غريبية جوز الهند بنكهة الليمون بسيطة ورائعة

ام رويدة · 2015-04-04, 12:23

سلاااام

جبتلكم وصفة تاع غريبية بالنوادكوكو او جوز الهند سهلة التحضير ورائعة في الاعيد او المناسبات مع القهوة او الشاي

المقادير

2بيض
كاس سكر عادي
مغرفة كبيرة ذايبة وباردة
1/2 باكي خميرة الحلوى
قشور ليمونتين
حوالي 230 غ جوز الهند مطحون قليلا يعني كون يتطحن بزاااف ما تتشققش

نضرب البيض مع السكر مليييح وممبعد نضيف الزبدة الدايبة ونستمر في التحريك

ثم الزاست والخميرة وفي الاخير جوز الهند نتحصل على خليط طري وشاد روحو

نشكل كويرات ونرمدهم في السكر الرطب ونحطهم في سنيوة مفروشة بورق الشمع

ونطيبهم في فرن مسخن مسبقا على نار قلييييلة

وهااااهي في صحن التقديم...ممم ورائحة الليمون

وهادوك الملونين نحيت شوية من الخليط وودت لجزء عطر الفراولة وجزء عطر الكراميل وجربتهم رووووعة
تقدرو مام ضيفو كاكاو

وفي الاخير..نتمنى تنال اعجابكم وتفرحوني بردودكم ودعواتكم الجميلة

والسلام عليكم

إلهام07 · 2015-04-04, 12:54

يعطيك الصحة اختي سخفتيني نحاول نجربها اذا لقيت وقت في دارنا يحبو الغريبية ويحبو جوز الهند اعتقد رايحة تعجبهم
مشكورة اختي فقط من فضلك حاولي ديما تصغري الصور باش يسهل علينا تصفح المواضيع

أم ياسين الزهراء · 2015-04-04, 12:57

نحبك ونحب مواضيعك بصح الصور كثر مني حاولي تصغيريهم راني خليت الصفحة مفتوحة منا لعشية باش تبان ورشيت ولادي يخلوها مفتوحة ههههههههههههههه

كينشوف الوصفة نردلك

أم ياسين الزهراء · 2015-04-04, 13:01

واخيرا ضهرو الصور اممممممممممممممممممم روووووووووووووووووووووووعة نموت على جوز الهند مع القارص هايلة الوصفة الله يبارك فيك امممممممممممممممممممم

ام رويدة · 2015-04-04, 13:14

اقتباس:

المشاركة الأصلية كتبت بواسطة إلهام07

يعطيك الصحة اختي سخفتيني نحاول نجربها اذا لقيت وقت في دارنا يحبو الغريبية ويحبو جوز الهند اعتقد رايحة تعجبهم
مشكورة اختي فقط من فضلك حاولي ديما تصغري الصور باش يسهل علينا تصفح المواضيع

شكرا على مرورك الهاام ...ان شاء الله تجربيها وتعجبهم ..ساااهلة وما تديش كاامل الوقت
بالنسبة للصور انا نصور بالتابلات ونبعث للميكرو ومبعد نحملهم ..ححاولت نصغرهم بطريقة ام رامي بصح ما قدرتش يخرجلي كلي راهم مصغرين ماعرفتش المشكل
وزيد انا يخرجولي عادي يعني مايطولوش بزاف وما شيش بسرعة كما صور الاخوات

ام رويدة · 2015-04-04, 13:19

اقتباس:

المشاركة الأصلية كتبت بواسطة أم ياسين الزهراء

نحبك ونحب مواضيعك بصح الصور كثر مني حاولي تصغيريهم راني خليت الصفحة مفتوحة منا لعشية باش تبان ورشيت ولادي يخلوها مفتوحة ههههههههههههههه

كينشوف الوصفة نردلك

ههه..والله غير ضحكتيني يادرا باش رشيتيهم ويادرا الحجم تاعك شحال

راني رديت على الهام ننفس المشكل طرحتهولي
المهم كي شفتيها اخيييرا..ان اء الله تجربيها وتعجبك

jana ns · 2015-04-04, 13:28

يعطيك الصحة هايلة

أم تغاريد · 2015-04-04, 13:37

شكلا شابة وذوقا لا اشك
سلمت اناملك
ربي يجازيك خير ان شاء الله نسييها

natacabell · 2015-04-04, 13:56

يعطيك الصحة نحب الحلويات تع النوادكوكو جاتك شغل حلوة المشقوق هايلا بارك الله فيك

ام رشدى · 2015-04-04, 15:05

ام ويداا نشكرك بزاف على مواضيعك ولاكن الصور ماحبوش يضهرولي
شكرا عزيزتي وصفاتك نديرهم وعينيا مغمضين

idron0 · 2015-04-04, 15:13

الله يبارك 44444444444444 يعطيك الصحة

ام كوكو · 2015-04-04, 15:47

يعطيك الصحة ام رويدة هذي الحلوى نعرفها مليييح عن ظهر قلب و نعملها بالالوان و القلب يجي معسل روعة كامل يحبوها الله يسلمك اختي على وصفاتك الجميلة و ال حابة تعملها غير بسم الله تخرج هايلة

faryal zahira · 2015-04-04, 16:15

يعطيك الصحة هايلة

lamia61 · 2015-04-04, 16:30

رائعة جزاك الله خيرا

lyzzabel · 2015-04-04, 17:15

يا سلااااام يا ام رويدة تهبببللل راني غير بشوية نفحال كيما فحلاات الجلفة وكلوني الحار ثم الحامض و دروك نتيا غادي توكليني النواد كوكو ممممممم عجبتني يعطيك اللللف عاااافية يا الحبيبة ،، و احلى تقيييييم لعيوووونك

اما بالنسبة للصور تيليشارجي ابليكاسيون pixlr تلقيها في play store لاكان التابلات تاعك samsung ،، و ادا عندك ايبااد تلقيها في app store
اكليكي على الصورة لي بغيتي تصغريها و من بعد على enregistrer يخرجولك عدة اطارات نتيا اكليكي على redimensionner و خيري الحجم الاول petite ,, و من بعد روحي للميكرو و دخلي الصورة لي صغرتيها و كملي كيما موالفة ،، نتمنى تكوني فهمتيني و اي حاجة قوليلي