"أنا وأخواته الثمانية"

[مشكلتي]

السلام عليكم ورحمة الله تعالى وبركاته

اولا انا طفلة عمري 25 سنة،،،نخطبت وعقدت والعرس بعد عيد الاضحى ان شاء الله،،،نهدر مع راجلي في الهاتف والحمد لله هو رجل رائع بمعنى الكلمة،،،حنين يبغيني ويخاف عليا وجميع الناس تشكر فيه وفي أخلاقو


هو صح يزعف ويتعصب بالصح قلبو حنين ويرضى من بعدها،،هو ماهوش مشكلتي المشكلة اخواته عندو 8 الله يبارك 5 متزوجات و3 مازالو،،يسكنو قريب من دارو وكل مرة يقولي راهم يجو لعندي بصفة اسبوعية تقريبا،،،يقعدو ويسهرو وكي يكونو عندو مايتفكرنيش حتى للواحدة تاع الليل وانا نرقد طبعا وغدوة من ذاك يزعف يقولي علاه رقدتي بلاماتتفكريني،،للعلم انا نبعثلو ميساج ونخبرو فيه بلي رايحة نرقد،،كي يجو خواتاتو يجو مع رجالتهم واولادهم،،،انا الحكاية بدات تقلقني خصوصا انو يخدم بعيد ويجي غير من الاسبوع للاسبوع صارحتو وقتلو هذي الحكاية تقلق كيفاه يظلو عندك،،انا مرة اخرى ما نقبلش هاذ الوضع خصوصا انا خدامة وهذوك اليومين هما لي نرتاح فيهم،،وماتطالبنيش باه نظل قدامهم ونخدم غير فيهم وفي رجالتهم،،زعف بالبزاف وحس بلي راني نشرطلو في خواتاتو،،،ومن بعد رضى،،،قعدنا حوالي 4 اشهر ما جبدناش الموضوع والبارح جبدو قالي مالتي تخافي خواتاتي قتلو ايه،،قالي رغم لي تهدري معاهم وشفتيهم قتل"العشرة"ماهيش نهار ولازوج،،هو يهدر فيهم غير بالخير قتلو مرة أخرى حتى ودارولي المشاكل انا مانجرأش نخبرك لخاطر انت داير في بالك بلي هما مايأذوش نخرج غير انا الكذابة وتاع المشاكل

للعلم هو يتيم ماتت أمو الله يرحمها وعمرو 19 سنة وثم ثم دخل يخدم بالصح دايمن يقولي هما لي رباوني،،،مافهمتش كيفاه رباوه

وزيد كاينين 2 خواتاتو هذو لي يكثرو من زيارتو هما ورجالتهم وواحد المرة قالي هذوك دايرين فيا الخير مسلفينلي دراهم،،،معناتها كي يسلفولو دراهم يظلو في دارو ياكلو ويشربو ويسرحو ويمرحو،،،وزيد مسكين ماهو مجهز والو في دارو،،،أبسط الاشياء ما عندوش،،وتصدقو كي نهدر معاهم يولو يقولولي دارك شحال شابة كي تجي تعيشي غاية حاجة ما تخصك والله نحسهم حاسديني،،يقولولي ديري اليد في اليد مع راجلك وشرو السيارة،، ويقولولي ثاني نظلو قاعدين عندك وانت تديريلنا في القهوة والقاطوياجماعة هذي هدرة بعدا؟؟نكره حياتي كي نهدر معاهم،،مرة واحدة من اخواتاتو قاتلي كي نولي نروح للجامعة فليكسيلي باه نهدر معاك،،زعما تمزح

وبزاف بزاف مواقف،،،المشكلة كي عاودنا البارح جبدنا على الموضوع قالي ماراكيش باغيتهم يجو عندي؟قتلو لالا والله انا ماقلت هكا قتلو بالصح كل اسبوع بزاف،،قالي ضروك نقولهم ماتزيدوش تجو عندي،،قالهالي بالزعاف ومن بعد قالي راني خدام تهلاي في روحك،،،ظليت نعيطلو ونقولو ماقلتش انا مايزيدوش كامل يجو بعثت 3 لي ميساج ماردليش تخيلو



قبل مانروح ليه وراهم في طريقي كي نروح ليه كيفاه

ياربي علاه انا كاش ماقلت؟؟خبروني انا مانيش انسانة مليحة؟؟
وكي قتلو هكا خسرت؟؟؟وزيد انا مارانيش نحوس على المشاكل ميش قصدي نقطعهم على خوهم،،،بالصح كل اسبوع يجو كارثة،،،كي يجي هو يجو هماحاجة تدوخ ميش المفروض يفهمو رواحهم

للعلم ابوه وزوجه ابوه واولادهم عايشين معاه في دارو حتى يبنو ويخرجو،،وينتا؟؟الله اعلم


والله مانبغي نهدر معاهم مانبغيش ندصرهم وندخلهم فيا،،بالصح هو يبغيني نهدر معاهم ويفرح كي نقولو نهدر معاهم بالصح هدرتهم تضر في القلب،،صدقوني حتى كي يكون في الخدمة ماهوش هو كي يولي لدارهم،،ثما انسان آخر وكي يولي هنا يرجع يفكر كيما هما

خبروني راني غاطلة كي نطالب مايجونيش كل اسبوع؟؟؟راني غالطة كي نقولو كل واحد يعرف حدو ويخلي روحو مليح؟؟؟وهما للعلم سكنهم مستقل مع رجالتهم وعمري ماقالي يجوهم اخوات رجالتهم ويظلو عندهم

علاه انا محتوم عليا؟؟

هذا ظلم ياجماعة مارانيش غالطة


ربي يفرج على كل واحد،،،ودعولي ربي يرضي عليا زوجي ونكون ليه نعم الزوجة



رجاء:عنونوا لي موضوعي"أنا وأخواته الثمانية"
وان فضلتم عليا فأتمنى ان تضعو نسخة في قسم مشكلتي ونسخة في قسم دردشة البنات

لكم خالص الشكر والامتنان

[زبدة ذايبة]

راكي غالطة من راسك لساسك

كيفاش تهدري معاه على موضوع مازل حتى ماصراش

أولا

انت راكي معاه غير بالتيليفون ومازال مارحتيش لعندو

ثانيا خواتاتو اللي راهم خالعينك ماتعرفيهمش

ممكن خوهم عزيز عليهم وزيد راهو عازب

وبعد الزواج أكيد رايحين يبتبدلو على خاطر الدار ولا فيها أمرأة واللي هي انت

غلطتك انت هي :

سبقت الشر قبل الخير وبديتي تحطي في قوانين خلاتو يعاود التفكير في الزواج منك من الأساس

من المفروض عرفت بلي وخواتاتو عزاز عليه ماتدوريش بيهم

بديتي تحوسي على راحتك قبل من راحة زوجك

وكيما نقولو بالعامية كي يزيد نسميوه بوزيد

انت سميتيه ودرتي المشااكل وضرك وليتي تعيطي

كي تروحي لعندو وتولي مولات الدار

هذاك النهار كي يديرو خواتاتو تصرفات ماراهيش مقبولة تقدري راسك لراسهم تهدري وبالاك وحدهم يحشمو ماسيمطوش عليك

مبصح انت كيما يقولو المصريين " ضربني وبكا وسبقني واشتكى"

ان شاء الله راكي فهمتي وين راكي غالطة

رضي زوجك وقوليلو مانزيدش نعاود رضايتك عندي بالدنيا

ربي يهديك درتيها كبيرة

[SKYALGERIA]

أولا أريد أن أنبهك بأن خطيبك و أخواته يتامى و ينقصهم حنان الأم المتوفية و هم متحابين دائما لهذا تجديهم مجتمعين دائما عند أخيهم العازب ليتم لم شمل العائلة . خطيبك شهم يريد أن يحافظ على صلة الرحم و على المحبة و المودة بينه و بين أخواته و لو لم يكن شهما لما إجتعمت عنده أخواته و نفرن منه . سلام

[وجدان الخواطر~]

[size="5"]السلام عليكم أختي ~
أكيــد لي راكي تخممي فيه يجي في بال أي طفلة في بلاصتك ، بصح راكي غلطتي كي هدرتي في هذا الموضوع قبل أوانوا ماكيش عارفة لظروف بلاك كي تتزوجو ينقصوا لمجي لخاطر خوهم تزوج و هوما مزوجين و عارفين الظروف نورمالمو ... و زيد احمدي ربي راهم متحابين خير ما يعود كل واحد في جهة، وهذا أكيد راح يكون لصالح أولادك و تربيتهم..[/size]

[الصديق قروف]

بارك الله فيكم اخوتي انا مع ارائكم
واذا حدث ماتتوقعي بادريهم بزيارة قبلهم في كل مرة حتى يفهمو
‏ ووصفك لتصرف الاخوته شيئ ايجابي له تقبليهم فقط

[NIGHTINGALE]

سمعت مرة أحد الأئمة العارفين بالدين يقول بأن المربي رتبته كرتبة الأبوين عند الله سبحانه وتعالى
وأنه يجب لهم ما يجب تجاه الوالدين من الحقوق التي نص عليها القرآن الكريم
لذلك فإن زوجك لديه دين ثقيل تجاه أخواته إذا كن تكفلن به ولعبن دور الأم في حياته
فلا تحاولي أن تثنيه عن برهن وإكرام ضيافتهن فحقهن عليه أكبر من حقك عليه

[* الحلم سكر *]

نعاود نقولها ربي يبعد على خاوتنا الذكور الزوجات اللي يبعدوهم علينا
و نقلك كلمة اليتامى يعوضو حنان الوالدين في قربهم لبعض و الزوجة اللي دون قلب راح يكون هدفها تفرق و الذكية تكسبهم و تكسبو

يا بنت الناس بالاك هما وحدهم بعد الزواج يفهمو رواحهم و يجبدو رواحهم ماشي كيما درك راه عازب + انتي سبقتي الشر و ربحتي العيب مع خطيبك برك

انتي بانلك نهار كان 19 سنة قالك رباوني جاتك صعيبة ياو هذا اصعب عمر كان الاولى تسأليه سر التقرب من بعضاهم و تكوني اذكى و احن و تكون طرف للعايلة ماشي تفقيهم قبل حتى ما توصلي

عموما ربي يهديك و اسفة على صراحتي لكن ما نتماناش لخاوتي زوجة تخمم نفس تخمامك

[ام رضوان]

السلام عليكم ورحمة الله

اختى انا نقلك رايي بصراحة وما تغضبيش والله راكي عميتيها كيفاش تقوليلو ما يجيوش خواتاتك وانت مازالك ما دخلتيش لعندو
هاذي انانية ولا واش راهم خواتاتو وحاس بخيرهم عليه علاه رايحة تفسدي العلاقة بسوء تصرفك
وكي تقولي فاه رباوه لاه كي ماتت امه الله يرحمها انت لي قمتى بيه ووجدتيه وقلبتيه راجل؟
بالاك ماكانش محتاج غسيل واطعام الخ ولكن وقفو مع اخوهم وخاصة في هاذا ك الوقت مع سن المراهقة كان قادر يخرج الطريق
يا اختى العني الشيطان ورضى زوجك واكسبي خواتاتو لصفك والله والله غير يحطك في عينيه
.ربي يدوم المحبة ويحنن لقلوب علي بعضاها.
بصح مانلومكش بالاك مازلتي ماعرفتيش الدنيا مليح راكي في بداية المشكلة قلتى انا طفلة !!!!!!
وكيما قالت الاخت ربي يبعد على خاوتى ووليداتى الزوجات اللى يبعدوهم على خياتهم،
واتقي الله كون تبعديه عليهم وتقولك واحدة منهن حسبي الله ونعمة الوكيل واش رايحة تستفادى
سامحينى اختي لاكان قسيت في ردي عليك
راهو لمثل يقول
اخذ راي اللى يبكيك ما تاخذش راي اللى يضحكك. سلام

[الحزين المبتسم]

وعليكم السلام

أختي الفاضلة

أراك فتحت هذا الموضوع قبل أوانه .. صحيح أن الزيارات لها آداب لكن الحكم في هذا الوقت كما أشار الاخوة والأخوات حكم مبكر

أيضا لا تجعلين هذا الأمر أكبر همك مادام زوجك له أخلاق طيبة ومن خلال ما ذكرت في زوجك من احترامه لأخواته وعرفانه بجميلهن فلا شك أن هذا الفعل يكون من رجل كريم فإن أحسنت معه نلت الخير ان شاء الله

الحرص على علاقتك الودية وحسن التعامل مع أخوات زوجك مهم أختي

ربي يصلح حالك وجميع احوال المؤمنين

[عين الصقر]

انت المخطئة. تقولين والده وزوجته وأولادهما عايشين معاه في بيته حتى يكملو البناء
يعني من الطبيعي ان تأتي اخوته الى بيته. فربما يأتون لزيارة والدهم وليس اخيهم بالخصوص
مادامو عائلة متلاحمة فلا تعتبريهم غرباء
اصبحت جزء منهم وعليك ان تتكيفي مع الحياة الجديدة وحطي مكانك في مكان زوجك من الصعب تقولي لأختك ماجيش عندي

[روح مراد]

السلام عليكم
أختي العزيزة راكي تكسري راسك باطل في باطل و تغلطي قبل الأوان
أولا السيد نهار خطبك كنتي تعرفي أنه عندو أب و زوجة أب و 8 أخوات هاذي وحدة
ثانيا بما أنه الأب عايش في هاذيك الدار البنات يجو عند باباهم واحد ما يمنعهم
3. نهار تكوني في موقف كيما موقف أخوات زوجك تفهمي الوضع كيفاش تخلي خوك عازب لمرت باباك تغسلو و طيبلو أصلا اللي عايش وحده أحسن من هاذاك اللي عايش مع مرت باباه
4. راني نشوف أنتي اللي داصرتيهم و مازال مالحقتي ليهم
راكي تهدري و تزيدي في الهاتف قبل الوقت
5. المهم من كل هذا لوكان سكتتي و ما جبدتيش الموضوع بعد الزواج رايح يكون في صفك نهار تقولي عييتي من الزيارات و ماراكيش مرتاحو على خاطر يشوفك صح تتعبي
و لكن ضرك مهما درتي و خدمتي ديما الفكرة أنك رافضة أخواته سبقتيها لراسو
حاولي تنساي الموضوع أصلا و ماتزيدي تجبدي عليهم ما تزيدي تكثري الهدرة معاهم حتى بعد الزواج

[fati 47]

اختي انت صريحة مثلي و هذا يجيب غير العيب مع الناس
حسيت انو نيتك من كلامك مش خايبة
لانو كاين بنات يلعبوها راضيين باوضاع ماتعجبهمش قبل الزواج و كي يتزوجو
يبدلوها بكل سهولة
قبل الزواج تقلوا والديك هم والديا و خواتاتك راهم خواتاتي و كي تتزوجو تشوقهم في شوفتو في العام يشوفوه مرة
لكن ماعرفتيش تختاري الوقت و الطريقة
ربي يهنيك و يرضي زوجك عليك

[seridz]

يا اختي هاذي فرصة لا تعوض لانك راح تكوني سبب لتقوية صلة الرحم علاه راكي حابة ضيعيها كاين عائلات راهم يتمناو مثل هذا اللمات من كثر الاختلافات و الشقاق و هذا الامور ملزمش الانسان يكون فيها اناني راني متفهم بلي خدامة و تتعبي لكن نورمال كي يجي وقتك قوليلهم اسمحولي انا نروح نرتاح شوية غدوة نخدم و صلى على النبي و هو يبقى مع خواتتاته ما فيها والو مراهمش غادين يقولولك اقعدي بالسيف بالعكس راح يتفهمو اختي انتي سبقتي الاحداث و غلطتي و كلنا نغلطو حاولي تصححي هذا الامر و ما فيها والو اذا طلتي منو السماح راح تكبري في عين راجلك و ترجع الامور افضل من قبل و الله يتاوي عشرتكم

[sarl02]

المشاركة الأصلية كتبت بواسطة زبدة ذايبة

راكي غالطة من راسك لساسك

كيفاش تهدري معاه على موضوع مازل حتى ماصراش

أولا

انت راكي معاه غير بالتيليفون ومازال مارحتيش لعندو

ثانيا خواتاتو اللي راهم خالعينك ماتعرفيهمش

ممكن خوهم عزيز عليهم وزيد راهو عازب

وبعد الزواج أكيد رايحين يبتبدلو على خاطر الدار ولا فيها أمرأة واللي هي انت

غلطتك انت هي :

سبقت الشر قبل الخير وبديتي تحطي في قوانين خلاتو يعاود التفكير في الزواج منك من الأساس

من المفروض عرفت بلي وخواتاتو عزاز عليه ماتدوريش بيهم

بديتي تحوسي على راحتك قبل من راحة زوجك

وكيما نقولو بالعامية كي يزيد نسميوه بوزيد

انت سميتيه ودرتي المشااكل وضرك وليتي تعيطي

كي تروحي لعندو وتولي مولات الدار

هذاك النهار كي يديرو خواتاتو تصرفات ماراهيش مقبولة تقدري راسك لراسهم تهدري وبالاك وحدهم يحشمو ماسيمطوش عليك

مبصح انت كيما يقولو المصريين " ضربني وبكا وسبقني واشتكى"

ان شاء الله راكي فهمتي وين راكي غالطة

رضي زوجك وقوليلو مانزيدش نعاود رضايتك عندي بالدنيا

ربي يهديك درتيها كبيرة

نعم الكلام استاذة ونقطة الى السطر.

[ايناس ايناس]

السلام عليكم يااختي صبري حتی بعد الزواج وشوفي واش يصرا بلاك يتبدل كلش سبحان مغير الاحوال.. وزيد كيما انت تحبي اهلك وماتكرهيش منهم كامل هو ثاني يحب اهلو ومايحبش الهدره فيهم ويحسك حابة تبعديه عليهم وحتی لو كان مع حق بصح مايجيش معاك علی حساب اهلو. يحاول يرضيك بلا ما ينقص من قيمتهم. .انت حاولي ترضيه وخليها علی ربي