محشي الكرمب من مطبخ لهلوبة

[إلهام07]

مساء الخير بطبوطات


جبت اليوم وصفة محشي الكرمب كل ما نحط طيابي وطياب ماما تطلبوها مني وما حطيتش الوصفة ببساطة لانها وصفة محشي كرمب عادية ماشي حاجة جديدة لكن لاحظت أنو بزاف تعملو المحشي وخاصة الكرمب بصوص حمراء حبيتكم جربوا طريقتي وطريقة ماما بصوص بيضاء صدقوني مئة مرة ألذ من الصوص الحمراء .



بما أنو رمضان راهو قريب قلت تحتاجوها وتبقاو تطلبوها مني هنا وفي الفايس بوك

تابعوا الطريقة واهم حاجة في بنتها بساطة الطريقة وأصالتها وقلة التوابل في الصوص :




المقادير :

كرمبة كبيرة
لحم مفروم ( كمية مليحة )
كاس أرز مغلي في ماء وملح فقط

لتتبيل اللحم :
ملح وثوم بودرة و 3 أو 4 فصوص ثوم مرحي ( اللحم يحب الثوم هكذا تقولي ماما ) و فلفل أسود وكمون (شوية برك)

للصوص الأبيض :
حبة بصلة مرحية أو مقطعة مكعبات صغار
قطعة لحم أو دجاج
3 فصوص ثوم مرحي
ورقات رند
شوية زيت للتقلية
ملح و فلفل أسود ومكعب مرق دجاج (اختياري ) و ثوم بودرة
معدنوس للتزيين : سيقان المعدنوس اللي رايحة نقطع اوراقه للتزيين نربطهم بخيط ونرميهم في المرق

الطريقة :

1- نضع في البرمة الماء يغلي ونحط الكرمب نتاعنا يفور وكل مرة ننزع برفق ورقات الكرمب ونحطهم في كسكاس يقطروا

2- نوجد الصوص :

في كوكوط نحط شوية زيت وقطعة دجاج ونبدى نقلي فيها ثم نضيف البصل والثوم ونكمل نقلي مليح باش نتحصل على هذاك اللون الذهبي فيما بعد للصوص
- بعد ما تتقلى وتتحمر نضيف التوابل والملح واوراق الرند وربطة سيقان المعدنوس ونقلي دقيقة فقط ثم نمرق بماء ساخن ومانكثرش الماء لانو المحشي يجي فيه صوص قليلة باش يجي بنين .
- نغلق الكوكوط ونخلي الدجاج يطيب حوالي نصف ساعة على نار هادئة ( كي طيب في راحتها جي بنينة )

3- نعجن كل مكونات خلطة اللحم مع بعض ونخليها جانبا .

4 - هذي نصيحة أمي دائما لي : باستعمال أوراق الطبخ الماصة نحاول نمسح شوية الماء من على أوراق الكرمب باش ما يطيرقش علينا الزيت كي نكونو نقليو فيه وننزع الجزء الأبيض الموجود في وسط الورقة لأنو شوية صلب ومايطيبش .
- اخترت نعمل المحشي هذي المرة على شكل رزمات بدلا من شكل السيقار من باب التغيير بحيث نضع كرة من خليط اللحم ونحاول نلف من كل الجهات بورقة الكرمب ونغطي مليح اللحم و اخترت أن أصنع رزمات أو كرات كبيرة شوية منها جي منظرها يحمر الوجه ومن جهة أخرى نخلص بسرعة

5- بواسطة خيط أبيض نلف الرزمات نتاع باش مايتحلوش في القليان او في الكوكوط ونقليهم ونحمرهم مليح في مقلاة بشوية زيت ونتركم جانبا في صحن حتى يطيب المرق .

6- نفتح الكوكوط ونصفي الجاج من المرق ونتركه جانبا .

7- باش تتحصلو على مرق مافيهش شوائب انا نحب نميكسي المرق نتاعي بالميكسور بعد ماننزع أوراق الرند وربطة المعدنوس
(أما ماما تصفيه وتعمل مايسمى "العقدة " اللي هي تنحي شوية من المرق في صحن صغير وتضيفلو صفار بيضة وتخلط مليح بشوكة وتضيفو لباقي المرق وتحرك .... أنا تبانلي طريقتي أسهل وموفرة للبيض ههههههههههه

8- نضع رزمات الكرمب نتاعي برفق في الكوكوط بدون تحريك ونغلق الكوكوط 10د فقط وعلى نار جد هاااااااادئة .

9- في المقلاة بشوية زيت نحمر قطعة الدجاج باش يجي مقرمش الجلد نتاعو و بريزونتابل في التقديم

10- ننزع الخيوط من رزمات الكرمب ( نجبد بالحبة ونحط في صحن ونقص كل الخيوط من فوق ونجبدهم برفق من الجنب يخرجو بسهولة على هذي قلت كي نقلل عدد الحبات نسهل على روحي العمل )

11- يقدم مع أو بدون عصرة ليمون ولكن اكيد مع رشة معدنوس مقطع


جربووووووووه لذيذ جدا يلحسو الصحون هههههههه
أنا قدمتو مع سلطة خضراء وماسيدوان وخبزة محشية مرقاز وتونة وجبن وصوص طماطم وزيتون


أترككم مع الصور :




























آه كنت رايحة ننسى وهذي صورة محشي ماما اللي شفتوه وطلبتو الوصفة للتذكير فقط :

تحياتي ,,,,,,,,,,,,,,,, انا لهلوبة

[حياة نور الدين]

اهلاااا الهامو يعطيك الصحة خسارة البارح درتوا كما قلتي تقليدي صص حمرا ي مي ملحوقة نجربوا طريقتك ان شاء الله
بارك الله فيك

[ام هدول]

اممممممم ولا أروع..شكرا على الطريقه المفصلة في ميزان حساناتك ربي يبارك فيك وفي ميمتك

[الاميرة سميرة]

اممممم و لله غير يشهو لزوج الف شكر اختي الغالية على الوصفة الى ممكن رابط صفحتك على الفيس بوك و شكرا لك بالتوفيق

[RIMA.87]

السلام عليكم ،
بارك الله فيك على الوصفة و ربي يحفظك و يحفظلك أمك و جميع امهات المسلمين،
ما شاء الله الطبق يشهي و يستحق التجريب.
أحلى تقييم

[Fifilondon]

اممممم تشهي يعطيك الصحة ان شاء الله نجربو يبان بنين ربي يسلم هادوك اليدين

[سحابة باردة]

أممممممم يشهي ومحمر كيما يحب الخاطر تسلم الأيادي

[مسعودي خولة]

اممممم يشهي اذا ممكن وصفة خبزة الطن و المرقاز

[توتة2008]

شهيتيني....امممم

[إلهام07]

مشكورات اخواتي على المرور


خولة ما تشبعيش وصفات هههههههه
هذيك الخبزة عبارة عن كاس كبير فرينة وملح و 1 م ك سكر و نصف م ص خميرة حلويات و 1 م ص خميرة خبز (معمرة مليح بارد الحال) و جمعتها بحليب دافي وعجنتها مليح وزدتلها 1 م ك زيت وعجنت شوية و كي خمرة قسمتها على زوج كرات وحدة كبيرة ووحدة صغيرة . دهنت المول نتاعي بالزبدة و طرحت القرصة الكبيرة رقيقة (مانحبوش العجين خشين) بحيت تبقى العجين شايظ على الاطراف وحطيت الحشو ثم طرحت القرصة الثانية بالرولو أيضا والفرينة وحطيتها فوق الحشو وكسلتها مليح غطيتها باطراف القرصة الأولى وماتدهني ماولو طيبتها على فرن مسخن من قبل 180° وحمرتها شوية من فوق وخليتها بردت شوية برك وقلبتها في صحن التقديم والتزيين حسب الرغبة
الشحو :
دهنت صلصة طماطم نتاع بيتزا
فوقها حطيت طون طماطم وفوقو مرغاز مقطع (نحب نحطو نيء يطلق الصوص نتاعو في الشحو يجي بنين بصح انا كانو عندي طايبين فضلو من الغداء واحد ماحب ياكلهم قلتلهم تكبرتو عليهم ماكلينهم ماكلينهم
وفوقهم حطيت زيتون أسود وأخضر مقطع
وفوقهم جبن أبيض قطع صغار وجبن مبشور وغلقت الخبزة

وهنا الصور للتوضيح :

[جوهرة الشرق سكيكدة]

بارك الله فيكي اختي وصفاتك كلها روووووو.عة

[ام ورود]

جزاك الله كل خير اختي الهام...من كتر حبي ليك راني نحوس نزوجك لحيجل هكدا نجي ناكل من يديك ..غدوة ندير الكرمب..اما والخبزة شكلها يشهي.ديما نشوف هداك القالب يتباع لكن مخممش نشريه لاني ..لكن اليوم نجري نحوس عليه عجبتني فكرتك جاك روعة بريزونطابل يصلح للعرضات..الله يبارك من طريقة كلامك باية شخصيتك مرحة ما نملوش فس قراءة مواضيعك ..ربي يحفضك اختي

[فايزة1207]

وصفاتك يستاهلوا كتاب ما شاء الله ولا تروحي لسميرة

[افكار خياطة]

يعطيك الصحة طبق يشهي

[MALIKA06]

شكرا لك يعطيك الصحة