موضوع مميز ~~ ابداعي في تشكيل المعجنـــــات ~~

ladymillion · 2013-09-24, 04:34

أهــــلا بكم في موضوعي البسيط لمسابقة ابداعي في تشكيل المعجنات

يشرفني المشاركة في هذه المسابقة وأوجه شكــر خاص للمشرفات لي عطاوني فرصة المشاركة اول مرة وبالتوفيق لباقي المتشاركات

ان شــاء الله نفيدكم ولو ببعض الافكار البسيطة لي راح تشوفوهـــا معايا ونتمنى تعجبكم أفكاري بالخطوات بعجينة الكرواسون للإلهام الحبيبة كان اختيار مناسب بالنسبة ليا

عملت بالعجينة مالح وحلو ،تشكيلات متنوعة للاطفال ، فطور ، مقبلات ، تحلية

هذه صورة تجمع جميع التشكيلات بالعجينة

هذه العجينة قبل وبعد التخمر باتباع مقادير الوصفة عملت مالح وحلو

رابط وصفة كرواسون الهـــــــــــــــــام
https://www.djelfa.info/vb/showthread.php?t=1206332

راح نبدأ بالمالح باول حاجة عملتها

Bread Bowl

حاجة سهلة بكمية من العجين انا حبيت البول يكون متوسط طبقت العجينة وحليها بيدي شوي برك وشكلتها كرة صغيرة حتى تكونتلي عجيتة ملساء ومكورة درت فوقها خطوط بالسكين بالخف ورشيت شوي فرينة من فوقها بالمصفاة وخليتها تتخمر

قبل وبعد التخمر

كي تتخمر ندهن البيض ونحطها طيب على 220° والرف فوق

هكذا كي طاب نقطع راس الخبزة بالسكين وتشكلي غطاء للبول والعجينة جات مورقة الله الله هههههههه وخفيفة نزعت شوي من العجين من الوسط

وكنت محضرة خضروات مقلية + زيتون اخضر + لحم مفروم طايب متبل + فروماج رابي + بيضة

حطيت الحشوة في الخبزة وخفقت البيضة بالشوكة وسيحتها فوق الحشوة وزدت رابيت فروماج فوقهم وحطيتحم في الفرن مشغل من فوق يطيب البيض والخبزة تكون مقرمشة

هاهي واجدة تجي لذيذة وتصلح خبيزات صغار كمقبلة او مع الحساء

الفكرة الثانية

راح نوريلكم عجينة بشكل عصفور محشي بالجبن

نفرد او نحل كمية من العجينة وشكلتها بالسكين بالشكل لي في الصورة والطرف السفلي يكون شوي ضيق حطيت الجبن ودهنت شوي ماء على الاطراف وغلقت باحكام ونزعت الاطراف الزائدة وشكلت حربوش

وعملت عقدة بالحربوش وحاولت نعدل الرأس ونضخمو شوي والذيل عملتو بالسكين والعينان درت السينوج او القرنفل وخليتو يتخمر

بعد وقبل التخمر وقبل الطياب دهنتو بالبيض وحطيتو يطيب 220°

راح يحبوه الاولاد بزاف

الفكرة الموالية كرواسون عادية بالحشوة بشكل سلطعون

حليت العجينة طوليا وقطعت مثلثات بالسكين مع قطع خط قصير في الوسط

ونطبق الطرفين الصغيرين ونكمل نلف حبة الكرواسون وكي لعادة تتخمر وندهنلها البيض + زعفران حين ندخلها الفرن

بعد ما طابت قسمتها على اثنين

وحطيت حشوة كيما الهمبرغر وفي الخير زينتها اليكم الصورة النهائية

فطيرة الورود

طريقة عملها سهلة وماتديش الوقت

الحشوة عملت طون طمااااطم وجبن أبيض طري مخلطين مع بعض (( مجربين مايديروش حساسية ))

حليت العجينة بالحلال بسمك 0,5 سم وطبعت دوائر تكون بـقطر 10 سم بالنسبة للطبقة الاولى

ندهن اطراف نصف دائرة بالماء ونحط شوي حشوة في الوسط وغلقت الاطراف باحكام بالضغط على العجينة تكون عندنا بشكل كورني

نرش الصينية بالفرينة ونحط كل ما نعمل دائرة نحطها في الصينية ونبعدها غير شوي على بعض حتى نكمل دور الصينية

التالي زدت فردت العجينة وطبعت دوائر 8 او 9 سم اقل بشوي على الدوائر الاولى وعملتها كيما الكبيرة نفس الطريقة

وحطيتها فوق الوردات و وقفتها شوي عليهم كيما موضح في الصورة

في الوسط عملت وردة ووضعت في وسطها طماطم

قسمت دائرة على اثنين وحطين كل قطعة فوق القطعة لي تليها من الاطراف ولفيت العجينة على الطماطم وفتحت شوي وراق الوردة وحطيتها في وسط الفطيرة ونخليها تتخمرررررررررر

قبل وبعد التخمر بالطبع ندهن بالبيض وطيب في 180°

قدمتها مع الجبن والطون بقالي من الحشوة بالطبع لذييييييييذة لا تقاوم طعمها وخفت العجينة

العمل الاخير من العجينة المالحة

أزهار بالدجاج المفروم

طريقة تتبيل الدجاج كالاتي

(( نصف صدر دجاج + 2 م ك حليب + ملح حسب الحاجة + فلفل اسود + رشة جوزة الطيب + 2 م ك عصير ليمون )) وفرمتوا في الروبو لازم يكون رطب

بالنسبة للعجينة حليتها بالحلال طبعتها دوائر بقطر 10سم نحتاج 2 دوائر للوردة الواحدة

نحط كمية من الدجاح المرحي فوق دائرة وندهم الماء على الأطراف ونحط الدائرة الثانية ونغلق الاطراف ونحاول منخليهاش تبان

قطعت بالسكين 8 خطوط من دون الوصول للوسط كيما في الصورة

وناخذ كل جهتين وندورهم لبعض نقابلهم يعني شوفوا الأسهم كيفاش رسمتهم باش تفهموا لان في هاذ اللحظة ملقيتش لي يصورلي مليييح

ويكون شكلها كيما هاذي ونمسك الاطراف مع بعض نلصقهم ملييح في بعض

نخمرها وندهنها بعد التخمر وفي حين ندخلها للفرن 180° حتى تتحمر وطيب وتزيد تتنفخ أكيد يجي شكلها هااااااااايل

هنا درت وردة بخمس اوراق ايضا قطعت 10 خطوطو بدل من 8

وقدمتها تصلح مع سلطة ايضا

~~هاذو افكاري وتشكيلاتي بالعجينة مالحة نتمنى يعجبوكم ننتقل للحلو~~

ـ تحلية التفاح المحشي بالنوتيلا

يكون ملفوف بالعجينة اكيد

نحتاج تفاحة مغسولة مقشرة ونحتفظ بالغصن الصغير لي يكون من فوق

نقطع الجزء العلوي من التفاحة كيما ظاهر في الصورة ونقيه من القشور المتبقية فيه

نحفر التفاحة بملعقة نفرغها شوي من اللب نتاعها

نحك ليمون للتفاحة

حضرت سكر وقرفة مخلطين

مرمدت التفاحة في السكر والقرفة

وعمرت التفاحة بالتونيلا فقط

حليت العجينة ونقطع شرائط 1سم ندهنها بشوي ماء ونبدأ نلف التفاحة بالعجين من تحت الى فوق كي نوصل للفوق نضع الجزء العلوي لي قطعتو مع الاول يعني ترجع تفاحة كاملة ونكمل نلفها بالعجينة

عملت ورقة من العجين ونحضر العود الصغير

نحط الورقة من فوق ونثبتها بالعود لي نزعتو من التفاحة وهاهي حاضرة باش تتخمر

خليتها تخمرت ودهنتها بالبيض + قطرة خل ودخلتها طيب علة مهلها 180° والرف يكون فوق

وقدميها تحلية مشبعة هههههه

ـ تارتولات الياسمين

بعد ما حليت العجينة بالحلال بسمك اكثر بشوووووووي من 0.5 سم شكلت مربع القياسات كل واحد واختيارو المهم يكون مربع

قطعت بالسكين الخطوط الظاهرة في الصورة

واخذت كل زاوية الى وسط المربع وثبتها بحبة قرنفل

هذه ماخليتهاش تتخمر بزاف 10 د ودخلتها طيب ومدهونة بالبيض طبعا

بحرارة 220° حتى طيب

تتقدم مع كريم باتيسسير وفواكه أو نوتيلا وتكون مع الفطور او معجون او كريم شانتيي

بابيون بالنوتيلا

هاذ الشكل كنت عملتو من قبل في واحد من مواضيعي وحبيت نزيدوا في هاذ المسابقة ممكن لي ماشافوش يستفيد منه وراح يحبوه الاولاد خاصة البنات

الحشوة تكون نوتيلا خيرتها لقيها هي الاحسن بالنسبة لهذا الشكل

فردت العجينة بالحلال بسمك 0,5 سم شكلت مربع ونطويه على اثنين من زاوية لزاوية

الصورة تشرح اكثر

نحشي الاطراف بالتونيلا ونغلق ونقطع الجزء السفلي في الوسط وتكون جاهزة

خمرتها لنصف ساعة تقريبا ودخلتها للفرن طيب

هايلة مع الحليب للفطور للاولاد

ملفوف حلو بالاسياخ

حاجة بسيطة جدا لكن مفرحة للاولاد خاصة للفطور او كوجبة خفيفة

نحتاج كراميل وسكر واسياخ خشبية نتاع الشواء

بعد فرد العجينة وتقطيها شرائط 1 سم نلف العجينة على الاسياخ

ونمرمدها قليلا في الكراميل ومن بعد في السكر ونحط ورق المنيوم فوق الصينية لان الاسياخ فيها السكر راح يلصق في الصينية

نخليها تتخمر نطيبها ماندهنهاش بالبيض

وتقدم في كؤوس مع الحليب

قلوب بمعجون الفراولة

خصيصا للاطفال ومناسبات اعياد الميلاد فكرة بسيطة وروعة في نفس الوقت

نطبع العجينة قلوب ونضغط برؤوس الاصابع في وسط القلب ونحط شوي معجون الفراولة ونغلق بقلب آخر وبالشوكة نضغط على الاطراف

بعد ما تتخمر راح ندهنها بالبيض ودرت فوقها حلوى الفرميسال حمراء

كي طيب تقدم في اسياخ ونحطها في كأس

بسيطة عملا وتقديما

انا بقاتلي شوي من العجينة الحلوة درت بها كويرات فيهم النوتيلا وكي طابو تنقخوا غلفتهم بالشوكولا وزينتهم وقدمتهم في كيسات

هذا عملي المتواضع جدا لهذه المسابقة نتمنى ينال اعجبكم ولو في فكرة واحدة

خالص تحياتي لاحلى عظوات المنتدى لي جمعني بيكم

ام ولي · 2013-09-24, 04:46

تسلم الايادي بالتوفيق ان شاء الله

ام فريال · 2013-09-24, 06:34

تسلم ايديك ويعطيك الصحة راااااااااااااائع

نجمة ساطعة · 2013-09-24, 06:54

روووووووووووووووووووعة يعطيك الصحة و الراحة اشكالهم تحفة

عجبني كذا شكل من بعد ان شاء الله نحط صورهم لاني مزروبة

و هذيك اللي حشيتيها تفااحة بالشوكولا هبااااااااااااااال رائعه

بالتوفيق

شمس 15 · 2013-09-24, 06:54

بسم الله ماشاء الله عليك فنااااانة بمعنى الكلمة

نجمة ساطعة · 2013-09-24, 06:55

بصح ليدي حطيتي الموضوع على 4.30 خلعاتك ام كوثر وقيلة

hadjira195 · 2013-09-24, 07:00

ماشاء الله ماشاء الله

*ام رامي* · 2013-09-24, 07:04

ياااااا سلااااااااااااااااااااام
ليدي انت قدمتيلنا موسوعة من المعجنات
كلشي روووووووووووووووعة

بارك الله فيك
بالتوفيق

ilbeldelmondo · 2013-09-24, 07:04

ربي يوفقك أختي راكي تعبتي بزاف و زادت النت ماكانش تجي غير في ليل و تروح صباح
يارب يقدرو العضوات مجهودك و افكارك

aziza05 · 2013-09-24, 07:25

ماشاء الله ماشاء الله

oum anas 69 · 2013-09-24, 07:31

الحقيقة إستمتعت كثيرا بمشاهدة الصور بتفاصيلها يعطيك الصحة حبيبتي عمل جبار باين بلي تعبتي بزاف عليه .. عجبوني الأشكال بزاف و معظمهم شايفتهم كيما العصفور و البابيون أما الباقي روعة عزيزتي
كيما قاتلك أم رامي الغالية راكي أعطيتيلنا موسوعة من المعجنات
موفقة عزيزتي