دورة صيفية جديدة

crono · 2018-07-05, 10:10

السلام عليكم و رحمة الله
راني فتحتلكم هذا الموضوع بمناسبة دخول الصيف فهذه الدورة ان شاء الله لمشاركة يومياتنا و همومنا اليومية
اسمحولي درت الروطار
من كثرت التعب والله ما قدرت نكتب وتعبت من الطلوع والهبيط في الدروج
اولا ما اقترحه على كل اخت هو انه االاستيقاظ باكراً وبدا شغالك في الصباح يوفر عليك
الكثير من الوقت ستجدين وقت كافي لبقية يومك **لقضائه مع أهلك أو زوجك أو
ممارسة هواياتك او حتى العناية بنفسك

قَالَ صلى الله عليه و سلم : «بورك
لأمتي في بكورها»..

عند نهوضك من النوم هو الوضوء لصلاة الفجر
* نصلي ونقرا الادكار الصباحية ونبدا على بركة الله نقول بسم الله توكلنا على ربنا
نبدا بالشغل اليومي والطريقة التي اتبعها نصيحتي لاخواتي هي لا تاجل عمل اليوم الى الغد

اطلب من الاخوات يضيفوا اقتراحاتهم ونتمنى كل وحدة تشارك معنا لتعم الفائدة
تدخل تحط تطبيقاتها ومقترحاتها وواش تقدر تفيدنا بيه
الاسبوع الماضي كملت غسيل لفراش و الكوفيرطات

فلي عودة ان شاء الله لاحكي لكم عن بعضها

ام هزار · 2018-07-05, 20:49

الله الله عليك يا كرونو الرائعة وعدت و وفيت بورك فيك
ادن كما قلت اول ما نقوم به صباحا هو الاستيقاظ باكرا لصلاة الفجر و قراءة اربع صفحات من القران الكريم بعد الصلاة مباشرة نحافظو عليها كورد يومي و خير الاعمال ادومها و ان قل
في رايي نبداو بروتين بشيط و لكن مركز باه ما نفشلوش و نثبتو عليه
نقسمو يومنا الى روتينين صباحي و مسائي و كل وحدة على حساب ظروفها
المهم نتفقو في النقاط الرئيسية لليوم و اللي قدرت تزيد عليها
و في رايي نعتمدو اسلوب الفراشة اللي يبدا من الليل في الفرز السريع و تلميع الحوض قبل النوم
يوميا 15 د للمنطق الساخنة سواء صباحا او مساء في وقت محدد
واش رايكم باه نتناقشو و نكملو مع بعض حبيباتي
عفوا عندي ملاحظة نحطو قانون لتصفح النات الصراحة نجي نشوف حاجة وقتي كامل يروح في حوايج اخرى على النات
الحمد لله لا علاقة لي بالتلفاز و الهاتف نقصت منو بزاف
يعني باختصار نحاولو نتخلصو من المعيقات في حياتنا باه يبقالنا الوقت لعائلاتنا و انفسنا

جهينة اليقين · 2018-07-05, 22:12

السلام عليكم شكراا كرونو على افتاح الدورة الجديدة
كيم قلت انت وام هزار راهي السخانة ولازم نخدمو شغانا بكري كيم انا في الصيف عندي برنامج مكثف
راني اكتسبت عادة جديدة بنتي تغسل ماعن العشاء وانا نسيق الهول والكوزينة وننقي الدوش والتواالات حشاكم ونعطر الحالة نتعب بصح فالصباح نكون مرتاحة نفسيا
نطيب القهوة ونغسل لماعن والى الخياطة مرات بنتي تدير الفطور ومرات اذا كانت عندي خرجة كذلك ما نضيعش وقتي فالشغل
راكم تعرفو الصيف تاع المناسبات والضياف واصحاب الفاكونس
راني كملت غسيل الفراش الحمد لله ودرتهم في دراوات قدم باش يبقاوا نقيين
على فكرة يا كرونو الخلطة تاع القرنفل والليمون راني معتامدتها غير تخلاص نعاودها طبيعية ورائحتها روعة سلام

ام هزار · 2018-07-06, 13:15

السلام عليكم و رحمة الله تعالى و بركاته
اللهم صل و سلم و بارك على سيدنا محمد صلاة لا تنقطع ابدا
شكرا جهينة على الاضافات اللي تفضلت بيها من فضلك ما هي خلطة القرنفل و الليمون
شريت كيسين من الكريستو باه نغسل بيه القش الابيض و بقلي البساطات قلت غدوة ان شاء الله نوض ليهم بكري نغسلهم و اليوم نحط مخططي بادن الله في ورقة و نكتبولكم
ربي يعاونا و يعاونكم

samophisique · 2018-07-06, 20:11

السلام عليكم شكرا اخت كرونو على هذه الدورة الصيفية عن نفسي لا زلت في غسل الافرشة نغسل مع العين فقط واش هي خلطة القرنفل والليمون و كريستو مخصص للغسيل الابيض ممكن صورته نتمنى التوفيق للجميع

جهينة اليقين · 2018-07-06, 21:25

https://www.djelfa.info/vb/showthread.php?t=2134181
هذا هو رابط الخلطة

crono · 2018-07-06, 22:16

مساء الخير فراشات وجمعة مباركة للجميع ام هزار;جهينة اليقين اختي samophisique مرحبابيك معنا ربي يباركلكم في ايامكم و اهليكم يا رب ن شاء الله راكم كامل لاباس
وش راكم،كاش نشاط رايحين ان شاء الله نهدرو بالتفصيل على كلش باش يستفادو الاخوات خاصة الجدد

ام هزار · 2018-07-06, 23:16

شكرا جهينة على الرابط و الشكر موصول ايضا لصاحبة الفكرة كرونو
اختي صامو فيزيك الكريستو هو بلورات الصودا يتباع في اكياس مثل الشب و في اعلى الكيس مكتوب نصاح بالفرنسية تلقايه عند الكانكايري

crono · 2018-07-07, 11:29

اقتباس:

المشاركة الأصلية كتبت بواسطة جهينة اليقين

https://www.djelfa.info/vb/showthread.php?t=2134181
هذا هو رابط الخلطة

اقتباس:

المشاركة الأصلية كتبت بواسطة samophisique

السلام عليكم شكرا اخت كرونو على هذه الدورة الصيفية عن نفسي لا زلت في غسل الافرشة نغسل مع العين فقط واش هي خلطة القرنفل والليمون و كريستو مخصص للغسيل الابيض ممكن صورته نتمنى التوفيق للجميع

اقتباس:

المشاركة الأصلية كتبت بواسطة ام هزار

شكرا جهينة على الرابط و الشكر موصول ايضا لصاحبة الفكرة كرونو
اختي صامو فيزيك الكريستو هو بلورات الصودا يتباع في اكياس مثل الشب و في اعلى الكيس مكتوب نصاح بالفرنسية تلقايه عند الكانكايري

اصبحنا واصبح الملك لله والحمد لله
اللهم اعنا على ذكرك وشكرك وحسن عبادتك

اللهم صلي وسلم وبارك على سيدنا محمد

استغفر الله العظيم الذي لا اله الا هو الحي القيوم و اتوب اليه

لا اله الا انت سبحانك اني كنت من الظالمين

سمحوني الضوء ايجي و يروح

شكرا جهينة على الرابط و شكرا اختي ام هزار على الرد

اختي samophisique الكريستو يتباع عند لي يبيع منتجات التنظيف أو عند الكنكايري هو عبارة عن بكربونات صلب هوليك
هادي صورة

ليعودة

ام هزار · 2018-07-07, 12:05

صباح الخير كرونو و يومك موفق بادن الله
حبيت نعرف منكن فراشات كيفاه راكم منظمين وقتكم تاع النوم كون صلاة العشاء متاخرةو الفجر مبكرة ؟
هل مواعيد النوم تاعكم ثابتة ام متغيرة و هل لما تصليو صلاة الفجر ترجعو للنوم ام لا ظ

samophisique · 2018-07-07, 12:20

السلام عليكم شكرا للاخت كرونو والاخت ام هزال و صاحبة الرابط اليوم ان شاء الله نكمل لفراش كتجي العين ونغسل المجمد و 20 دقيقة لتنظيم كنابيات كوفر اذا كتب ربي نغسل باب الدخول كل هذا مع العين لانها ازمة ماء عندنا

ام شمسو محمد · 2018-07-07, 16:49

بسم الله الرحمن الرحيم
السلام عليكم و رحمة الله و بركاته
تحية طيبة لاركان الدار حبيبتنا جهينة و الغالية ام هزار و الرائعات ام هاجر و اروى الاء و ام البنين و خاصة صديقتي الغالية رندا ...توحشتكم بزاف
المتالقة كرونو شكرا جزيلا على الطرح الكريم لدورة جديدة ...نتمنى تحقق التفاعل المطلوب و نتعاونو مع بعض في تحقيق النفع لعائلاتنا و بيوتنا انا بالتاكيد معك باذن الله حسب الظروف
اتمنى كل فرااااشااااتنا الجميلات يرجعو يزهيو الصفحات و ينثرو الورود و نعمرو اوقاتنا بما فيه الخير لنا جميعا في الدارين

ام شمسو محمد · 2018-07-07, 16:58

بالحديث على البرنامج و الاهداف ...الصيف مربك قليلا و يخلي الاعمال غير ثابتة و الاهداف المعقولة صغيرة شوية
كيما تكلمت الحبيبة ام هزار بالنسبة لمواعيد النوم و الاستيقاظ هي التحدي الاول لانو بالنظر لظروف العطلة نرقدو متاخرين و نجاهدو غالبا في الاستيقاظ لصلاة الفجر و في الصباح بصعوبة باش ينوضو لولاد و نبداو الشغل
و لوجود الاطفال في عطلة ننصح الجميع بالتفكير في قضاء الاوقات النوعية معاهم حصص صغيرة لتحفيظ القصار ...دروس بسيطة في اللغات الاجنبية ...قراءة كتاب من السيرة او قصة ...جلسة فيلم رسوم متحركة او خرجة للاكل في الخارج....الخ... هذو مهمين جدا في حياة الاهم في حياتنا اللي هوما اطفالنا ..

هذي الظروف كامل تطالبنا بالمزيد من الانضباط و التحضير و التركيز لانو باش نقدرو نعيشو حياتنا الاجتماعية و نقدمو خدمات نوعية لاولادنا لازم نكونو مرتاحين ذهنيا و منسجمين نفسيا و مطمنين على نظافة بيوتنا و انجاز اعمالنا و ادارة وجباتنا ....لذلك الصيف تحدي كبير لينا لازم كربات بيوت و امهات لازم ننجحو فيه

ام شمسو محمد · 2018-07-07, 17:03

بالنسبة ليا شخصيا كيما قالت جهينة و ام هزار معتمدة مبدا الروتينات
الروتين المسائي
و روتين الصباح
و نجتهد في انجاز الساعة الاسبوعية
و حريصة على تخصيص موعد يومي للاعمال الاضافية قل او كثر
الوجبات نخططلهم على اسبوع و نبداهم الصباح مع روتين الصباح مع الحرارة و الدخلات و الخرجات هذي الطريقة الوحيدة باش نقدر نطيب ههههههه.
النهار عموما طويل اللي عندو اهداف كبيرة او حاب يدير حاجة معينة كيما الخياطة او اي مشروع اخر ..
في انتظار ماعندك القائدة كرونو

ام شمسو محمد · 2018-07-07, 17:30

الحاجة الاولى لي راني حابة ننظمها في هذي الدورة هي خزانة الاطعمة
نعاني من الفوضى فيها و احيانا يكون عندي حوايج كي نسحقهم مانلقاهمش و كي ننساهم و نبدا نفرز نلقاهم
نبدا باذن الله بشراء علب و سلال نصنف فيها كل فئة من الطعام وحدها هكذا ما يروحلي والو و نلقاه بسهولة

كي نحطهم في البلاكار طول بلا حاويات يتخلطو و يزيدو عليا الشغل ...كل اسبوع نرتب البلاكار

الصور من الانترنت