زوجي يتدخل في شؤون البيت ويقارن بيني وبين الاخريات

[مشكلتي]

السلام عليكم مشكلتي تتمثل في ان زوجي مزال مرحتش عندو للبيت عاقد علي لكن من خلال كلامو اتضح لي انه امه تنوض بكري وقت فجر ويقعدوا نايضين
وانا نوض حتى 10 المشكل انا طول الوقت احس انني تعبانة وجسمي بحاجة للراحة عندي فقر الدم ومؤخرا قال لي طبيب كون متريحيش رح يولي عندك انزلاق غضروفي او عرق النسا وزوجي يبدا يقول لي لازم عروس من نهار لون تشتغل وكي يجو اهلها تطيب لهم لاتاي؟ صح كاينة منها زعما؟ انا على حسب علمي العروس تقعد اشهر او عام متقضيش او تقضي حوايج خفاف مع العلم انه عنده امه وابوه وخوه صغير رح يخدم واخته تقرا طب مرة قال لامي انه اخته لا تعمل شي في البيت النت فقط يعني انا نولي نقضي من وراها ووو والله متخوفة وغايضتني عمري خصوصا لما قارن بيني وبين النساء وقال لي انه اخته تنوض بكري تطيب لراجلها قهوة وانه لازم نكون نشيطة انا والله نتعب بزاف لو طلعت درج برك نتعب وقلبي يولي يضرب شاندير راني نفكر ناجل العرس والله انا في بيتنا مندير والو امي تدير كلش متخليناش قاع نتعبو غايضتني عمري منحبش نتعب متعبتش في دارنا مع امي مسكينة ونتعب في ديار ناس؟ ارجو احترام تفكيري وعدم التجريح لي بأي كلمة انا افضفض فقط وارجو من الادارة حذف موضوعي عند استكماله عشرون مشاركة وبارك الله فيكم

[abou abd]

طريقك مسدود مع هذا الرجل

[منى6019]

يا اختي ...صراحة ...معه حق..
صحيح امهاتنا تشفق علينا
لكن تعلمي و اعملي من اجل بيتك
كيف يمكن ان تعمل حماتك من اجلك و انت ترتاحين
انت الان كحماتك و كامك ....هن يعملن لاجل بيوتهن و انت لك بيت تعملين من اجله
و تقديم الشاي ليس عملا متعبا
للعلم ....العمل صحة ...

[مراد سابقا10]

بصراحة اذا كنت لست قدر المسوؤلية فتوقفي من الان وابقي في بيت اهلك

وزيد نقولك حاجة في الزواج كي يكونوا الأطفال يقعدوا يبكيوا طول الليل مترقدي لا انت لا زوجك تتعانوا ومنعرف.

[محمد جديدي التبسي]

راك تحكي من نيتك ولا تتمسخري؟؟
المفروض تعاوني والدتك ودربي نفسك على اشغال البيت لأنك بعد الزواج راح تكوني سيدة بيتك يعني لازم تخدمي
وهذي مش ديار الناس هذا بيت زوجك
أما حكاية المرض والتعب فهذا يتضح بعد بذل مجهود لتغيير طباع الكسل لديك فالعمل يريح البدن عكس الكسل الذي يجلب الأمراض النفسية والعضوية...
ان كان تفكيرك هكذا ولا أمل في تغيرك فالأفضل تصارحي هذا الرجل به لكي يعرف ماذا يفعل...ربي يشفيك واسمحيلي اذا جرحتك...

[ing.Youcef]

بصراحة ودون تجريح... لا تتزوجي ولا تتعبي الرجل وعائلته معك ولا تحرجي عائلتك.. باختصار

[dede2000]

صراحتا راكي غالطة على طول الخط
حتى أني حسبتك تتمسخري
وإذا كان كلامك صح والله كارثة وغاضني راجلك
والله معندو الزهر طاح في زوجة ؟؟؟؟؟
إنت لزملك فندق خمس نجوم تعيشي فيه وتنوضي
علي العشرة ، سبحان الله خايفة تنوضي بكري
طيبي قهوة راجلك.....واش تحوسي من هذا الزواج
؟؟؟ مطيبيش متغسليش متنوضيش بكري
ملا واش يدير بيك هذا المخلوق...يروح يسلكلك
الانترنات باش تكونيكتي...
أنا راسي حبس راح نشرب الخل

[loulou kati12]

الله يشافيك اختي المرض ابتلاء من الله قدره الله لكي فارضي به وداوي على روحك فقر الدم باذن الله يعالج لانو انا كان فيا حتى وصلت لهشاشة العظاام ولكن بفضل الله ثم العلاج راني الحمد لله وكانو ولدت من جديد وبالنسبة لشؤون البيت عادي قضية ولف اي توالفي تقضي وبدايها مع ماماك منها تتعلمي ومنها تعاونيها مسكينة لانو راح تقضي في بيت زوجك هذيي مفروغ منها فالزواج مسؤولية لازم تتحملي سمحيلي اذا جرحتك وشفاك الله وادعي ربي يسهلك

[nina hnina]

بصراحة راكي غالطة كيفاه متعاونيش امك وزيد راكي تهدري برك. تزوجي تتعلمي شطارة كي تشوفي. دارهم شاطرين راح توالفي ناس دارك

[kimou anas]

]اسمحيلي اختي بالصح كلمة دار الناس هادي ماعجبتنيش ولوكان يسمعها راجلك راح يزعف منك لانو هاذي رايحا تولي دارك اختو تتزوج ويماه وباباه ماشي دايمين ، الراجل يحب يزوخ بمرتو يحب كي يجو الضياف هي اللي تقوم بيهم ماشي غير تطيب لاتاي لدارهم يفرح كي يدخل ويلقاها في الكوزينة ، وانتي اسمحيلي على حساب ماراني نشوف رايحا تسوفري ويسوفري معاك هو ، حنا نقولو اللي فيه الخير ربي يقدمو وربي يهنيكم ان شاء الله

[ابو سليمان10]

هذا هو الجيل الجديد ...جيل البنت التي تتصل بالانترنت و تذهب للجامعة و لاشىء في البيت...

الاخت ليست مسالة قوة و ضعف...مسالة عادة فقط...المراة في الماضي كانت تتعب كثيرا جدا مقارنة مع الظروف الحالية...و جسم المراة هو نفسه لم يتغير..العادات هي التي تغيرت

الزواج مسؤولية...للبنت و للشاب...من يقدم عليه تحمل المسؤولية و الا فل يبقى في بيته

[ام رضوان]

ربي يبقي الستر
والله قلبي وجعني مقريت مشكلتك
ناكدلك يابنت الناس لكان رحتي بهذه العقلية عند دار الناس كيما راكي تقولي
في 1شهر يقلبوك لاهلك هااااااذي حطيها مليح في بالك
تنوضي على10؟؟؟؟؟؟
وتريحي شهر ؟؟؟؟؟؟؟
والله شيء مخزي
وزيد عاجباتك امك كي تخدم علييييييك؟
تحوسو تتزوجو بااااه تلبسو التصديرة والروبة وشهر العسل بصح
الواقع مش كيما راكي تشوفي
وزيد حاجة اخرى
انت راكي رايحة بنية مش مليحة
من ذرك تقارني في روحك مع اختو ووووو
الزواج يابنت الناس راهو مسؤولية كبييييييرة
اذا شايفة روحك مش قادرة غير اجبدي روحك واقعدي عند ماماك تخدم عليك مسكينة
وخمي مليييييييح
الله يهدينا اجمعين امين

[nihal159]

صراحة أختي تشوكيت فالمنطق نتاعك و لي شوكاني أكثر انك من الان حاسبة روحك ضحية و تعطي لنفسك الحق، ياختي ماكانش امراة مسؤلة على بيت و زوج و تصبح راقدة للعشرة، و الغلطة ماهيش فيك فقط و لكن امك تتحمل جزء من الخطأ لأنها رباتك على الكسل و الخمول و مارباتكش على الشطارة، نصيحتي ليك أقعدي في داركم فنيانة معززة مكرمة خير ماتروحي لدار الناس و تولي فالمشاكل و مش بعيد ترجعي لداركم.
قضية مرضك بفقر الدم حاجة عادية تتعالج بالتغذية السليمة و الادوية المناسبة يعني مش حاجة لي تحبس عندها الحياة لدرجة أنو سينية تاع أتاي رجعتي تشوفيها عمل عظيم ماتقدريش عليه.

[nihal159]

علابالي قلتي ماتجرحونيش، لكن الكلمة هذي لازم نقولهالك باش تفيقي
واش من قلب عندك تصبحي راقدة االعشرة و راجلك يخرج بلا فطور الصباح؟ كيفاش مايكلكش قلبك تنوضي توجديلو قهوة و توقفي معه فالباب و هو خارج؟

[lwiza2000]

انت لن تستطيعي التاقلم مع الحياة الزوجية الا اذا كنت ساكنة وحدك
لانه بهذه الطريقة ستستفقين من الغيبوبة التي انت فيها
النوم للعاشرة ليس جيد لصحتك اصلا
لان فقر الدم يجب ان ترتاحي ولكن ليس بهذه الطريقة ان تستيقضي باكرا تكبري على قلبك وتخدمي بيتك وفي الظهيرة تريحي وتنامي وتنوضي العشية ديري عشاكي وفي الليل متسهريش بزاف
بصراحةعندما تحب المراة الرجل تستميت لكي ترضيه حتى لو تعبانة تنوض على جالو تخدم وتشهيه بكل ملذات الاكل وتتهلى فيه وتغسلو رجليه
لكن ان تزوجت المراة فقط للزواج والزوج لاتكن له اي مودة تعجز عن فعل اي شي له
اما بخصوص مرضك فديري في بالك فقر الدم مرض ليس سهل وقادر يتحول الى سرطان دم ان لم يعالج
وان كنت وحدك لايمكنك ان تفعلي شي
اذم كي يكون عندك اولاد كيفاه ديري
الحمل وحده سينقص كثيرا من الطاقة وستتعبين كثيرا والله معاناة اسال مجرب كيتعودي دوخي ديمة