حنا في الشرق على العموم نديرو الطمينة نتاع القمح كي تكون شايحة نسميوها رويــنة و كي نخدموها بالزبدة و العسل نسميوها زريـر و كاين اللي يسميها بسيـسة
نديرو قمح منقي و محمص و نزيدولو حمص نحمصوه في الفور, كاين اللي يحب يزيدلها جلجلانية محمصةو نرحيوها . بالنسبة للتحضير نذوبو زبدة و عسل و نزيدولهم الروينة حتى نتحصلو على طمينة. هاذي نحطوها للضياف كي يجيو يباركو للنافس.
بالنسبة للنافس نحطو نفس المكونات و نزيدولهم اضافات باش يكون الزرير اللي تاكلو هي مغذي اكثر و مدر للحليب : نزيدو مكسرات مرحية, و تمر يابس مرحي, و عوض العسيلة و المارغرين نخدمهولها بالزبدة الحرة و العسل الحر.
ملاحظة : تحكيلي امي انو زمان كانو الحجاج يديو معاهم الروينة للحج و كي يجوعو يخلطولها شوية سكر و ماء , تعطيهم القوة و السعرات الحرارية اللازمة و في نفس الوقت مغذية.
بالنسبة للناس اللي يعانيو من الانيميا او فقر الدم ( و هاذي طريقة مجربة و فعالة), يحضرو الروينة و يزيدولها لكل 1 كغ قمح , 1 كغ عدس محمص و مرحي. اللي يحب ياكلها على شكل طمينة, و اللي يحب يخلطها مع الياوورت.