اليوم اخر تحدي ونتمنى اني امتعتكم كما تمعت انا باطباقكم وتحفكم
التحدي : العصير والحلويات
العصير : سموثي الدلاع بالنوادكوكو والنعناع
اسهل من الوصفة مكانش والمقادير بسيطة
برج كبير دلاع
2 مغارف كبار نوادكوكو
شط نعناع
في بلاندر ندير الدلاع بعد ما نزعنا البدر تاعه ونضيفوا النوادكوكو ونرحو
بعد ما نرحوا نفرغوه في طاس يبرد ونحطوا شط النعناع للنكهة ونخلوه
كي نقربوا نقدموه نصفوه من النعناع
البنة تخيلوا استوائية اممممم
الحلوى : تارت جينواز بكريمة الزبدة والشانتيي
كانت مناسبة عيد ميلاد عجوزتي مالا حبيت نفاجاها بتارت سهلة وبسيطة للسهرة
المقادير
6 حبات بيض
150 غ سكر
150 غ فرينة + ملعقة كبيرة كاكاو
1 كيس خمارة كيميائية
كريمة الزبدة
5 ملاعق كبيرة زبدة او مارغرين انا استعملت لابال
5 ملاعق كبار سكر ناعم
ملعقة كبيرة حليب
دوق فراولة
كريمىة الشانتيي
100 غ شانتيي
100 غ حليب
عصير او شاربات
طريقة التحضير
نضرب البيض مع السكر جيدا حتى يصبح على شكل كريمة
نخلط الفرينة والخمارة والكاكاو ونبداو نضيفوا بالعقل على خليط البيض بواسطة صفاية انا قسمت على 3 مرات ونحرك من تحت لفوق بسباتول
حضرت مول مدورا قطره 25 سم وفرشت فيه ورق الطهي وقسمت الخليط على 3 سخنت الفرن على 180 درجة مليح ودخلت الثلث الاول طاب ياخد تقريبا من 5/8 دقائق نزعتوا وطيبت الثاني فالثالث
من جهة اخرى حضرت كريمة الزبدة والشانتيي
كريمة الزبدة : خلطت الزبدة والسكر وضربت مليح بالباتور وزدتلها ملعقة حليب باش تخفاف وعطر الفرولة باش نحي نكهة الزبدة
كريمة الشانتيي: ضربت الشانتيي مع الحليب البارد مليح حتى ولات كريمة
خليت الجنواز تبرد فرشت الجزء الاول وسقيتوا بعصير كوكتال ومسقيتوش بزاااف لانه عجوزتي تحبها ناشفة شوية خخخ
خليتها دقائق تتشرب وطليت كريمة الزبدة اللي قسمتها على 2 وحطيت القطر الثاني من الجنواز وكررت نفس العملية الاولى سقيتوا وطليتوا بكريمة الزبدة وحطيت القطر الاخير وسقيتوا او شربتوا وبديت التزيين الخارجي
طليت التارت بالشانتيي والاطراف درت فيهم فارميسال شكولا ومن فوق غوزاس كبار بلابوش وفي الوسط حبات مشمش ورشيت شوية كاكاو من فوق
مصورتش كل المراحل لانه بنتي هبلتني هههههه
ملاحظة: للجنواز لكل حبة بيض نستعمل 25 غ سكر