وصفات من حراير مطبخ وش طيبتي اليوم

[idron0]

قاتو ساهل ماهل lyzzabel
درت 250 غ مارغرين طرية و نص كاس زيت و ضربتهم مليييح حتى تجانسو تماماً ،، و زدت ثلثي 2/3 كاس سكر رطب و م ص فاني و ضربت و ضفت حبة بيض و ضربت مليح و منبعد لميت بالفرينة و م ص خميرة الحلويات حتى تحصلت على عجينة طرية ،، خليتها ارتاحت فالثلاجة ربع ساعة و بديت نشكل كويرات متوسطة كبيرة شوية على حبة الجوز و بسطتها غير شوية بكف يدي و درت حفرة بصبعي فالوسط و حطيتهم في صينية مرشوشة بالفرينة و طيبتهم على 180 درجة حتى نشوفها حمارت شوية من تحت نخرجها و نعاود نضغط بصبعي فالحفر لي درتهم فالوسط ،، طبعا نغطي صباعي بطرشونة باش ما ننحرقش ،، و مين يبرد القاتو ندير فالوسط معجون ولا نوتيلا و نزين كيما نبغي ،، انا زينت النص بالمعجون و كاوكاو محمص و مرحي و حبات برك زدتلهم اللوز ايفيلي عييت هههههه ،، و النص لاخر زينته بالنوتيلا و الجوز فالوسط ،، راه خفييييف و هشوش و كيما قلتلكم يذوب فالفم

إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.

[scorpionoir]

خبز الصاج لام الهضاب

ديري رطل فرينة مغرفة صغيرة سكر و مغرفة صغيرة خميرة و واحدة مغرفة صغيرة حليب مجفف ،لحظة، و ملح و ثلاث او اربع مغارف كبار زيت و خلطي و بلي بماء دافئ و اعجنيها كما البيتزا و ادهنيها بالزيت و خليها تطلع ثم اكسريلها الطلوع و زيدي لميها مليح و من بعد كربعيها و خليها تطلع ثم رققيها بشوي فرينة رقييييقة و حطي و غطي و من بعد شعلي طاجين المفرمسة و زيديلو و ابداي لوحي اول واحدة قرصتيها و من يبدى يدير فقاعات صغار قلبيه و ابداي لظي اعليه بحاجة باش ما يتنفخش و ادهني الوجه بالزيت و زيدي قلبي زيدي ادهني الوجه الآخر و خرجيه و غطيه بطرشونة ، ايجي بنين و طري يهبل و خفيييف و كي تلوحي فيه حوايجك لهوثيه و زيدي حطيه اعلى الطاجين مدهون بالزيت و اضغطي اعليه بحاجة انتاع حديد باش يحكم لا فورم انتاع المستطيل فيها خدمة بصح خرج يهببببل و يشبه للطاكوس

[idron0]

عش العصفور ام محمد تاج
العجينة:
3كيلات فرينة وكيلة سمن نصها مارغارين ونصها سمن ورشة ملح وزوج مغارف سكر قلاصي وبيضة ونلم بماء الزهر نلوزها ونخليها ترتاح مليح كل مارتاحت كل ماتعبكش في الخدمة نحلها ماشي رقيقة وماشي خشينة ونحطها في لي مول .
الحشو:
200غ كاوكاو مقلي بالقشور و600غ مقشر ومقلي وثلاث مغارف سكر عادي وزوج مغارف مارغارين طرية وفاني ومغرف كبيرة اكستري تاع الكارامال ونلم بالبيض ومالازمش تجي جارية ولا يابسة ونخليها ليلة تبات وباقي الطريقة راهي موضحتها الحبيبة فلة في الرابط وكي طيب نعسلها مرتين وكي نحط المكسرات في التزيين نسخن شوي جولي وندهن برفق من فوق ونذرذر شوي بريو دوري وخلالالالالاص ولا نذرذر حبيبات فضية الصغيرة.


إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

[إلهام07]

طريقة جديدة في تجمار التريدة
إلهام

أدهنيها بالشوية بالزيت بين يديك أدهنيها مليح
ومن بعد حطيها تفور وكل مرة نحيها من الكسكاس وحليها غير بالمغرفة كيما نبردو الماكلة للاولاد وبخي برك بالماء ماتكثريش ورجعيها تفور وهكذا أبقاي عاودي فيها بالشوية حتان تطرالك
و كي تكون مازالت يابسة عاوديها غير بالشوية لاخاطر تتكسر
ومن بعد : فرغيها في صينية نتاع زجاج نتاع الفور وصبي عليها المرقة وحطي قطع صغار نتاع زبدة وغطيها بورق الالمنيوم ودخليها للفور وماتحركيهاش خلاص حتان تشرب المرق وتطرى
هذي راهي طريقة جديدة في تجمار التريدة باش ماتتفتتش تبقى كيما راهي ولاو يجمروها هكذا في الشرق

[أم محمد تاج]

الله يخليك حنونتي ايدورنو ويجعلها في ميزان حسناتك يارب

[nadjet45]

الله يعطيك ما تتمني اختي دائمة الحمد وجزاك الله خيرا

[idron0]

ارز بارجل الكالامار lyzzabel

إضغط هنا لرؤية الصورة بحجمها الطبيعي.

هذوك ارجل الكالامار طيبتهم في صلصة الطماطم
درت أطراف الكالامار مقطعين و قليتهم في شوية زيت على نار هادية شوية و درت عليهم الملح و غطيتهم ،، مرة على مرة نقلبهم غادي يطلقو الما تاعهم هو لي يطيبو فيه ،، مين ينشف هذاك الماء نحيهم في صحن و في نفس المقلة و نفس الزيت نرابي ثلاث سنات ثوم كبار شوية و نزيد عليهم زوج حبات طماطم رابي و م ص معمرة طماطم مصبرة و ملح و فلفل اسود و نغطيها و نخليها تطيب على نار هادية ،، قبل ما تنشف نحط عليها الكالامار لي طيبته من قبل و نخليه يتجر فيها ،، و الصلصة لاكان بغيتيها خاثرة خليها تنشف مليح و لاكان بغيتيها خفيفة ما تخليهاش تنشف بزاف ،، و قدمته مع أرز ابيض طيبته فالما و الملح و ورقات رند و مين طاب درت عليه مارغرين ،، ما نحركهش بزاف باش يقعد مفرز و خلااااص

[ام رجاء 09]

الحالة راهي حابسة كامل في قسم الطبخ الا القليل على ما اظن العراس والعطل خلاوهم يبعدو على المنتدى ان شاء الله يكونو بخير

[idron0]

قلاية دائمة الحمد

إضغط هنا لرؤية الصورة بحجمها الطبيعي.


نسموها قلاية
نطيبو الدوارة في الماء حتى تنشف ونزيدو ليها التوابل ونقصو خلاص حتى تصفي ايدامها ونرموفلفل ومعدنوس انا نحيت هنا ليدام ما يحبوشو وهي في الاصل تجي بيضة انا نعملها حمرة على جال سي السيد يحبها هكا
وكي نطيبوها مرقة بالحمص نسموها بكبوكة وكي نطيبوها مرقة بالبطاطة نسموها مرقة بالدوارة

[دائمة الحمد]

يعطيك الصحة ادرينو وفي موازين حسناتك عزيزتي

[بشرى2008]

تحلية dessert malek nour hane ملك نورهان



هبل المنتدى و هبلني معاه الله يعطيه الربح راني ندعيلو كي شغل عبد
هههه نحتاج الطوماطيش بشرى خلاصتلي.....هايليك الوصفة يالفحلة :الطبقة الأولى حبة رمان رحيتها مع السكر و2 مغارف صغار ياوورت فراز فيه قطع الفراز و من بعد صفيتو فصفاية باه نحيولو اللب و زدت مغرفإن صغيرة مش معيبة نشا و خلطتو على نار شوي عقد برك نحيتو صبيتو فالكؤؤس و دخلتو للفريجيدار
الطبقة التانية رحيت2 حبات كيوي و سكر وقطرات ليمون و ريشات نعناع و صبيتو فوق الطبقة الأولى بحذر
الطبقة الأخيرة رحيت حبة مانجا مع سكر و شوي خلااااص عصير الاناناس لاماعندكش ديري قارص و صبيتو على الطبقة الثالثة بحذر تاني ههههه خليه يبرد فالثلاجة شوي زينيه انا زينتو بالرمان و تشينة و ريشة نعناع.... أمممم سيغتو الطبقة تاع الرمان هي لي بنينة بزاف

[idron0]

القلاصاج بشرى 2008
انا هاد القلاصاج منبدلوش محااااااااااااااااااااال يعجبني
1 بياض + عصير حبة قارص ونخلط بكف اليد فقط ملييييييييييييح + حوالي 2 ملاعق زيت وشوية ماء الزهر وملون ابيض نتاع الميزان وفاني ونخلط ونبدا نزيد فى السكر الرطب حتى نتحصل على القوام اللي نحوس عليه وكي نحب نخبيه نزيد السكر حتى يولي عجينة نديرو فى ساشي ولا بورت مونجي ونغلق مليح ونخبيه فى الكونجيلاتور لنهار اللي نحب نخدم بيه

كاين تان قلاصاج أم رامي رووووووووووووووووعة
قلاصاج ام محمد تاج شكروه بزاااااااااف البنات انا مجربتوش
قلاصاج ام اماني كلهم جربتهم ورووووووووووووووووووووووووووعة

[idron0]

شطيطحة السبناخ اوالسلق دائمة الحمد
تغسليه عادي وتقطعي وتقطريه ثم فوريه
دري صوص باللحم عادي والحمص او باللحم المرحي الصوص تكون حمرا لكن ماتكثريش الملح والطماطم خاطر تجي ناشفة لما يطيب اللحم ارمي السبناخ لما يطيب ارمي بيضات حسب عددافراد الاسرة دون ما تحركي ولما تنشف البيض اطفي النار مع المعدنوس والقارص وقرن فلفل حار تجي روعة
وهي بطماطم الكعب تجي احسن





إضغط هنا لرؤية الصورة بحجمها الطبيعي

[لينة71]

اختي ايدرنو حبيت نسقسيك الحلوة لي حكيتيها هل نقدر ندي سكر عادي بدل سكر ارطب لانو ماعنديش وراني قاصبة بالوصفةلا قبل مانزيد ههههه

[لينة71]

ربي يجازيكم كل الخير ...امين يارب