الرؤية الشرعية والاحراج منها

[مشكلتي]

السلام عليكم اخوتي
راني حايرة بزاف كيفاه ندير ،كاين شخص حاب يتقدم لي وحاب يشوفني ونشوفوا والمتعارف عليه انه الرؤية الشرعيو او ما يسمى لقاء السنة لازم يكون في البيت العروسة ويكون معاها محرم لكن يكون فيه احرا ج كبير اذا البنت ما عجباتوش او العكس يعني حتى يوصل يدخل للدار ما نعجبوش ولا ما يعجبنيش فيها احراج للطرفين وخصوصا المراة فيها جرح لكرامتها والله ما عرفت ميفاش نوصل واش حابة نقول
هو قال انو حاب يبعث امه تشوفني واذا عجبتها يجي هو يشوفني في دارنا امر اللي احرجني وحبيت نقول له يجي مجرد 5 دقايق لمكان عملي يشوفني ونشوفوا اذا عجبنا بعضانا يجي للدار يخطب بصفة رسميةد واذا ما عجبناش بعضنا ما يجيش وهنا توقف ماشي حتى يدخل للدار واحد فينا يحرج الاخر
وحبيت نقولوا نتكلم لمدة وجيزة في الهاتف برك باش نعرفوا اذا نتفقوا على بعض النقاط .
مارايكم اخوتي؟ والله غير عاد الزواج يخوف والتسرع فيه يؤدي الى ما لا يحمد عقباه

[مراد سابقا]

عادي قولي له ياتي للعمل ويراك وترينه ولكن الهاتف لا انصح به مطلقا

[أنور]

يا اخي ، دعك من التهجم على الناس، انت لا تعرف ظروفهم، لو لم تكن صاحبة الموضوع في مشكلة لما قامت بكتابتها هنا

[Zahra 30]

[quote=مراد سابقا;3994454717]عادي قولي له ياتي للعمل ويراك وترينه ولكن الهاتف لا انصح به مطلقا[/quo
أنا اؤيدك

[أثيلة]

اختي عندك حق ،هذا فيه احراج للطرفين و صرا لبزاف ناس و غير البنت لي تدفع الثمن في كل الأحوال ،والأمر عادي ولا عيب فيه ،و راه بصرى في كل المجتمع ، يجي شوفيه يشوفك و يروح ، وعن الهاتف ايضا هو مليح و مش مليح ،انا نقولك تحدثي معاه لتعرفي رأيه فقط بعد ما يشوفك و لتعطيه رايك انتي ، وبعدها رب يسهلكم ملش
ان شاء الله تعجبو بعض و ترتاحو لبعض و تكونو افضل عائلة اختي الكريمة ،
لا تقولو اني اعرض عليها امور هكذا او هكذا ، كل شخص من حقه يتزوج بشخص يرتاحلو نفسيا. حسديا ، وماتقولوليش الرجل لا عيب فيه ، لانو عابالي بهذه و لكن الامر مجرد قضية راحة فممكن هنالك شخص لا ارتاح له انا قد ترتاح له الف فتاة اخرى و العكس صحيح



و عن الاخ لي تهجم على صاحبة الموضوع نقولو اعرف واش راك تقول و وزن كلامك ، الزواج مش لعب اولاد حتى تقبل باول شخص يتقدم ليها و بدون ما تشوفو ، الزواج راه قضية حياة لازمها الف حساب

سلام دمتم في رعاية الله و حفظه و أمانه

[نورسين.داية]

السلام عليكم بالرغم من أن ولايتي من الولايات المحافظة ( بكل فخر ) لكن نادرا ما تعتمد طريقة الرؤية الشرعية ..... ياخي لبنات كامل خدامات ....لي ما تخدمش تلقاها في الجامعة ..في المعهد ...مراكز التكوين المعني المدارس ..........نورمال

أصلا هذه طريقة والدته و منبعد هو خص غير قطهم يجي يشوفك تعجبيه و لا لا .....

[ibrahimm]

الرجل طلب الحلال و جاي يشوفك

مجرد رؤية فقط من بعد تقدري تهدري معاه و تتفقو على كل شيء

الراجل باين فيه يعرف ربي و انت تطلبي منو لقاء في الخارج و الكلام في الهاتف ربي يهديك

[faty05]

اختي عن تجربة فيها الحشمة فيها بصح يجيك للدار خير
راه ربي يسهل
في الخدمة راهم يشوفوك زملاءك و ممكن يخرجو اشاعات و كذا
دارك خير ما تخافيش
انتي شوفيه و هو يشوفك في داركم مع محرم اهدري وش عنك و النقاط لي حابة توضحيها او شروطك و استخيرو من بعد يبان لخبر
الله يسهل

[aminazy]

السلام عليكم
ديري كما قلتي وهذي نصيحة مني لانوا صديقتي متشددة وما حبتش تشوف غير بالرؤية الشرعية وبعدهاكانت الصدمة
الخاطب كبير وشكلوا غير متوقع . فاذ باخت الخاطب تطلب من كلاهما التكلم الا انها تجمدت وما قدرتش تقول انه لا يناسبني خوفا من مشاعره امام العائلة .قالت لي ذوك 5د ولا 10د حسيتهم ماحبوش يكملوا والعيلتين يخطوا وكان القبول تم ومنذ تلك الحادثة راهي ترفض خطاب .....خوفا من اعادة تلك الحادثة

[الصديق قروف]

انا منقبلش بمرا تحكي مع الخطاب خارج البيت دون محارم
ربي يهديكم راكم تتحاسبو على هاد الهدرا
هاذي خدمة اشيطان يصعب الحلال و يجمل الحرام

غاضني اراجل مسكين

[بنت الرّحّل]

25 ذي الحجّة 1436 من الهجرة النّبويّة

وعليكم السّلام ورحمة الله وبركاته
أهلا وسهلا بك أختي الكريمة
في رأيي أنت تعقّدين الأمر على نفسك ، يعني شخص يأتي يراك في بيتك وأنت معزّزة مكرّمة سُتحرجين من رفضه ، أما الذي يأتيك وتقفين معه في الشّارع لن تشعري بالإحراج ؟!
هذا لا يستقيم أبدا !
المشكلة التي تسبب الإحراج ليست في الرّؤية الشرعية أبدا وإنما في نمط تطبيقها بحسب معرفتي أن الخاطب حين يتقدّم لخطبة امرأة عليه أن يغلب على ظنه بأنه سيتم القبول - إلا أن يُحدث الله شيئا - فكل رجل إلا وهو محدد للصفات العامة التي يريدها في زوجته مبدئيا فمن غير المعقول أن يتقدّم للنحيفة وهو يريدها ممتلئة أو العكس - هذا على سبيل المثال فقط -
القبول المبدئي لابد منه قبل الرّؤية ويمكن معرفته عن طريق الواسطة التي بينكما ورأيه في إحضار أمه رأي صائب وأنا أؤيده بشدة فهناك من يقدم على الخطبة أولا ثم يأتي بأمه في الأخير وهي ترفض الفتاة وهذا سبب آخر من أسباب الحرج وجرح الكرامة فمن كانت أمه لها رأي مهم في زواجه فعليه أن يأتي بها أولا !
كما لا أنصحك بالهاتف أبدا ، وسببك أن التسرع في الزواج يؤدي إلى ما يحمد عقباه ، مبرّرك صحيح وواقعي لكن طريقتك لا تبدو صحيحة فلا أرى أن التكلم في الهاتف قد يضمن لك شيئا ذا أهمّية .
وأحبّ أن أقول لك : الأعزب في موسم الخطبة - إن جاز التّعبير - قد يَرفض وقد يُرفض والسّبب الثـــاني الذي يؤدّي إلى الحرج وجرح الكرامة هو عدم وضع احتمال عدم القبول بعين الاعتبار وبالنسبة للمرأة قديكون ألـمها أكبر بحكم طبيعتها وحساسيتها المفرطة لكن ما كُتب على عبد لا بدّ منه ومهما حاول التّحرز من الألم والنكد والنصب فإنه سيصيبه حتما !
هذا رأيي -والله أعلم- فاسمحي له بالمجيـــــئ إلى بيتك وأكرمي أهله ،فبدل التفكير بتلك الطريقة فكّري في أيّ الطرق هي أتقى وأنقى وأرضى لله سبحانه ، والله يبارك لك !
أتمنّى لك التّوفيق .

[ramzi-messi]

و من يتق الله يجعل له مخرجا و يرزقه من حيث لا يحتسب

[ام البنوتة]

عندك الحق تخممي كيما هكذا لانو كاين من اخوات الخطيب المفترض او امه تروح تشوف طفلة مع وليدها و نهار ماتعجبوش او يشوفوها غير مناسبة يروحو للمناسبات و الاعراس و يهدروا في بنت الناس ماشي شابة ضعيفة الخ
مالا اخطيك
شوفي احنا ماكانش لي يدخل للدار قبل الموافقة يعني الا دخل للدار يكون كل شي متفاهمين عليه و يكون شافها و شافتو و طبعا بلاما تحضري خالتك و عمتك و مرت خوك و الغاشي كامل يسمع و يجي للدار و من بعد مايكتبش ربي و يحسبوها عليك فركشة تاع خطوبة
مادامك راكي تخدمي يجي يشوفك من بعيد و تشوفيه هي مجرد نظرة اولى تخليك تقرري عجبك و لا لا لا
الخطوة الثانية اذا كان قبول يهدر مع باباك و يتفاهم معاه على الخطوط العريضة مثلا وين تسكني الخدمة تخدمي و لا لا الخ
نهار لي يكون عندك معلومات كافية و درتي استخارة افتحي الباب للشوفة في دار باباك بصح لي يجي يخطب يدخل للدار يشوف و مانعرف و الرجال داخلين خارجين قبل ما يكون هناك قبول مبدئي حاجة ماتقنعنيش و حتى الهدرة تخرج راهي تتشرط راهي ما تقبلش راهي ماعجبتوش راهي الخ

[** أبو أسيد **]

الله عز وجل شرع لنا الخطبة الشرعية و هي التقاء الخاطب و المخطوبة بوجود محرم للمخطوبة

و من اسرار هذه الخطبة وخاصة ان استخار كلا الطرفين أن يجعل الله مودة و رحمة في تلك الساعة و هو القادر و أرحم بعباده منهم أو يغني كل واحد منهم بما هو أنسب و أصلح له

ومن جرب الخطبة الشرعية يعي ما أقول


فلماذا نترك شرع ربنا سبحانه الذي يعلم ولا نعلم ما هو خير لنا في ديننا و دنيانا و عاقبة أمرنا والذي يقدر و لا نقدر وهو علام الغيوب
ونلجأ الى الهاتف ...ثم و لا قدر لقاء ...


سبحان الله كأننا أصبحنا نشك في قدرته سبحانه وهل كل من وقع له أمر نقسه على غيره .....


استخيري فان ربك أعلم و أرحم بحالك منك و منا ومن الناس أجمعين .....



وفقك الله و يسرك أمرك و رزقك زوجا صالحا و ذرية طيبة وسائر بنات المنتدى.......

[naamane3]

ياك رب العالمين يقول
واتو البيوت من ابوابها
ماشي من مكان اخر