طريقة أكيدة لتصبحي ربة بيت سعيدة

[أريج13]

السلام عليكن ان شاء الله جميع الفراشات بخير
سي تقبل الله منك
حياتي كلها امل ، ام صفصف ، اروى الاء و باقي الفراشات ربي يوفقكن لما فيه الخير انا بخير اليوم رجعت للمنزل
ليلتكن مباركة

[ام صفصف]

ليلةكم سعيدة حبيباتي، وعندي ليكم طلب، ياريت تعمل تقييم للموضوع حتى يثبت.

[حياتي كلها امل]

اصبحنا واصبح الملك لله والحمد لله ولا اله الا الله
وشراكي اروى يارب تكوني تتحسني
يومكم موفق جميعا

[Sii]

اصبحنا واصبح الملك لله
صباح المحبة لكل الاحبة
امين اختي اريج شكرا على الدعاء نتمنى قضيتي عطلة جميلة
نحن بخير اختي اروى وانت كيف حالك
ام صفصف وشراكي ؟
صباحك سكر حياتي كلها امل كيف حالك
ام شمسو والغائبات نتمنى راهم بخير
ماهو برنامجكم لليوم

[haninefadwa]

جزاك الله خيرا وأثقل الله به ميزان حسناتك وأشكرك على طرحك للموضوع باللغة الفصحى .

[ورود الندى]

صباح الخير خواتاتي انا عندي مدة مانيش مليحة راجلي راح يهبلني الدورو لي يجي يقولي ندير بيه مشروع من تم مايزيدش بيان عندنا 3 سنين زواج كرايين وماعندناش طوموبيل والمصروف ديما ناقص و ختي ربي يباركلهم عام زواج وراح يشريو طوموبيل وديما لبستها جديدة وغير الحطة والتحواس والماكلة مخيرة قولولي كيفاه ندير

[حياتي كلها امل]

اختي ورود الندى كل شيء لازملو تخطيط وتسير حاولي مع زوجك وقوليلو نقسمو المزانية تاع الشهر مثلا قيمة الكراء واخرى للاكل واخري للديون واخري للاذخار و هكذا لانو اذامكانش تخطيط تلقاي نفسك مرت عليكم سنوات ومادرتو والو ربي يوفقك
سي حبيبتي يومك عسل ياعسل انت وكل الفرشات
ام شمسو والبقية اين انتم
انا اليوم جاينا ضياف من البعيد يومكم موفق

[Sii]

ربي يوصلهم على خير ويعينكم حبيبتي حياتي كلها امل
صباح الخير اختي ورود الندى طبقي الشي لقالتلك عليه حياتي كلها امل ولكن قبل لازم تعرفي وين يروحو دراهمو مثلا هل زوجك يدخن ؟ ثانيا اختي ارجوك لاتقارني نفسك باي شخص فلكل واحد ظروفه ممكن زوجها شهريتو اكثر من زوجك ولا زوجها يعرف يتصرف وزوجك لالا ثالثا حذاري تقليلي شوف ختي وراجلها هوما عايشين خير منا هو شرالها هو دارلها لانو لكان حاطة بلي رايحة ديريلو القلب فان مخطاة لانو رايح يعكسك وميديرش بهدرتك انا في اول زواجي عانيت لانو زوجي يصرف دراهم في امور تافهة وكانت ماكلة برا والخرجات بزيادة بلاك تقلي شبيها هادي متحبش تخرج ولا تاكل برا ههههه ولكن يا اختي كل شي في حدود اذا زاد الشيء عن حده انقلب الا ضده وربي يفرجها عليك اختي تقبلي مروري يومك سعيد

[ورود الندى]

شكرا ليكم حبيباتي انشاءالله ندير واش قلتولي وانشاءالله يسمعلي علابالي كترت عليكم مي حبيت تقولولي كيفاه نديرميزانية تاع شهر مع العلم انو انا وزوجي مدخولنا 7 ملاين كل شهر وكراء الدار مليون وكرا حانوت راجلي مليون و متين وعندنا دين 30 مليون وعندي بيبي 18 شهر زوجي يدخن وقهوتو برا وساعات يأكل برا ساعدوني ارجوكم

[ام هزار]

السلام عليكم حبيباتي و رحمة الله تعالى و بركاته
اليوم برك قدرت ندخل للمنتدى من الحاسوب كان شبه معطل . البارح في الليل برك ضربت طلة سريعة بالهاتف و ما قدرتش نكتب . ما فيهش العربية . نراجع و نولي ان شاء الله يوكمن موفق

[arwa alaa]

اختي ورود الندى ملزمش تقارني روحك باي شخص لانو كل واحد وظروفو
وانتي تقدري تنظمي امورك ومن اليوم ابداي بورقة وستيلو
في الاول ابداي احسبي شحال تصرفي على وليدك في الشهر كوش لانجات حليب المهم اكتبي شحال المصروف
خذي الدخل نتاعك واحذفي منو كل مصاريفكم من دين وكرى ومصروف ولدك والي يبقى قسميه على الشهر شوفي انا كان بابا يدخن يمى تحسبلو حتى شحال نبكي يستهلك في الشهر وتقولو اشري كل شهر هك وهك
وحاولي معاه يتقهوى في الدار وطيبيلو
انا بكري في السنوات الاولى لزواجي كان راجلي موالف بالقهوة مع صحابو ويستناوه مع يخرج من الخدمة يقولولو هيا نشربو القهوة انا في الاول كنت نقابض لاني نوجد وهو ميجيش
وليت نوقت قريب يخرج نعيطلو نقولو راني عارضاتك على قهوة ونطيبلو الحاجة الي يحبها معاها ونقصر معاه ونديرلو جو مليح بشوية بشوية ولا يروح لدار ومنبعد يخرج لانك انتي تعوديه على طبعك وبشوية تنضميلو حياتة الجديدة لانو هو تان كان يدخل ويخرج كيما يحب
يقولو وليدك على ما تربيه وراجلك على ماتعوديه

[ام شمسو محمد]

بسم الله الذي لا يضر مع اسمه شيء في الأرض و لا في السماء و هو السميع العليم .
السلام عليكم فراشات ،أسعد الله مساءكن ،كنت في عطلة ....كيف الحال؟

[ام شمسو محمد]

حبيبتي ورود القدرة الشرائية تاع المواطن الجزائري ضعيفة و رااجلك ما عندو ما يدير هذاك ما حلبت ما عندو وين راح يديهم..... خممس ملاين يادوب تكفي في الماكلة

[ام شمسو محمد]

اروى آلاء ،،أم هزار ،سيي ،،حياتي كلها أمل ، أم صفصف ، أريج....أدامكن الله فراشات مرفرفات مفعمات بجمال الطلة و الروح، و أدام االله على الخير إجتماعنا...اللهم آمين.

[ام شمسو محمد]

المشاركة الأصلية كتبت بواسطة haninefadwa

جزاك الله خيرا وأثقل الله به ميزان حسناتك وأشكرك على طرحك للموضوع باللغة الفصحى .

و جزاك الله أختتي ،و يسعدني وجود محبين للفصحى مثلي.