السلام عليكم
هدا اول موضوع ليا في هدا القسم انا دايمن نستفاد من الوصفات الي تحطوها
بارك الله فيكم كامل و ربي يعطيكم ما تتمناو
حبيت نشاركم اليوم في هادي الوصفة اللي هي ناجحة 100 ب 100 و ساهلة و متكلفش
منطولش عليكم
وصفة
المادلين:
- 2 بيضات كاملين
- قشور القارص ولا البرتقال ) zeste (
- قرصة ملح صغيييرة
- نصف كيس خميرة كيميائية ) انا نستعمل نوارة نوراة ......(
- 100 g فرينة ) انا معنديش ميزان ندير 7 مغارف كبار و ماششششش معمريييين(
-100 g سكر عادي ) ندير 5 مغارف كبار و معمرررين (
-100 g زبدة ) انا نستعمل ستار (
الطريقة :
في اناء تحطي البيض و قرصة الملح و قشور القارص و السكر و اتحركيهم مليح باستعمال الباطور
و نبعد اضيفيلهم الفرينة مع الخميرة على مصفات و بالشوية يعني تحطي كمية و تحركيهم و منبعد تزيدي و تحركي و هكا حتى تكمليهم
و نبعد اضيفي الزبدة الي تكوني دوبتيها و خليتيها تبرد وهي تاني اضيفيها بالشوية و تحركي حتي تكمليها
تتركي الخليط بعدما تغطيه بساشى في مكان دافئ ماشي بزاف لمدة ساعة كااااااملة
راح تطلع بصح ماشي بزاف
في هدا الوقت تكوني شعلتي الفووور على درجة 200 و تخليه لازم يكون سخون مليح من قبل
هدا هو السر الاول الفور لازم يكون سخون
تجيبي قوالب ورقية خاصين بالمادلين راهم يتباعو و تحركي الخليط في الاناء و بواسة مغرف تحطي كمية في القالب
متعمرييييهش يعني حطي فيه تحت النصف لانو كي يطيب راح يطلع
و تحطيه في الفرن لمدة 10 دقائق و لكان ما طابلكش زيدي حتى 5 دقائق اخريين
لازم يطييييب
و هو يطيب جامي تفتحي عليه و هدا هو السر الثاني
نتمنى تجربوه و اتردولي لخبر
راني شرحتلكم من كل قلبي نتمنى يعجبكم