بااااااااااارك الله فيكن اخواتي الغاليات نورتو صفحتي بمروركن العطر
بالنسبة للوصفات لي طلبتوها هاهي
حلوة بالبيمو
4حبات بيض+كاس وربع سكر+كاس زيت+قشور الليمون+1خمارة ونطمو بالفرينة حوالي 700غ نتحصلو على عجينة طرية نقسموها الى كرتين متساويتين نلون وحدة بالكاكاو والتانية نخليها بيضا نفرش ساشي فوق الطابلة ونحلهم بهدا الشكل نحط العجينة البيضا فوق السوداء وندور دورة ونص.. ونقطع
نتحصلو على حربوش نقطعوه مقروطات صغاااار لانو يتنفخ في الفور نرش البلا بالفرينة ونستف فيه الحلوة
وندخلها طيب على درجة 180من تحت ثم نشعلها من فوق نحضر قاطو بيمو مرحي مع ملعقتين ك سكر رطب وملعقتين ك كاكاو اسود بعدما تبرد الحلوة ملييييييح نغطس بالحبة في الشاربات _كاس سكر+2كيسان ماء _ونرمدها في البيمو هاد الكمية خرجتلي 50حبة
هليلات بالقوفريط
حبة بيض+نص كاس سكر+نص كاس زيت+نص كاس حليب+قشور ليمون خلطي الكل مليح +1خمارة وطمي بالفرينة حتى تتحصلي على عجينة طرية اقسميها الى كريات 30غ وشكلي تشاراكات... طيبيهم في الفرن على درحة 180 من تحت ثم من الفوق
بعدما يبردو تدهنيهم بالمعجون بواسطو بانسو ورمديهم في القوفريط مرحي
هادي الكمية تخرجلك 25حبة
حلوة اللمبوط
.4حبات بيض+كاس سكر عادي+كاس زيت+قشور حبة قارص+1خمارة ونجمع بالفرينة نتحصل على عجينة طرية.....بالنسبة لحلوة المحقن نخرج العجينة في اللمبوط ونطيبها في الفرن من تحت ثم نشعلها من فوق اما حلوة الصابلي نحل العجينة ماشي رقيقة وماشي عالية ونطبع الشكل لي حبيناه ونطبها في الفرن كي تبرد نلسقهم بالمعجون ونزيد ندهن الاطراف ونرمدهم في نواد كوكو ونرش عليها سكر رطب من فوق