قاطو باللوز ساهل و présentable

lilii7179 · 2014-09-23, 16:07

جبتلكم اليوم قاطو ساهل و مميز و présentable جربتو عدة مرات و اجريت عليه تغييرات و اضفت لمسات شخصية و نال اعجاب الجميع.

بسم الله

المقادير

500غ مرقرين , 400غ سكر احرش (و اللي ما تحبش القاطو يكون حلو بزاف تقدر تنقص شوية) , 500غ لوز ماشي مقشر و مرحي , 3 بيضات,2 ملاعق صغار مركز الفانيليا d'extrait e vanille, 2 ملاعق اكل قشور الليمون مرحية zeste de citron ,نصف باكي خميرة كيميائية, 200غ مايزينة و فرينة.

بالاضافة الى عسل و عصير الليمون بعد ما يطيب

الطريقة : خلطي المرغرين مع الفانيليا و قشور الليمون و السكر, ثم اضيفي البيض, اللوز, المايزينة, الخميرة الكيميائية و شيحي بالفرينة حتى تتحصلي على عجينة كيما نتاع الصابلي.

نحي من العجينة 2 كرات بحجم حبة البرتقال المتوسطة هاذو راحا تستخدميهم لصنع الازهار. وحدة من الكرات زيديلها كاكاو حتى تولي بنية و الثانية لك الاختيار تخليها بيضاء او تلونيها بلون آخر.

نرجعو للعجينة الاساسية , تحليها بالقنوط او الحلال بسمك 1.5 سم و تطبعيها بطابع الخاص بالغريبية (زهرة) و الصورة توضح . تحلي الكرتين اللي خليناهم بجنب (البنية و البيضاء), تحليم رقاق شوية و تطبعي ازهار بالطابع اللي يخدمو بيه la pate d’amande . ديري وحدة كبيرة بنية و وحدة صغيرة بيضاء , تحطيهم فوق بعضهم و تزينيهم بحبة سمسم كما في الصورة.(ما تحتاجي لا بياض بيض لا والو حطيهم برك و بعد ما يطيبو يندمجوو يلسقو)

ثم الى الفرن, بعدما يطيب و يبرد تماما تكوني موجدة عسل خفيف (انا اضفتلو الماء) و عصير ليمونة راحا تمدلو نكهة خاصة. تعسلي القاطو نتاعك و تحطي فوقو بيسطاش مرحي و brillant.

ملاحظة اذا شفتي ان البيسطاش ما حبش يلسق (لاننا استعملنا عسل خفيف) سخني شوية عسل ثقيل و فوتي ب البانسو فوق كل حبة قبل ما تحطي البيسطاش , هاذ اللمسة راح تمد لمعان للقاطو.

و هذه النتيجة النهائية

نتمنى تجربوه و نتمنى يعجبكم
على فكرة هذه اول مشاركاتي اتمنى ما تحشمونيش