ماهي توابل الشربة فريك؟

[lilyann]

المشاركة الأصلية كتبت بواسطة ام شرفو

على حسب الشوفة الاذواق تختلف من بيت لبيت
و تجربتي الخاصة هي جربي كل وصفة الي قالولك عليها الاخوات واعتمدي الوصفة الي تعجب العائلة
انا كنت نحط الثوم ونرابي حبة قرعة (جريوات) وحبة زرودية(سنارية) وراس الحانوت ومرة جرت طريقة ام كوثر بصح زدت مغرفة زنجبيل ونحط فلفل حلو

هادا صح سر بنتها شكرا لك اختي
لانو عندي اختي ديرها كيما انتي ودايما تعها بنينة ياسر
اما تاعنا تاني بنينة وكيما قالو الاخوات الملح+الفلفل الاسود و الدبشة والمعدنوس ولازم تقلي مليح وطيب في برمة تاع طين تجي هايلة

[هند لميس]

احنا عندنا فى قسنطينه نديروها باللحم او الدجاج او باللحم والدجاج وشربه الفريك باللحم تكون اطيب


ونحط البصل و الدبشه والكرافس واللحم والزيت والملح وفلفل لكحل يتقلاو حتى يذبل البصل من بعد نزيدوا الطماطم المصبرة وطماطم حب مرحيه ونزيد نقلى

من بعد نمرقوها وكى تغلى اذا لحم نخليها شويه واذا دجاج نضع الفريك وبالنسبه لصحنين كبار من الشربه يكفيهم فنجال فريك

ونخلك باه ما يتكورش ونخليه يطيب

من بعد كى يطيب نرمى غصن كرافس وراس فلفل حار ونخليها تغلى شويه ونطفى

واللى يحب يزيد كويرات لحم مرحى اى الكفته


وكى نقدمها نحطهافى الصحن ونزيدلها من فوق الدبشه مقصوصه



واذا ما فهمتيش اى حاجه رانى حاضرة

[yasamine2009]

ahna ndiroha belbssal osnina thom lham ola djaj ahchich chorba melh falfal akhal rass alhanout ahmissa m3achwia djebana tomat hab omsebra haba courgette oheba zrodiya ozit ozebda okhalih yetkela mlih memba3d merki ida alham khalih itib achwiya idajaj yerla alma armi lefrik ofi alakhir adjabdi hadik zrodiya ocourgette ochwiya merka zidilhom ahchich ofelfel ahlou orapè kolach ozidihom lchorba ida jatek chwia 3akda zidilha alma mrali
m3a alakhir armilha habba felfal har o ahchich chaia tayiba

[1954مريم]

السلام عليكم ورحمة الله تعالى وبركاته

اختي والله الطريقة التي استعملها وتخرجلي بنينة وربي يبارك

اولا : نقطع اللحم ونرابي الطماطم الحب ونرابي جزر والجريوات
ودون قلي "
نضع الماء الكية المناسبة ونرمي كل شئ مرة وحدة ونزيد الزيت والتوابل خاصة فلفل اسود وراس الحانوت والكبابة ولبسباس
ونجمة الارض . والحمص والثوم كل التوابل ونار هادئة .
وكاين طريقة اخرى تخرج هايلة وهي
نحكم اللحم ونتبله بالبصل والطماطم والملح وراس الحانوت والزيت ونتركه جانبا لمدة
ثم نقلي اللحم لمتبل ونزيد طماطم وفلفل وشوية راس الحانوت لانه في الوسط احسن
ثم نمرق ونتركها تطيخ ثم نرمي لفريك وتكون نارهادئة
وقبل ما طيب تزيدي فلفل اكحل وحبة حلاوة وكروية ودبشة تطحن مع التوابل تجي بنة تهبل ثم مدة 5 دقائق ونضيف الرند
او لمعدنوس وفللفل حار بلا ما ننس الثوم وكل التوابل .

التواب الخاصة والتي تعطي بنة هايلة
هي تكون راس الحانوت بنين من الممكن تخدميه في البيت احسن لانه كاين وين نشروه ويكون مر .
كذلك حبة لحلاوة سر كبير ولبسابس في الاخير
كبابة وفلفل اكحل ونجمة الارض رائحتها زكية .
بالنسبة الى اضافة الطماطم المصبر من الاحسن والافضل تقليه وتضيفه يعطي بنة هايلة خير من اضافته مباشرة .

وربي يعيط رمضان بالخير والتوبة وغفر الذنوب يارب

[wafakhe]

vs avez oublier rabta hchiche c tré important ds la chorba frik

[شبيلة]

سر شربة الفريك في التقلية و في نوعية الفريك إليكم طريقتي نأخذ قطع اللحم و نضيف لها الثوم البصل طماطم حب مرحية ملح فلفل أسود فلفل أحمر حار وحلو كسبر راس الحانوت شوية زيت و نخلط اللحم مليح مع التوابل و تخليها مدة ساعة ثم نضعها في قدر و نضيف لها قليلا من الكرافس و الدبشة و رأس فلفل حار و نقصي للنار و خليها تتقلى مدة 20 دقيقة ثم مرقي مرة واحدة بماء ساخن و أضيفي طماطم مصبرة لما تغلي 5 دقائق تذوقي المرق و عدليلها الملح غطيها لما تشوفي اللحم قريب يطيب أغسلي الفريك قطريه و أضفيه للشربة مع ورقة رند و عود كرافس و ريشة نعناع امممممممممممممممممممممممممممم روعة روعة

[attia dalila]

انا نفيدك بطريقتي ساهلة ماهلة والمفضلة عند عائلتي الكبيرة والصغير.......حوحو يشكر روحو.............لا استعمل البصل نستعمل الثوم فقط والملح نقلي الحم والفريك فقط ااكد فقط لان الكسبر في البداية يبدل لون الاحمر ويعطي مرارة وطبعا الطماطم المصبرة ولما تطيب في الاخير قبل مانطفي النار بحوالي 5دقائق نرمي فلفلة خضرة ماتخافيش ما تتلقش الحار اذا ما افتحتيهاش والكسبر او الحشيش مقطفة وفي الاخير الخلطة السحرية وهو افاح بوسعادة لانني جربت راس حانوت جميع المناطق ووجدته الافضل ويتكون من 50غ بسباس 50غ كروية 100غ كسبر حب وبالتوفيق......................................... ......................على فكرة اريد اضافة اكتشفتها من عتد عجوزتي ربي يطول في عمرها تعطي نكهة خاصة لشوربة الفريك هي تضيف له في قدر اربعة اشخاص ملعقة عدس مقشر والحمد لله الآن متوفر في الاسواق لانني رايتها تقشره بمطحنة الفريك والفيلة مقشرة ايضاملعقة ايضاوالحمص حب

[arbicho]

hena nediro fel chorba lekasbare marehi

[imanaz]

كاين خليط تاع الشربة يتباع في الاسواق انا نشريه تاع الميزان هايل

[panpouna]

السلام عليكم
الاخت لي قالت شربة فريك ما تجيش بالقرفة راهي غالطة..حنا نديرولها عود صغير قرفة راس حانوت عكري فلفل و كاين لي يزيد فلفل حار مرحيي
نقلو بصل لحم خروف و التوابل مليح نزيدو زرودية قليلشة بطاطا و طماطم رابي قصبر و نعناع تزيدي تقلير و تزيدي طماطم مصبرة محلولة في نص كاس ماء مغلي تخليهم 15د تمرقي بما سخون و كي تطيب الخضرة ارحيها و زيدي لفريك وتقدميها بقصبر و نعناع من فوق و عصرة قارص(هادي وصفتنا في بواسماعيل و ضواحيها)
كل ولاية عندها وصفتها و كامل بنان

[خفيفة الظل]

المشاركة الأصلية كتبت بواسطة attia dalila

انا نفيدك بطريقتي ساهلة ماهلة والمفضلة عند عائلتي الكبيرة والصغير.......حوحو يشكر روحو.............لا استعمل البصل نستعمل الثوم فقط والملح نقلي الحم والفريك فقط ااكد فقط لان الكسبر في البداية يبدل لون الاحمر ويعطي مرارة وطبعا الطماطم المصبرة ولما تطيب في الاخير قبل مانطفي النار بحوالي 5دقائق نرمي فلفلة خضرة ماتخافيش ما تتلقش الحار اذا ما افتحتيهاش والكسبر او الحشيش مقطفة وفي الاخير الخلطة السحرية وهو افاح بوسعادة لانني جربت راس حانوت جميع المناطق ووجدته الافضل ويتكون من 50غ بسباس 50غ كروية 100غ كسبر حب وبالتوفيق......................................... ......................على فكرة اريد اضافة اكتشفتها من عتد عجوزتي ربي يطول في عمرها تعطي نكهة خاصة لشوربة الفريك هي تضيف له في قدر اربعة اشخاص ملعقة عدس مقشر والحمد لله الآن متوفر في الاسواق لانني رايتها تقشره بمطحنة الفريك والفيلة مقشرة ايضاملعقة ايضاوالحمص حب

يعطيك الصحة اختي انابوسعادية ولا اتخيل الفريك بلا كروية اوكسبر يابس او بسباس


علىالعموملكل منطقة عاداتها ونكهتها الخاصة والمميزة طبعا

[ام ظافر]

الشربة تختالف من ولاية لاخرى وفي نفس الولاية من منطقة لاخرى وفي نفس المنطقة من بيت لبيت حتى انو في نفس البيت وكل بنت شربتها تختلف عن شربة اختها او امها
يبقى عليك تجربي حتى توصلي للنتيجة الي ترضيك وترضي اسرتك
جربيه بالبصل والثوم وشوفي والا ماعجبكش جربي بالثوم فقط مثلما قالو الاخوات
جربيه قلي كل شيء جيدا ثم جربيه بارد في بارد وشوفي لاني جربت مرة كنت مستعجلة واللحم جامد اضطريت نخلط كل شيء مع الماء وبعدها صفيت المرق وضفت الفريك والطماطم المصبرة هزو غلية مليحة وثقالت المرقة وحطيت عليها رشة نعناع والله استغربت انو النتيجة نفسها كيما كنت نقلي مدة طويلة وعرفت انو الفرق يكون في نوعية الفريك نفسو او نوع التوابل فقط

[oum rayannou]

بعد بسم الله الرحمان الرحيم ،اختي الفاضلة السر في شربة الفريق هو اختيار اللحم إلا و هو لحم الخروفمع التقية الجيدة قدما تقل البصل مع اللحم و التوابل قد ما تجد الشربة بنينة