قريوشة الوردة exclusif

fatimazahra09 · 2014-06-10, 10:18

صباح الخير حبيباتي ...

عملت كمية من هادي القريوشة ودوبليت المقادير على داك تشوفو في الصورة علبة 500 غ مارغرين فلوغيال وصورت كل مرحلة كيما وعدتكم باش لي صعبت عليها و ما نجحتش في تحضير هادي الحلوى رايحا تسهل عليها العملية ... وهي ما فيها حتى حاجة ... تبغي الصبر و المداومة عليها حتى تمشي يدك فيها ....نمدلكم المقادير و نقوللكم حاجة اخرى
انا هادي الحلوى منقوللكمش اخترعتها ولا نمتها ...بديتها من الكتاب كيما كامل الناس و بقيت نطبق فيها لاكن للاسف لقيت فيها حوايج مايصلحوش و بدلت الطريقة وهادي المقادير و الكيفية بالتفصيل الممل :
فرغي 1 كغ فرينة في القصعة و حطي 1 م ص فاني نتاع الميزان و 250 زبدة طرية و لا حتى من الثلاجة كيما نخدم بيها انا في كامل حلوياتي ... ماندوبهاش ... رايحا تسهل عليا حلها وبسطها ... خير ما تولي الطابلة تعوم ويديك يعومو باليدام ... المهم ... حكي وبسي براحة يديك حتى تشوفي كامل اليدام دخل ... ابداي بلي بالماء وماء الزهر حتى تتلم العجينة ... ماديري لا ملح لا قرصة خميرة لا زوج
ماتجريها ما تخليها ناشفة

اقسميها كرات وديريها في كيس بلاستيكي ترتاح الوقت لي تركبي فيه ماشينة الرشتة او البقلاوة ..
المهم حلي العجينة بالحلال هو الاول بالمايزينة ولا بالفرينةثم بالماشينة رقم 1 - 3 ثم 5 هو الاخير وبين كل تفويتة في الماشينة ديري المايزينة من الجيهتين قطعي بالمول يكون قطره 7 نتاع النحاس او 8 الابيض نتاع البلاستيك كيما تبغي ...
و قطعي دوائر و رفدي بسكين الزبدة من الجهة الاخرى كيما في الصورة او اي حاجة عندك تسهل عليك المهمة المهم ماشي بيدك رايح الشكل يخسر نتاع الوردة ... حطي 3 فوق بعضهم بعض وكملي باقي العجين ...و غطيهم بسربيتة تكون نقية وماش بلاتيك ..

ديري علبة نتاع الطماطم المركزة 1كغ مغسولة مليح و منشفة فوق الطابونة و لا الريشو و عمريها بالزيت 3/4 و خليه يحمى مليح و رمي عجينة صغيرة دايما قبل ما تبداي تقلي باش تعرفي الزيت لا حمى وماشي حبة ... وديريها في كامل المعجنات لي يتقلاو...
ابداي الرمي بثلاثة ولازم تكوني خفيفة باش يتحلو في وقت واحد ويحكمو بعضهم بعض كي يتقلبو على وجهم ابداي بالملعقة الخشبية هبطيهم باش يتغمرو بالزيت و كي تشوفي لونهم دهبي نحيهم مع التعسال رايح يجي لونهم نيشان ... لاخصك الزيت وشفتيه نقص زيدي حتى تلحقي لثلاث ارباع نتاع العلبة ...رايحا تشوفي ان القريوشة تبقا بيضاء في الاطراف ...زيدي الزيت
كملي الكمية لي عندك ولا ماكنتيش غاصبة بيها خليها ليلة كاملة وادا العكس دفي العسل و ما تكتريلوش ماء الزهر في 1 كغ ديري 1 كاس نتاع لاتاي باش تبقى القريوشة مقرقشة وماتشمخش ..
عسلسها و كي يبرد عاودي دفيه ودري عليها الجلجلان وحطيها في لي كيسات ومن بعد عاد ديريلها الملمع الغدائي .
انشاء الله تكون عجبتكم ونكون وفيت بوعدي ليكم... ولي ما نجحتش في تحظيرها تولي professionnelle فيها ...
سلام
اي استفسار راني هنا
ملاحظة : هادي المقادير ديرلك 100 حبة انشاء الله
يتبع ....

fatimazahra09 · 2014-06-10, 10:27

يتبع

fatimazahra09 · 2014-06-10, 10:31

Sasau · 2014-06-10, 10:38

444444444444444444444444444444444444444444444

fatimazahra09 · 2014-06-10, 10:42

اقتباس:

المشاركة الأصلية كتبت بواسطة سهومةج

الللللللللللللللللللله ايبارك شفت عجينة اللوز و السكر و درك القريوش الله ايبارك علييييييييييك باينة فحلة تاع الصح لاتحرمينا من اعمالك واصلي أأنا تعلمت منك بزاف ربي ايجازيك بكل خير كملي نحن في الانتضار كيفية التشكيل

الله يبارك فيك ....خجلتيني وهادي مني ليك

الله يحفظك ويخليك ....رمضان مبارك

fatimazahra09 · 2014-06-10, 11:00

اقتباس:

المشاركة الأصلية كتبت بواسطة Sasau

444444444444444444444444444444444444444444444

شكرا وفهميني الله يخليك واش معناها هادي الاربعات

باش نعرف نجاوبك

أم محمد تاج · 2014-06-10, 11:25

ههههه يعطيك الربح 4444444 معناتها فووووووووور يعني فور رقم اربعة بالانجليزية وفوووور في المنتدى معنتها راكي فوووووور

حبيبتي روووعة مواضيعك الله يجعلها في ميزان حسناتك يارب ورمضان مبارك يارب

شقراء · 2014-06-10, 11:29

يعطيك الصحة

سهومةج · 2014-06-10, 11:30

راني حدفت المشاركة تاعي باه ما نفسدش الروائع تاعك شكرا يا لعزيزة ربي اعزك ف دنيا و لاخرة زيدي زيدي مواضيعك راكي توووووووووووب و عندك جمهور ينتضر

سهومةج · 2014-06-10, 11:32

هل نضغط على الوردات من تحت
هل ما يتفتحوش عن بعضاهم
ما تستعمليش بياض البيض بيناتهم وكيفاش ما يتفتحوش

أم عبد الكريم · 2014-06-10, 11:34

واو رائعة عندي بزاف زانا نحوس عليها

fatimazahra09 · 2014-06-10, 11:46

اقتباس:

المشاركة الأصلية كتبت بواسطة أم محمد تاج

ههههه يعطيك الربح 4444444 معناتها فووووووووور يعني فور رقم اربعة بالانجليزية وفوووور في المنتدى معنتها راكي فوووووور

حبيبتي روووعة مواضيعك الله يجعلها في ميزان حسناتك يارب ورمضان مبارك يارب

j'ai pas imaginé que 4 c four in English
pourtant j'ai pas perdu tout mon anglais depuis que je suis a la maison
vraiment j'ai été piégé

merci pour l’information

fatimazahra09 · 2014-06-10, 11:48

اقتباس:

المشاركة الأصلية كتبت بواسطة أم عبد الكريم

واو رائعة عندي بزاف زانا نحوس عليها

ولي لقيتي الوصفة على سطح القمر
au clair de la lune .... mon morceau de sucre
la la la la la la
prête moi t'as plume pour coloré mes sucre

:1 :

الله يحفظك ويحفظلك عبد الكريم والله يا اختي نحسب في روحي نجاوب في السكر الملون
ماعليش ما نحدفش الجواب و بلاك راكي لقيتي حتى القريوشة هادي على سطح القمر ...هههههههههههههه

سهومةج · 2014-06-10, 11:54

أختي فاتي السؤال موجه الى القريوشات ماشي السكرات ههههههههههههههههههههههه

fatimazahra09 · 2014-06-10, 12:04

اقتباس:

المشاركة الأصلية كتبت بواسطة سهومةج

أختي فاتي السؤال موجه الى القريوشات ماشي السكرات ههههههههههههههههههههههه

راهم الاسئلة دوخوني
ماديري لابيض لا والو كي تحطيهم فوق بعضهم بعض رايحين يلصقو قبل ما تكملي الكمية نتاعك
ديري النية وجربي ربع المقادير
برك حاجة اضغطي مليح كي تقرصيهم باصابعك الثلاث و في نفس الوقت خلي قاعدة الوردة بلا ما تضغطي عليه و رميها في الزيت كيما في الصورة رايحا تتقلب وحدها

هادي الكمية ديرلك 100 حبة