واش اطيبوا كيما ديروا عرضة...

ftage · 2013-12-04, 09:53

السلام عليكم.
نتمنى من الاخوات يعاونوني بوصفات تاع عرضة..لاننا عرضنا خالي وعايلتوا من فرنسا..وهو يحب الرشتة بصح انا مانعرفالهش.
ماذا بيا من الاخوات يساعدوني بوصفتها ووصفة سلطة وتحلية تكون خاصة بمرضى السكري.
لانو هو مريض بالسكر ربي يشافي كل المرضى.
ربي يبارك فيكم...راني محتاجتكم.

نسائم الصباح · 2013-12-04, 10:09

حنونتي أنا حياتي كلها عرضات
ونطيب لضيف حسب وش يحب لاكنت نعرفوا ولا نطيبلوا الحاجة لي ميعرفهاش

مثلا لي من الجنوب والغرب نطيبلهم رشة ولي من الشمال نطيبلهم شخشوخة .خاصتا تاع لبسكرة لأنها محبوبة جدا للجميع هذا في الغداء مع سلايط وديسير
أما لعشى .نطيب شربه معاها طواجن ولا مشاوي ومقبلات
وركن الطبخ راه معمر الله يبارك ويزيد

والرشة كاين وصفة مليحة تاع الأخت السعيدة بربها سارة
https://www.djelfa.info/vb/showthread.php?t=1207182

مرق الرشة أنا نطيبوا أبيض (بصل .فلفل أسود .زنجبيل .جوزة الطيب .قرفه .ودجاج .زبدة ) الخضرة ندير يا جريوات يا لفت والحمص بطبع .هدا مكان
والسر تاع الرشة كي تكوني تعوديها .للمرة الأخية .متعوديهاش بالماء عوديها بنفس مرقها
وتاع مرضة السكر كاين عصير .إذا قدرت لعشية نحطه

ftage · 2013-12-04, 10:33

ربي يبارك فيك يا اختي.
راهي اول مرة نعمل فيها عرضة..ان شاء الله ننجح

نسائم الصباح · 2013-12-04, 11:03

إن شاء الله بالتوفيق
شوفي حنونتي ماكنش خير من العرضات .إدا عملتيها بكل حب وبساطة .حتى وطبخات متكونش فاخرة .إلا أن حب التكريم والترحيم تضفي روعة في الطبخ

لي عنده مرض السكر .أعمليلوا حلى بسكر الخالي من السعرات الحرارية تلقايه في الصيدليات .ولا طيبيلوا حلويات بهدا السكر وبعدي على السكر العادي والزبدة .عوضيه بزيت الزيتون خير