وصفة لي كورني صالي من مطبخي

safioo · 2012-07-31, 13:04

السلام عليكم ورحمة الله وبركاته

لبارح درت دي كورني صالي وثاني شوصون وقلت نجيبلكم الوصفة وتشوفوا كيش خرجولي

** الوصفة :
3 كؤوس كبار فرينة - كاس قهوة صغير زيت - ملعقة ونصف ملح - ملعقة صغيرة سكر - ملعقة صغيرة خميرة - ماء دافىء للعجن ( تقريبا درت فنجان صغير نتاع الماء )

** الطريقة :
أولا نلم العجينة قد ما تكون طرية
ومن بعد نحطوها تخمر مليح
ولما خمرت نرفدوا نصف العجينة ونفردوها فوق الطاولة ونرقوها مليح باه كي تطيب تجي مقرمشة
فردي العجينة طولا ونفطعوا شرائط عرضها واحد 1سم
ومن بعد نجيبوا الكورني نتاعنا نتاع الحديد وندهنوه شويا بالزبدة ونلفوا عليه العجينة حتى يتكون الكورني
ملاحظة :
كي تشكلي الكورني ما تطلعيش العجينة حتى لفوق باه كي تطيب تعصري على راس الكورني نتاع الحديد يزول خفيف من العجينة.
وكي نشكلوهم كامل ندهنوهم بصفار بيضة كفاتني ل 12 كورني
وندخلوهم للفور يطيبوا حتى يتحمروا نصف تحمار

من جهة أخرى درت الكفته وطيبتها مليح مع البصل والزيت والفلفلة كحلا
وبعدين خرجت ليكورني وحشيتهم باللحم وعاود رديتهم للفور يطيبوا ويتحمروا مليح

وهكذا خرجولي
[IMG][/IMG]

وبقاتلي نصف العجين درت بيهم لي شوصون وعمرتهم حتى هما بالللحم المرحي ووحدين بالفرماج وخرجولي 8 قطع
وهذا شكلهم
[IMG][/IMG]

نتمنى نكون فدتكم
واذا أي استفسار راني هنا
صحا رمضانكم

سنوم 33 · 2012-07-31, 14:06

مشكورة اختي صافيو....جاوك حطا
مافهمتش حاجة
انت دريهم شرائط..تهزي شريط وتغلفي بيه الكورني ...بصح كدوري العجينة تحطيها فوق بعضاها...يعني الحاشية تاع الدورة الثانية تحطيها فوق الحاشية تاع الدورة الاولى....وتلصقيها بيدك...ولا تخليها هكاك..ع خاطر راني نشوف بلي جاوك وحدة فوق وحدة
فهميني كان وصلاتك الفكرة......ع خاطر ما عرفتش نوصلك

sarra5 · 2012-07-31, 15:25

jawek raw3a

bsahatkom

safioo · 2012-07-31, 17:20

اقتباس:

المشاركة الأصلية كتبت بواسطة سنوم 33

مشكورة اختي صافيو....جاوك حطا
مافهمتش حاجة
انت دريهم شرائط..تهزي شريط وتغلفي بيه الكورني ...بصح كدوري العجينة تحطيها فوق بعضاها...يعني الحاشية تاع الدورة الثانية تحطيها فوق الحاشية تاع الدورة الاولى....وتلصقيها بيدك...ولا تخليها هكاك..ع خاطر راني نشوف بلي جاوك وحدة فوق وحدة
فهميني كان وصلاتك الفكرة......ع خاطر ما عرفتش نوصلك

شوفي أختي هذا الكورني نتاع الحديد ألي نخدموا بيه
[IMG][/IMG]
نبداو بالشريط الأول من العجينة من التحت ندوروه وبعدين نبقا نلفوا بحيث تجي الجهة العليا من اللفة الثانية فوق الجهة السفلى من اللفة الأولى أنتي غير لفي في الطرف وما تزيريش بيدك على الطرف باه يلصقوا لاهاذا قصدك باسكو يجيو فوق بعضاهم وكي يطيبوا رواحهم يلصقوا
وكي تبقاي تلفي ما توصليش حتى لفوق باه تقدي تزيري على فم الكورني باه يتنحى من العجينة بسهولة بلا ما تتكسر
نتمنى نكون فدتك المرة الجاية كي نخدمهم نصور كل الخطوات باه هكذا تشوفي مليح
تفطري بالصحة