ماقدرناش ناكلوها نحاو الأنشوا من فوق البيتزا وكلاوها وعععع


هذي تحلية البيبسي حبيت نقوللكم لوكان تلقاوها في النت بالاكو جربوها حاشى النعمة ماتتكلش وهذيك الصوص لاعلاقة مع طبقات الكريمة والبيسكوي


هذا "مانكي براد" Monkey Bread راكو تشوفو في الشكل نتاعو مهبول هههههه كيما اسمو بصح البنة مممم هو عجينة بريوش تقطعيها كرات صغار (أنا حشيتهم شوية نوتيلا) كي تحبو ماتحشيوهمش يجي يهبل وتعملو خليط سكر بني أو أبيض وقرفة (أنا زدت شوية غبرة فلان كاراميل) ونمرر الكرات في زبدة ذايبة ثم في الخليط وندهن مول الكيك مليح مليح بالزبدة (وإذا ممكن تستعملو ورق زبدة في القاعدة ) ونحط الكرات ونخليه يخمر ونطيبو عادي يجي بنين يقتل من داخل طري وخفيف ومن برا السكر مكرمل ويشكل طبقة قرمشة ممممم ريحتو تهبل فقط نصيحة ماتكثروش العجين فوق بعضاها جيكم ثقيل لازم شوية برك باش يخمر مليح ويجي خفيف




موسم الفراولة طبعا مايحلاش غير بالتارتولات الحشوة كريم ديبلومات يعني كرام باتيسيار كي تبرد نطلع فنجان شانتيي ونضرب الكريم باتيسيار مع الشانتيي بالباتوغ ونتحصل على موس نعمر بيها التارتولا جي خفيفة تهبل وخير الكرام باتيسياغ


مطلوع فريال88 درتو وحشيتو شاورما اكسبراس نتاع نينافرات

الروابط: https://www.djelfa.info/vb/showthread.php?t=1425149
https://www.djelfa.info/vb/showthread.php?t=1321426


الفرازيي لعيد ميلاد أختي وتوأم روحي جا روعة وخفيف يهبل عمرتو فراز من داخل ومن برا واستعملت كريمة بنكهة الفراز باردة اللي هي شانتيي وطلعتها بياوورت صومام ممزوج بنكهة الفراز جات تهبل تهبل




تارتولات الفراولة


المانكي براد Monkey Bread


هذا صابلي الكابريس لام أماني والتطبيق لأختي أم زكازيكو الرابط: https://www.djelfa.info/vb/showthread.php?t=1799073

هذي تحلية الموز كنت حطيتهالكم من قبل : https://www.djelfa.info/vb/showthread.php?t=1964637


ثاني تطبيق لأم وليد كيكة بابا البرتقال ماعجبتهمش في الدار أصلا في دارنا مايحبوش الكيكة المقلوبة درتها عدة كرات بالتفاح والاناناس والخوخ مايحبوهاش


هذي فطيرة الجبن والزيتون ياكلوها بزاف المشارقة كنت حاقرتها وكي جربتها لقيتها روعة مع الحساء طعم زيت الزيتون والزيتون الأسود مع الأجبان السايحة ممممممم هذي من بعد نحطلكم الوصفة رائعة


وأخيرا الوصفة المثالية للرولي رائعة لقيتها في الفايس وجربتها وجات تحفة هنا درتها بنكهة النيسكافي ممم طارو بيها




هذي تحلية بالجوز والشوكولا بنكهة النيسكافي مممممم
القاناش ذوبت شوكولا "ماروخا" مه كرام فراش على هذي جات تبان فيها مكسرات في الشوكولا الوصفة عبارة عن طبقة كيك بالكاكاو ومرشوش جوز مكسر على الوجه قبل الطياب وكي طيب نسقيها نيسكافي والطبقة الثانية شانتيي طلعتها بنيسكافي وحليب ونكهة قهوة وفي الأخير قاناش شوكولا وكرام فراش والتزيين حسب الرغبة



هذا سفنج عادي بصح جربت العفسة نتاع زوج مقلاة وعجبتني جا خفيف وفارغ من داخل وزدت رققتو مانحبوش العجين من داخل ماما كلات حتى شبعت تموت عليه




كيكة الليمون : كيكة عادية وزدتلها عصير ومبشو ليمون مممم جات حامضة تهبل


وهذي الوصفة السورية واللبنانية الشهيرة "لَحْمِة بْعَجِين" أو يسموها "صْفِيحَة" رائعة تعملو عجين مثل الخبز العربي وتحلوه رقيق ويطيب في مقلاة كي يعمل فقاقيع نحط الحشوة اللي هي لحم مفروم وبصل وطماطم وكثروا طماطم وشوية خل(يجي شوية بحماضة) ونحمروها ونحيوها انا طبقتهم وعاودت حمصتهم في المقلاة جاو يتقرمشو عاودتها عدة مرات من كثرة ماعجبتهم في الدار





من الداخل

ثالث تطبيق لأم وليد كيكة الطبقات ماعجبتهش جات صح كي مشربة من داخل بصح جات كلي شوية معجنة المهم ماعجبتهمش جات ثقيلة



هذي تارت عيد ميلاد دارتها أختي أم زكازيكو لعيد ميلاد طفل صغير




هذا معمول أم رامي مانقدرش نحط الرابط الوصفة محذوفة ولكن الطعم رائع أحسن وصفة يذوب في الفم والبنة مممممم اللي تحب نعطيها الوصفة


شاورما اكسبرس بالخبز العربي وليت نحس في روحي حالة محل درت 10 ساندويش وطارحتهم فوق البوطاجي وأخواتي يلفو في الألمنيوم ويخبيو يديو معاهم للخدمة هههههه


هذا الرولي الرهيب بنكهة الشوكولا للمرة الثانية
السر هو انو الوصفة مافيها لا زيت لا نشاء لا خميرة فقط بيض وسكر وفرينة وفاني والسر الثاني نطلع البيض مليح مليح مع السكر حتى يرجع كريمة ثقيلة وكثيفة
وهذي هي الوصفة :

3 بيضات كبار ، نص كاس سكر ، فانيلا ، قرصة ملح ، نص كاس فرينة


هذو لي باركات نتاع بسملة فرح بحشوة اللوز ( الفرانجيبان) جاو تحححفة والعجينة بنينة تقتل وتذوب في الفم ننصحكم جربوهم روعة

الرابط: https://www.djelfa.info/vb/showthread.php?t=1339243


بيتزا المقلاة هي عجينة البيتزا العادية ونحلوها رقييييقة خلاص ونطيبها في المقلاة كي تبدى دير فقاقيع نحط فوقها الصوص والتزيين ونقص خلاااص للنار سهلة وسريعة وجي كيما نتاع المحلات


وأخيرا تطبيق ناجح لأم وليد كيكة بالسميد والياووغت رائعة جربوها راهي هايلة وجي كأنها مشربة من داخل ماشي ناشفة ولكن ننصحكم راهي شوية تلصق من تحت كي عاد فيها سميد استعملو ورق الطهي ساهلة وسريعة وزيد طعمها مابين البسبوسة والجينواز


هذي "مصقعة الباذنجان" باللحم المفروم في الكوكوط سهلة وسريعة والصفة من اليوتيوب


هذي خبيزة تونس لأم وليد أيضا عجبتنا أكثر وصفة "حنان" اللي حطتها هنا في المنتدى جربتها من قبل فيها زاست ليمون وجوز هند هايلة وخفيفة تهبل


هذو فطائر السلق والتونة بالجبن في المقلاة من أروع وصفات السانويشات وساهلة وسريعة في المقلاة لذيذة تهبل من بعد نحطلكم الوصفة إجباري عليكم ههههه


بطاطا في الفرم محمرة بصوص الجبن والفلفل حسيتها ناقصتها حاجة لازمها تعديل ولكن الفكرة عجبتني جديدة وساهلة


هذي تارت بالشوكولا وموس الفراولة درتها لعيد ميلاد بنت خالتي





آآآآآ جينا للروائع ...Pain au lait صراحة والحق يقال أحسن من وصفتي للبريوش للي حطيتهالكم رائعة من كل النواحي الطعم الخفة البنة الريحة ممممم تاكلي تاكلي ماتشبعيش اللي يذوقو يطلب الوصفة حشيتو هنا زبيب وسكر بني ممم






هذا طاجين Les choux de Bruxelles الوصفة مغربية بصوص حمراء والفطر جا تحححفة خاصة أنو عائلتي تموت على الكرمب مممممممم جربوه




هذي رائعة أخرى : مقبلة "قوارب الخبز بالجبن والبطاطا والتونة " من أروع مايكون ساهلة والبنة مممم الخبز يتقرمش والجبن سايح روووعة من بعد نحطلكم الصوفة إجباري عليكم

هنا قطعتها

شوفو الجبن كيفاش سايح


هذي فوكاتشا محشية بالخضار ماما تحبها وكي عادت مريضة درتهالها باش ماتوجعهاش درتها مع حساء الجبن


وهذو Les choux de Bruxelles درتهم بصوص بيضاء بالفطر وكرات الدجاج روووعة


أروع الروائع: خبز الحليب الصيني Le pain au lai chinois من أروع وصفات البريوش يجي خفيف بزاف والبنة مممم ومحشي بجوز الهند يامامي واش بنين رووووعة من بعد نحطلكم الصوفة لازم جربوها فاهمين ؟






هذي كيكة المول العجيب درتها لعيد ميلاد بابا وحشيتها موس الليمون يمي مممم جات خفيفة تهبل والليمون يم يم يم




أختي ثاني ( أم زكازيكو) دارت لبابا تارت ماعلابالهاش باللي درت أنا يسمى درنا زوج تارت


هذي معكرونة بالاسكالوب وصوص الجبن ولاكرام فراش ولا أروع والتزيين هذوك زهور الدبشة اللي راني غارستها درات الورد


وهذي بيتزا الوردة جات بنينة وطرية جدا وخفيفة جدا تهبل درتها بعجينة Le pain au lait ونقصت فقط السكر ونحيت لافاني رووووعة خاصة مع الأجبان والذرة (ماييس)


بيتزا دوار الشمس

من داخل


وهذا كيش بالعجينة المورقة والطماطم الكرزية والزيتون الفيولي والدجاج ممممممم رائع جدا جدا مع لاكرام فراش من فوق يم يم جا خفيف كي الريشة


وهذو لي شوصون بالاسكالوب والجبن مممممممم مورقين ومنفخين روعة


وهذا مقروط المقلاة لأم اماني أنا فقط زدت في العجين لافاني و زوج مغارف حليب غبرة جا تحححفة يذوب في الفم واللي يذوقو يطلب الوصفة بارك الله فيك أم أماني
الرابط : https://www.djelfa.info/vb/showthread.php?t=1368559


طبعا هذو عامين وأنا نحوس على المول العجيب ومالقيتوش كي لقيتو وشريتو جاتني الحمى نتاعو لو كان نصيب كل يوم ندير فيه وصفة جديدة
هنا درت كيك بالكاكاو البني (مانكثرش) و الحشوة موش الشوكولا وغطيت بقاناش الشوكولا وعلى الجوانب معجون وكاوكاو محمص ايفيلي ممممم رووووعة هذا المول يخليك تنوعي وتبدعي وتخرجي كيكات روعة بأسهل طريقة وأقل التكاليف


أطباقنا الرمضانية
طاجين الحلو نتاع ماما بالشباح الصفراء ومزين بالفواكه طبعا ولا أروع


وهذي مائدة الفطور


زيتون من إعداد ماما باللحم والجاج والكفتة والفطر ههههه ضحكنا عليها قلنالها هذا لحم بالزيتون




كفتة قرنون من إعداد ماما أيضا (أنا كنت هارجة مع الاختبارات )


وهذي وصفة "نيويورك تشيز كايك" باختصار الوصفة الأصلية للتشيز كايك روعة طبعا درتو مع فواكه الغابة جابوهملي هدية : توت وتوت بري وعنب بري وفراز وحب الملوك


محلبي أم كوثر بلاكرام أونجليز يجي كيما لاموس وخفيف ومايديرش هذيك القشرة من فوق الرابط: https://www.djelfa.info/vb/showthread.php?t=1281664


موس الجوزية ساهلة ماهلة وطبعا تخلي في الجوز هههههه هبلت عليها أختي عاودناها عدة مرات طبعا تموت على الجوز وحب الملوك درات فيها حب الملوك مافهمتش لاه


ملك شايك المشماش الوصفة للأخت ليدي مليون ماحطتهاش موجودة في وصفات حراير الجلفة واللي تحب نعطيها الوصفة انا عجبني بزاف خاثر وطعم العسل وريحة الليمون ممممم يجي خاثر وبنين والناس أذواق طبعا

هذو الطوايش نديروهم كي ترقد ماما
ماتشوفهمش

احتفال انتهاء الامتحانات : ههههه درت سلطة ماسيدوان

وبيتزا بالعجين المورقة والدجاج والزيتون فيولي والجبن جات تحححفة وخفيفة تهبل
ودرت ثاني طبق هندي اسمو "chicken fire" اللي هو قطع دجاج في تتبيلة حارة يطيبو ثم تحطيهم في صينية فرن وفوقهم كمية كبيرة جين دخليه للفرن يذوب وتقدميه والجبن ساااييييح ممممم

كي تهزي الدجاج بالفرشيطة يجيوك خيوط الجبن مممم

البيتزا المورقة


هنا درت أفخاذ الدجاج المحشية بالجبن مع بطاطا كريمية وجات طبعا روووعة


هنا للفطور عملت كاساديا الأخت زينب درتها بالكيري جات هايلة ووما تبقى من العجين درت بيه لحمة بعجين ممممممممممممم جاو في زوج يم يم يم





وهذو بعثناهم ذواقة :


وهذا فطور البارح : قراتان باذنجان بصوص بولونيز وجبن في المقلاة سريع ولذيذ


وهذي ظفيرة بالعجين المورق وحشوة الصوص بولونيز (نشفتها شوية ) وزدت معاها زيتون أخضر وشرائح قرييار جات رووووعة مورقة وخفيفة وبنينة ومافيهاش العجين من داخل والسر : خليت العجين يريح بعد التشكيل+الفرن مسخن مليح+رققت العجين وهذا أهم سر

من داخل تهبل مورقة وخفيفة ورايحة نعاودها لفطور اليوم إن شاء الله :



كيما لاحظتو ماكثروش أطبتق في رمضان لاخاطر مانقدروش ناكلو علاه الفساد ... ديما مائدتنا حاجة خفيفة وظريفة ....


أتمنى تكون أطباقي عجبتكم وتقدروا تلقاو فيهم أفكار للفطور وإن شاء الله تكونو فطنتو من السبات


تحياتي لكم أنا لهلوبة البطبوطة














 


رد مع اقتباس
قديم 2017-06-10, 16:11   رقم المشاركة : 2
معلومات العضو
Radjaa
عضو مشارك
 
الصورة الرمزية Radjaa
 

 

 
إحصائية العضو










افتراضي

Wawwww ماشاء الله عليك حبيبتي الله يبارك ف دوك ليديدات...










رد مع اقتباس
قديم 2017-06-10, 16:12   رقم المشاركة : 3
معلومات العضو
أم رقية نسرين
عضو محترف
 
إحصائية العضو










افتراضي

الله يبارك ماشاء الله يسخفو
يعطيك الصحة
وربي يرحم جدك و يسكنه فسيح جناته










رد مع اقتباس
قديم 2017-06-10, 16:26   رقم المشاركة : 4
معلومات العضو
رحمة2016
عضو مميّز
 
الصورة الرمزية رحمة2016
 

 

 
إحصائية العضو










افتراضي

الهاااااام الهاااام الهاااام
بسم الله وماشاء الله تحفة
ربي يسلم هادوك اليدين
لي عودة لطلب الوصفات هنننهههههه

ربي يحفظك










رد مع اقتباس
قديم 2017-06-10, 16:45   رقم المشاركة : 5
معلومات العضو
fleur de lili
عضو فعّال
 
إحصائية العضو










افتراضي

صح رمضانك أختي الهام ربي يرحم جدك ويصبركم
بسم الله ماشألله كلش تحفة منيديك ومن الايادي ذهبية نتاع المامة ربي يحفضها
سخفتينى بغيت تعرضينى على هذوك الروائع
شكر ا والف شكر ىأستذتي










رد مع اقتباس
قديم 2017-06-10, 18:51   رقم المشاركة : 6
معلومات العضو
nabila222
عضو نشيط
 
الصورة الرمزية nabila222
 

 

 
إحصائية العضو










افتراضي

ياااااعمري اخيراااا بنتي ،والله ليك وحشة وطبعاااا اطباق تحفة كلها لازم الوصفات عن قريب ،وعلى ذكر ام وليد انا ثاني جربت بعض الوصفات مانجحوش هي راهي اخذت من عندك فكرة الكرواصو بدون عجين مورق مخمر،وثاني بطاطا سوتي وووو،نسيت يعني هي عضوة في المنتدى واخذت الوصفات وتاجرت بيهم ،ربي يهدينا هذا رايي المهم ،حبيبتي انتي معلمة وفنانة لايعلى عنك ياريت تعملينا فيديوات في اليوتوب نستفادو اكثر نورتي مرة تخرة يامحبوبة الجماهير ،










رد مع اقتباس
قديم 2017-06-10, 18:52   رقم المشاركة : 7
معلومات العضو
**وحدها غريبة **
عضو نشيط
 
إحصائية العضو










افتراضي

ماشاء الله راكي زدتي دوختي العباد هههههه والله دخت كل مانقول هذ الوصفة تحفة نلقى تحتها احلى منها الله يبارك اتقان ورقي في التقديم والتصوير وماعنديش شك في ذوقك
جزاكي الله خيرا على كل ما تقدمين بالصح المرة الجاية حطي بالشوي باش منتوهوش
احلى تقيييم واحلى دعوة خير ليك الهام صح رمضانك وفطورك وكل عايلتك واحبابك










رد مع اقتباس
قديم 2017-06-10, 23:49   رقم المشاركة : 8
معلومات العضو
مريم ريمة
عضو مشارك
 
إحصائية العضو










افتراضي

ما شاء الله رب يبارك فيك رائعة










رد مع اقتباس
قديم 2017-06-11, 00:12   رقم المشاركة : 9
معلومات العضو
حياة نور الدين
مشرفة منتدى الطبخ
 
الصورة الرمزية حياة نور الدين
 

 

 
الأوسمة
الوسام الذهبي  لقسم الأسرة و المجتمع 
إحصائية العضو










افتراضي

ماشاء الله ربي يفرحك ويعطيك ويمنيك ويرزقك وليد الحلال الي يستاهلك يارب ممكن تقوليلي برك ضفيرة العجينة الممورقة كيفاش درتيها

وربي يرحم جدك ويصبركم عليه










رد مع اقتباس
قديم 2017-06-11, 00:19   رقم المشاركة : 10
معلومات العضو
لجين1985
عضو جديد
 
إحصائية العضو










افتراضي

الله يعطيك الصحة










رد مع اقتباس
قديم 2017-06-11, 00:41   رقم المشاركة : 11
معلومات العضو
om bilel 1600
عضو جديد
 
إحصائية العضو










افتراضي

أطباق رائعة ما شاء الله من فضلك وصفة البطاطا الكريمية و شكرًا










رد مع اقتباس
قديم 2017-06-11, 09:59   رقم المشاركة : 12
معلومات العضو
nihal159
عضو محترف
 
الصورة الرمزية nihal159
 

 

 
إحصائية العضو










افتراضي

الله يبارك؛ كل شي تحفة؛ ربي يرحم جدك و يصبركم عليه










رد مع اقتباس
قديم 2017-06-11, 10:17   رقم المشاركة : 13
معلومات العضو
lwiza2000
عضو مميّز
 
الصورة الرمزية lwiza2000
 

 

 
إحصائية العضو










افتراضي

روعة روع اتحفتينا
اتمنى وصفة
Le pain au lai chinois









رد مع اقتباس
قديم 2017-06-11, 13:01   رقم المشاركة : 14
معلومات العضو
شمس الملوك
عضو مجتهـد
 
إحصائية العضو










افتراضي

ماشااء الله كلمة روعة قليلة حفضك الله ورعاك وفي ميزان حسناتك اننا نستفيد منكن كثيرا بارك الله فيك










رد مع اقتباس
قديم 2017-06-11, 15:36   رقم المشاركة : 15
معلومات العضو
omsalah
عضو مشارك
 
إحصائية العضو










افتراضي

ماشاء الله تبارك الرحمان والله تحف ياالهام الله يفرحك ويرزقك من يقدرك فعلا رائعة










رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

الساعة الآن 09:24

المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية


2006-2023 © www.djelfa.info جميع الحقوق محفوظة - الجلفة إنفو (خ. ب. س)

Powered by vBulletin .Copyright آ© 2018 vBulletin Solutions, Inc