حملة التنظيفات استقبالا للشهر الكريم ،،،تطبيقاتي

[زينب 83]

السلام عليكم و رحمة الله

انا الحمد لله بديت دورة التنظيفات الربيعية و لي توافق تحضيراتنا للشهر الكريم ، حبيت نشارك أخواتي بحملتي التنظيفية عسى أفيد و أستفيد من تعليقاتكم البناءة

الصراحة نحسكم عائلتي الثانية و نحب نشاركم في كلشي و نتقاسم معاكم أفكاري و إنجازاتي مهما كانت بسيطة



اولا انا نحب قبل ما نبدأ بالتنظيف ، نحب نرتب كلشي خاصة الخزائن و نحب كلش يكون مخبأ هكذا التنظيف يجيني سهل ، يعني اول ما بديت بديت بترتيب الخزائن ثم البلاكار



بسم الله

اولا بديت بخزانتي خرجت ثياب الشتاء فرغتها و مسحتها ، وخليت أماكن لثياب الربيع و الصيف

كل رف درتلو 15 دقيقة بينهم وقت راحة







فرغت رفوف خزانة أولادي و اخرجت ملابس الشتاء و مسحتهاو رتبتها





جمعت الأجهزة الخاصة بالشعر في علبة محكمة الإغلاق لانو ولادي يضلو يلعبو بيهم



رتبت أقمصة و les vestes تاع زوجي في العلاقات في الخزانة



رتبت مستلزمات الطرز و الخياطة في علبة و خصصت لهم رف خاص مع الة الخياطة في الخزانة




فرزت درج الكوسميتيك




و هذو حاطتهم في الخزانة يمدو رائحة زكية




كانت عندي صوف مغسولة عندها مدة ، دخلتها في مخايد نظاف و خيطتهم







بعدها رحت للبلاكار

عندي بلاكار كبييييير هو النواة تاع المنزل غسلتو كامل و نضفتو و غسلت الرفوف




الاواني الخاصة بالضيوف غسلتهم و لمعتهم و حطيت معاهم الملاعق و الشوك و المناديل الخاصة ايضا و جمعتهم في علبة و غلقتها و هكذا راح يكونو واجدين في اي وقت نحتاجوهم فيه




تاني جمعت كل الاواني الخاصة بالطهي في الفرن بلاطوات ، مول ، ،،،،،، نظفتهم و جمعتهم في علبة و هكذا يكونو في مكان واحد





جمعت سارفيس القهوة في علبة خاصة مع اطباق الحلوى و الملاعق الصغيرة و termos بعد ما نظفتهم و لمعتهم ، راح يكون واجدين وقت الحاجة




جمعت كل الطوابع و ،،،، الخاصة بالحلوى في علية ايضا احسن من كانو مبعث بن في الدرج




لميت القش تاع الشتاء في اكياس و المفارش تاع اشتاء بعد ما غسلتهم و خبيت العلب لي خبيت فيهم الأشياء من قبل






الحمد لله كلشي مرتب في الخزائن الان الى المطبخ ، نحب نبدأ بيه هو الاول يعني بالصعب بعدو كلشي سااااااهل


غسلت ادراج البلاستيك في الكوزينة



و رتبت الاواني اليومية في الأدراج



غسلت الكويزينيار مليح بإيزيس و خل و منظف جيف رائع



غسلت تحت البوتاجي و فكيت السيفون و غسلتو و جمعت الأشياء الخاصة بالبريكول في علب و خليتها تحت البوتاجي ، و كذا مواد التنظيف في سلة و خبيتها معاها


غسلت الفريجيدار بماء و صابون و مسحت ًو بماء و خل



فرغت ليزيليمون و غسلتهم و غسلت لماعن تاعهم و خليتهم يشيحو



غسلت الطابلة و الكراسي تاع المطبخ*







هذي دايما معمرة ماء ماء و نحطها في المجمد للحالات الطارئة مثل الحروق البسيطة ، او ارتفاع الحرارة عند الاطفال ، او تفادي انفجار الزائدة الدودية او المرارة اذا جات كريز مفاجأة لا قدر الله



وهذي شريتها لجمع الأكياس عملية احسن من كيس القماش



رجعت كلشي لبلاصتو لمعت الزجاج ، و غسلت ليبالكون و غسلت خزان الماء من برى و داخل ر اضفتلو فنجال خل مطهر للمياه










الان الى الحمام

غسلت الفايونس بصابون و خل يبقى يلمع و كذلك الأرضية

غسلت الأشياء الزجاجية بماء و صابون و لمعتهم بالخل الابيض

غسلت العيون و مسحتهم بمزيل الكلس

غسلت خزانة لبلاستيك الخاصة باكسسوارات الحمام

غسلت الباب

مسحت الة الغسيل من برا و درتلها دورة تنظيف من داخل



















يتبع
[/COLOR][/SIZE]

[عازفة الناي]

ماشاء الله عليك نحلة ربي يبارك
كاين عدة افكار نا تاني معتمدتها منها : نلم ادوات الحلويات فعلب والله رااااائعة وعملية
انا حطيت تاع السيليكون وحدهم وتاع الحديد وحدهم و القطاعات الصغار وحدهم
ربي يبارك وان شاء الله تستقبلي رمضان بكل خير ... و يتقبل الله منا ومنكم الصيام و القيام

[layn]

moi aussi je vais commence bientot

[ام نسمة]

الله يبارك فيك وييعطيك الصحة راكي فحلة
انا هاد الاسبوع معولة نبدا ان شالله
واكيد بحاجة افكار وطرق تسهل عليا

[عائشة 88]

بارك الله فيك يعطيك الف صحة

[ام هزار]

ما شاء الله زينب اللهم بلغنا رمضان لا فاقدين و لا مفقودين .............. اميييييين

[اسمهان79]

ما شاء الله وتبارك الرحمان رااااائعة اختي ونموت على المرأة الفحلة اكيد احسن بكثير من اللي تضل نائمة والدود داير بيها
تقريبا نفس الأفكار انا أيضاً نبدأ بالخزائن ولبلاكارات نحي القش اللي ما نحتاجوش الاحذية وحتى الأواني اللي نكره منهم ومن بعد نتتقل لغسل الزرابي والافرشة والستائر تعرفي غير الصوف نتاع لمخاد نغسلها عام بعام
شوفي زينب السلة اللي تحت البوطاجي وفيها مواد التنضيف نفس خدمتي حوايج القاطو بكل انواعهم نفس خدمتك في باطات كبار والى لبلاكار انا عندي بلاكارات بزاف في الكوزينة الحوش الشامبرا الهول والحمد لله بالنسبة للقش نتاع الشتاء ما نستعملش الكابات كيما قتلك عندي بلاكارات يهزو كلش يعني كلش يبقى قريب ليديا اللي نحتاجها نلقاها غير حوايج لبنات عندي صناديق كنت جبتهم من فرنسا نلم فيهم والله عمليين ونافعين نصورهم ونحطهملك تشوفيهم
تعرفي عجبتني فكرة الاكياس انا مخصصتلهم قجر ليهم لكن هاذيك الحية هههههههه اللي راكي معلقتها عجبتني نشري وحدة ونعلقها طول في الحوش والقجر نستعملو في حاجة واحدة اخرى لكن قوليلي شريكتيها من العلمة او من بلاصة واحدة اخرى انتظر الرد
والله راكي فوووور حبيبتي وياريت كل وحدة تفيدنا بافكارها هكذا كلنا نتعلمو من بعضانا
ربي يدوم لمحبة ان شاء الله
في انتضار الباقي ان شاء الله

[ام نوردين]

مماشاء الله زينب روووووووعة كلشى في بلاصتو تبارك الله هاكدا تهنيتي انا بالنسبة ليا نسكن فى ليباتيمو مع خمس اولاد وراهم كبرو دوكة نسا ورجالة وكبر حوايجهم وقد مانفرز مانلقاش روحى كون نبدا نفرز من دوك منا على 3ايام كلشى يرجع كيما كان بصح خملت حوايج الشتا وخبيتهم ونظفت الكوزينة تنظيف عميق وخيطتلها لبسة جديدة كي تقعد ايامات قليلة لرمضان نزيد نغسلها فوق فوق غسلت ليكوات ونفضت شوية صوف كانت عندى مغسولة وخملتها فى المخايد ومعولة نشريلها غلافات جدد وربي ورحمتو
اللهم بلغنا رمضان واعطينا القدرة على الصيام والعبادة والعمل الصاح يارب العالمين
ايه عجبتني هادك تاع الاكياس اول مرة نشوفها ماشفتهاش هنا عندنا في الحوانت بلاك مازال ماوصلتش هايلة خير على تاع القماش بصحتك

[ناهدوران]

زينوبة ربي يسترك من العين اولا راكي الله ايبارك كل صبع بصنعة وراهي الي خاصة بجمع الاكياس ملي شفتها دارتلي السخانة حتى الورق الي مفرشتوا في البلاكارات تحفة الوانو روعة حتى من الدوق في الاوراق وعندك ، الله ايبارك خمسة وخموس عليك رانا ننتاضروا في تنظيف الحمام

[سنا القمر]

ربي يبارك فيك و يستر العائلة

[om kamilia]

44444444444444
مواضيعك كلها جد ررائعة زيينوبةة الله يبارك في صحتك وولادك و زوجك ومالك
احييييك تحية تقدير للمرأة النشيطة وذات القلب الطيب

[om kamilia]

نضيف لكم فكرة على الخزانة انا مووالفةة ندييرهاا نحط ففوقها ورقق الجرائد و نهار يتعمر بالغبار نرميه وتبقى الخزانة محافظة على نظافتها

[أم شاهين]

الله يبارك عليك اختي ويبارك على فحلات الجزائر والله غير قرب رمضان ولازمنا من درك نوجدو رواحنا من كلش هكا باش نقدرو نتفرغو للقرآن والصلاة في الشهر الفضيل
انا بديت السمانة لي فاتت بالكوزينة لانو كي نكملها هي نحس بلي الباقي كاااااااااااامل ساهل وان شاء الله كل ويك اند ندير جهة
ربي يقدرنا كامل ويبلغنا الشهر الفضيل بخير

[ام الياس04]

الله يبارك ربي يسلم يدياتك.انا ثاني كملت النقامزال نخيط دروات جدد وشورة جديدة وعجبتني فكرة العلب هايلة

[أم ماجد]

الله يبارك ماشاء الله عليك زينب فحلة
انا عندي شوية الضيق راني نتعافر مع التنظيم