شخشوخة المعارك لعيون فاطمة ع

almazalina22 · 2014-01-25, 22:55

السلام عليكم
نظرا لطلب الاخت فاطمة ع حبيت نقدم هذ الوصفة من مطبخي
شخشوخة المعارك نديروها في المناسبات وللنافسة باش ترفد روحها وتديرلها الحليب عجوزة خخخخخ
نبداو
المرق
دجاج ولحم تجي بنينة كثر حسب افراد الاسرة
ملح+فلفل اسود+زيت +فلفل عكري +فلفل عكري حار +راس الحانوت او الفاح+ثوم مكرفج +حمص +قرعة بصل مكرفج رقيق باش ما تصفيش المرق والصور توضح المراحل

نقلي مليح مليح

نزيد الحمص ونمرق بماء ساخن باش تبقى البنة ونغلق ونخلي يطيب

العجينة
2كيلة سميد +1كيلة فرينة +ملح +نسيحوهم مليح والملح معاهم باش ما يقطعش العجينة كي نكونو نحلو فيه او نذوبوه في الماء

نشمخها عادي وندلكها مليح ونغطيها بكيس ونخليها ترتاح

ممكن نستعمل الكيس المبلل للاخت الوهرانية عمليو روعة
هنا اللحم والدجاج طاب زدت القرعة ممممممممم وكي تطيب شوية القرعة نذق على الملح وممكن نزيد شوية ماء وطماطم مصبرة نسيتها اسمحولي ما صورتش

هنا ارتاحت ونقطع كورات ونغطيهم ونزيد نخليهم يرتاحو حتى نوجد الطاجين على النار يسخن والزيت باش نحلو العجين نخليكم مع الصور

تحبي تطيبي بالوحدة او كيما هكا حنا نقولو المردف يعني وحدة على وحدة كي تقلبيها تزيدي الاخرى عليها وبسرعة تكملي وكي تثقال نحيها وعاودي من جديد حتى تكملي

ومن بعد ارفديها من النصف باش الحواشي يطيبو ما يبقاوش عجين

نخليه يبرد شوية ونفتتو حسب الرغبة ونخلي دائما المعارك يبردو والمرق ساخن باش ما يعجنش انا هكا ما يعجنش واذا خفتو يعجنلكم حطوه في الفرن يسخن يتقرمش شوية مع شووووووية سمن

واللي تحب تحتفظ بيه ما طيبوش في نهارو تحطو في ساشيات وفي المجمد وكي تسحق تدير المرق برك وتخليه يطرى وحدو يعني ما تفوريهش لانو يعجن

في الصحن نحط شوية ونسقي المرق ونزيد نعمر المعارك ونسقي ونزين كيما نحب انا درتو غدانا عادي يعني ماش مناسبة ما تحفتوش مليح

بالصحة عليكم
السلام عليكم ورحمة الله دمتم في رعاية الله ودعوة خير تكفي .

ام طيري الجنة · 2014-01-25, 22:58

امممممممممممممممممم يعطيييييييييييييك الصحة يا فحلة مع انها ماشي لعيوني
ربي يفرحك و يوفِّيلك ما تتمناي

أم إناس · 2014-01-26, 01:00

المازة حنونة تسلم الأيادي امممممممممم هذي الساعة راني غير امممممممممممم
ياتيك الصحه وامممممممممواح

أم ياسين الزهراء · 2014-01-26, 09:03

امممممممممممممم ابعثيلي طبسي معمر راهي تسخف امممممممممممممممم يعطيك الصحة

oum ibrahim · 2014-01-26, 10:26

يعطيك الصحة المازة تشهي

ام ساجد · 2014-01-26, 13:14

يعطيك الصحة 444444444444444

ام اريام · 2014-01-26, 13:20

يعطيك الصحة اختي حنا نسميوها المفرمسة بصح ما نعملوش القرعة نحطو حبة بطاطا باش تخثر المرقة والعجينة نعجنوها مليح ونزيدولها الماء حتى تعود تترطق.

oum anas 69 · 2014-01-26, 13:27

يشهي يعطيك الصحة حبيبتي

natacabell · 2014-01-26, 13:50

يعطيك الصحة مممم تشهي انا كنت نعجنها حتىتولي تترتق وحدها و طريقة كيفكيف انا نحبها ب اللفت جي روعة و مزية الوهرانية صابتلنا الحرفة تع الكيس المبلل الله يعطيها الصحة و شكرا لكي

امونة الشاوية · 2014-01-26, 14:15

يعطييييبك الصحة وربي يدومها نعمة

ome yacer · 2014-01-26, 14:24

عجبتني بزاف بزاف

sidali 2007 · 2014-01-26, 14:47

يعطيك الصحة المازة تشهي

mistral288 · 2014-01-26, 15:31

اممممممممممممممممم يعطيك الصحة احنا في الشرقنسميوها الفطير او النعمة نطيبوها بنفس الطريقة فقط الاختلاف انو نفوروها قبل ما نسربيوها امممممممممم تجي بنينة وما تعجنش

scorpionoir · 2014-01-26, 19:05

امممممممممممممممممممم الشخشوخة
نتوما تسميوه المردف وحنا جماعة الشرق البرنوس ههههههه

sousourose · 2014-01-27, 11:17

ya3tik saha ya khti hadi chakhchoukha biskriya basah khasatha lbatata wlokht li galt ndirou left chakhchoukha jamais yjiha laft yatbadal le gout nta3ha walah sakhaftini ya khti ana rani hamla wb3ida 3la darna bach ydirouhali inchlh klitouha bessaha