السلام عليكم اخوتي
حبيت نحكيلكم على تجربتي مع المقابلة الشفهية يوم 16/03/2015 pour les tss
وصلت الصباح على 07.55 امام مدخل sonatrach CRD ببومرداس دخلونا les agents عند الباب ، ممبعد جا واحد بلاليست و بدا يعيط علينا بالواحد ، الي يعيطلو يجيب لا كارت ناتيونال و يدخل الى poste-police يحط لاكارت و يعطولو badge باش يجوز بيه على les portes tourniquet tripode ممبعد تبعو l’agent لوحد l’amphi تلقاو les evaluateurs لي حيديرولكم l’entretien يعطوكم formulaire تعمروه ، فيه المعلومات الشخصية تاعك و تع الوالدين ، سنوات الدراسة من الابتدائي للجامعة ، الشهادات و الديبلومات المحصل عليها لي ستاج اذا درت ، thème du mémoire ، الاماكن لي خدمت فيها اذا كنت خدمت و علاه حبست منها اذا حبست ، علاه راك حاب تخدم في سوناطراك، واش م fonction راك حاب تخدم فيها، وين حاب تخدم في الشمال ولا الجنوب ولا فيزوج، شحال حاب تخلص، ممبعد يقسموكم و كل جماعة تروح مع evaluateur تريحو فصال داتونت و يعيطولكم بالواحد ، تدخل للبيرو باش ديرو test psychotechnique كيما يسموه هوما.
كاين اختلاف بين les evaluateurs ، و بصفة عامة يسالك على واش درت في lformulaire يقلك انا منعرفكش عرفني بنفسك ، بالدارجة عادي، شوي عربية شوي فرنسية ، تحب بالفرنسية نتا حر ، يسقسيك على التخصص تاعك في الجامعة، يقلك علاه درت هذا التخصص ، كنت حاب دير هذا التخصص قبل ما تدخل للجامعة ولا قبل ولا فرضوه عليك مثلا الخ.. باش يشوفك اذا تخطط للمستقبل ولا غير تبع برك، اذا درت لي ستاج يسقسيك عليهم اذا مدرتش يقلك علاه مدرتش، يسقسيك على الخدمة واش راك تخدم درك واش دير الخ....، يسقسيك على l’informatique وش تعرف ولا لا، اذا كان عندك ماستر يقلك علاه مدرتش مع لي انجينيور ، تقلو مثلا ملقيتش تخصص، و يقلك اذا خيرناك رح تخدم ts مشي ingenieur ، يسقسيك على ورقة العسكر اذا معندكش يقلك اذا خيرناك لازم جيب ورقة، سورسي او اعفاء، بلا ورقة ما جوزش. و في الاخير يقلك شكرا تقدر تروح.
سقسيت على النتيجة ونتا تخرج ، قالك ممكن افريل ممكن ماي ممكن ممبعد ، على حساب الملفات الخ... المهم ماهيش باينة.
في الاخير نتمنا منكونش طولت عليكم ، ان شاء الله تستفادو من المعلوات هذي و توجدو مليح lentretien ، بالتوفيق للجميع، ماتنساوناش بالدعاء .
و السلام عليكم