انوي بوقالة على العضو اللي يجي بعدك - الصفحة 11

مجيد 88 · 2014-03-22, 22:11

السلام عليكم عدت من جديد لبعث الموضوع من جديد

مياسم الصمت · 2014-03-23, 07:37

أصلك أصلك و ما ينفع غير الصح مولاة النية الصافية عليها ربي يفتح أطول و لا تقصر يجيها السعد و الربح

* عبد الجليل * · 2014-03-23, 07:46

السلام عليكم
باسم الله بديت ..و على النبي صليت …وعلى أصحاب الأسماء ألي تبدأ بالتاء هذى البوقالة نويت…
لو كان السعود تنغرس بالعود نغرس ميات عود في وطيّة ، لكن السعود بيدّك يا معبود . يا سقام السعود سقم لي سعدى.
و حكمتكم :تجنب شؤم الهزل ، و نكد المزاح.

* عبد الجليل * · 2014-03-23, 07:47

السلام عليكم
باسم الله بديت ..و على النبي صليت …وعلى أصحاب الأسماء ألي تبدأ بالثاء هذى البوقالة نويت…
طلعت للغابة ، صبت الضّرو يابس ،قتلوا يا ضرو القمر يمشي ولا حابس ، قالي مفرش زربية وحذاه طاوس .
و حكمتكم : ثمرة العلوم العمل بالمعلوم.

مياسم الصمت · 2014-03-23, 07:48

يا مولاة القلب الكبير ربي يعطيك و يوسع عليك ما عندك لا ذهب و لا حرير و أنت دايما زاهية و ربي مسهلك ما دريت من حيلة ندير باش نكون مثلك .

* عبد الجليل * · 2014-03-23, 07:50

السلام عليكم
باسم الله بديت ..و على النبي صليت …وعلى أصحاب الأسماء ألي تبدأ بالجيم هذى البوقالة نويت…
رشّيت عتبة الباب بالزهر و الطّيب ، وسقيت كل الأحباب بالعسل و الزبيب ، و كى نسيت جاني جواب كنت نستناه من عند البعيد.
و حكمتكم : جد بالكثير ، واقنع بالقليل

* عبد الجليل * · 2014-03-23, 07:51

السلام عليكم
باسم الله بديت .. و على النبي صليت …وعلى أصحاب الأسماء ألي تبدأ بالحاء هذى البوقالة نويت…
مدّيت لقاع البير و فرّشت زربية ، حرقست حرقوس ذهب من راسى لوذنية ، فرحي يا يما سعدى زها ..و استشفاي في العدو إلى استشفي فيّ .
و حكمتكم : الحازم من كتم سرّه

* عبد الجليل * · 2014-03-23, 07:53

السلام عليكم
باسم الله بديت .. و على النبي صليت …وعلى أصحاب الأسماء ألي تبدأ بالخاء هذى البوقالة نويت..
يما يما ديريلي تويقة في وسط الحديقة باش نشوف زهرى كي تجيبو ذيك الوريقة.
و حكمتكم : الخَرَسْ خير من الكذب .

* عبد الجليل * · 2014-03-23, 07:54

السلام عليكم
باسم الله بديت ..و على النبي صليت …وعلى أصحاب الأسماء ألي تبدأ بالدّال هذى البوقالة نويت..
ديديو..ديدو..أنا سعدي مليح ، قنديلي ضاوي ، البنيان إلى بنيتو قع سجالى ، بنياني فوق غرفة و لي يخصني يكملهولي العالي .
و حكمتكم : دُل على الجميل بجميل خلالك

* عبد الجليل * · 2014-03-23, 07:55

السلام عليكم
باسم الله بديت ..و على النبي صليت …وعلى أصحاب الأسماء ألي تبدأ بالراء هذى البوقالة نويت…
عسل يا عسل في باقة خضرا ، يا شميمت العاشقين يا قمرا ، حلف سيد الملاح ما يرأس أمر غير إذا جات غزالته باش تكمل الحضرة.
ربما أراد الأحمق نفعك فضرّك

* عبد الجليل * · 2014-03-23, 07:56

السلام عليكم
باسم الله بديت .. وعلى النبي صليت …وعلى أصحاب الأسماء ألي تبدأ بالزّاي هذى البوقالة نويت…
الدالية دلات ..و دلّ العنقود ، خلي القمر ينكشف ، والسحاب يذوب ، و خلي لالات النسا تنال المرغوب.
وحكمتكم : زين النّطق الصّدق .

* عبد الجليل * · 2014-03-23, 08:00

السلام عليكم
باسم الله بديت .. و على النبي صليت …وعلى أصحاب الأسماء ألي تبدأ بالسين هذى البوقالة نويت…
خرجت نهار الجمعة ، في يدى شمعة ، قالولي أمسحى ذيك الدمعة ، و انساي الخلعة ، قريب يتلموا احبابك و صحابك و يفرحوا معاك الجماعة .
و حكمتكم : سرور الدنيا كأحلام النائم .

* عبد الجليل * · 2014-03-23, 08:01

السلام عليكم
باسم الله بديت .. و على النبي صليت …وعلى أصحاب الأسماء ألي تبدأ بالشين هذى البوقالة نويت…
الناس تنده بالرجال و الوالي ، وانا ننده بربي العالي .
وحكمتكم : الشكاية سلاح الضعفاء .

* عبد الجليل * · 2014-03-23, 08:02

السلام عليكم
باسم الله بديت ..و على النبي صليت …وعلى أصحاب الأسماء ألي تبدأ بالصاد هذى البوقالة نويت…
حوم حوم يا حوام ، حوم فوق السطح العالي ، و قول لها يا لالة يا زينة لبنات و خدودها براقة ، و عيونها غرّاقة ، صارت كل القلوب ليها سبّاقة.
و حكمتكم : صداقة الجاهل تعب .

* عبد الجليل * · 2014-03-23, 10:18

السلام عليكم
باسم الله بديت ..و على النبي صليت …وعلى أصحاب الأسماء ألي تبدأ بالضاد هذى البوقالة نويت…
كلام على كلام و الكلام على سقيلة ، العين في العين و الدّعوة مقبولة.
و حكمتكم : ضالة الكريم حسن الثّناء.