خبز الدار بالسميد بطريقة تقليدية من مطبخي

أثيلة · 2016-06-01, 16:51

السلام عليكم و رحمة الله و بركاته
اليوم راني جبتلكم معايا خبز الدار على الطريقة لي علمتني بيها ماما ربي يحفظها
نتمنى تعجبكم ،، نبدا على بركة الله

ملاحظة: هذه مقادير ثلاث خبزات
ثلاث كيلات سميد ،ملعقتين خميرة خبز ،ملح ، كأس و نصف زيت مائدة ، سينوج (حبة سوداء) ،أربع بيضات (نفل البياض عن الصفار) ، ملعقتين حليب بودرة ،ماء دافئ

أولا نحطو المكونات في طبق العجين بالتدريج
نحطوا السميد و الزيت

نضيفو الملح و الخميرة

نمزج المكونات مع بعضهم البعض

بعدها نضيف بياض البيض و السينوج حسب الرغبة

نبدأ بالعجن باضافة الماء الدافئ حتى نتحصل على عجينة لينة جدا

نضيف حليب البودرة الى القليل من الماء و نعجن من جديد

حتى نتحصل على عجينة تلتصق بالايدي بهذه الطريقة

نقوم بدهن السنيوة تاعي بالزيت كل الاطراف و نحطو العجينة فيها و نبسطها
هنا حطيتها فالسينوة لي مدهونة بالزيت

صفار البيض لي خلينا نمزجوه مع بعض و لما نطرحوا العجين ندهنوه من فوق بصفار البيض و نديروا فوقوا السينوج و اذا حبيتوا تديرولو خطوط بالشوكة

هنا قلتلكم بلي انا درت ثلاث قرصات

ودوكا نخلوهم يخمرو في مكان دافئ مدة لي تحبيها و كلما طولوا أكثر كلما كانت النتيجة أفضل ،، أنا خليتهم نصف ساعة فقط
نحطوا الفرن يسخن قبل ماندخلوهم و نشعلوه من فوق و من تحت ، ندخلوها تطيب و لما تحمار من فوق أكيد تكون طابت من تحت في نفس الوقت
و هنا راني خرجتها من الفرن

هذا هو خبز الدار تاعي و الشكل تاعو بعد ماطاب

و هنا الشكل تاعوا فالوسط

نتمنى تكون نالت إعجابكم اخواتي
تقبلوا مواضيعي
أختكن في الله
رشا

لاتنسوا الردود حبيباتي

OUM TAKIEDDINE · 2016-06-01, 16:56

بارك الله فيك وربي يحفظ الوالدة

اشرقت نفسي · 2016-06-01, 17:00

ماشاء الله ربي يحفظ ماماك

ام هدول · 2016-06-01, 17:01

ربي يحفض الوالدة لي علمتك ....تقربيا نفس طرقيتي ..فقط انا نعجنو مليح قبل مانسقيه بالحليب
يعيطك الصحة على الموضوع .....

جازيا ام البنات · 2016-06-01, 17:02

ماشاء الله يشهي بارك الله فيك

اريج 07 · 2016-06-01, 17:32

يامامي يامامي شفت في الكوزينة هبلت خليت كوزينتي و ضيافي و جيييييت نجري لقيتهم سبقوني اممممنن ياك خليتيلي حقي يا خرااااابي يهوس مووووت روعة حبيبتي تبارك الله عليك خمسة و خموس و ربي يحفظلك ميمتك لي علماتك و يخليها تاج على راسك امممممم هيا خلاص بزايد عليك من صباح نشكر خليني نروح نااااكل دوكاااا يم يم
احلى تقييم لعيون احلى رشا

زهر التوليب · 2016-06-01, 17:36

الله عليك رشا وعلى الخبز تاعك روووووووووعة
الله يحفظك الوالدة

bouchra55 · 2016-06-01, 18:23

تسلم الايادي يا رشا و ربي يحفظلك الوالدة

جنة الفردوسْ · 2016-06-01, 18:56

الله الله على هاذوك اليدي وهذاك الخبز احم احم .....اييييه لوكان نقولك تضحكي والله رانا في سنين مادرناش خبز الدار.....كاش نهار نجرب طريقتك.....يعطيك الف عافية و الله يحفظلك ميمك