قاطو المحقن بطريقتي الخاصة

[kakinova]

بسم الله الرحمن الرحيم


لكل من طلبت مني وصفة المحقن إليكن الوصفة و الطريقة إن شاء الله لما نعاودو رح نصورو بالتفصيل


المقادير :

كاس و نصف زيت كيلي بتاع الجوتابل
كاس سكر و اذا حبيتيه حلو اكثر ضيفي ملعقة او اثنين كبار انا نحبو وسط لانو نشربوه مع الحليب حلو
كاس حليب و هذا السر رقم واحد
4 بيضات
م كبيرة فاني
2 خميرة كيميائية
3 مغارف كبار كاكاو
5 مغارف كبار نشاء
فرينة حسب ما تتلم العجينة


التحضير

خلطي البيض مع رشة ملح قليلا ثم ضيفي الفاني و السكر و كملي خلطي مليح حتى يبياض المزيج
ضيفي الزيت و خلطي ثم ضيفي الحليب و خلطي مليح حتى يذوب السكر تماما هذا السر رقم 2 لانو لو تخليه رح يجي يتفتت و الشكل تاعو يفسد و يجي يابس و حرش فالفم
ثم ضيفي النشاء و كاس فرينة و 2 خميرة غربليهم مع بعض و حركي بالملعقة او السباتولا ثم نحي من المزيج حطيه في اناء ىخر ضيفيلو الكاكو ثم شيحي المزيجين

لازم تكون جارية و تلصق بزاف
غطيها و خليها ربع ساعة ترتاح رح تنشف قليلا

ادعني البلاطو و ادهني لابوش تاعك لازم المحقن يكون صغير و اذا كبير ضيقي سنيه تماما و اعملي كويرة بيضاء لصقي فوقها وحدة سوداء و دخليها في لابوش

لازم تعملي كويرة قد المندرين فقط حتى تجيك ساهلة لما تضغطي و اعملي أصابع فوق البلاطو

سخني الفرن على 320 درجة أعلى درجة عندك ربع ساعة ثم دخلي البلاطو في الاسفل و الفرن شاعل من فوق و تحت
رح تلاحظي بلي انتفخ و طلع و زاد حجمو بفعل الحرارة العالية رغم انو العجينة جارية هادا السر رقم 3

لما يتحمر من الاسف طلعيه للفوق يتحمر و حطي واحد ثاني فالاسفل يطهى

انا ما حمرتوش بزاف لاني استعملت فرينة لابال بيضاء بزاف

و خليه يبرد فالبلاطو لانو يكون طري و لما يبرد قليلا نحيه رح تلقايه طري و خفيييييييييييييييييف و فيه قرمشة خفيفة تاكليه بشواربك