كيفية تفصيل قندورة تم الرد

[سميرة3940]

السلام عليكم و رحمة الله تعالى و بركاته حابة اني نتعلم طريقة التفصيل بمقاسات اليد اي الشبر اذا كان وحدة تعرف تعطيني االخطوات الاولى او شي قناة على اليوتيوب و لكم مني جزيل الشكر

[أمّ عبد الله]

وعليكم السلام ورحمة الله وبركاته
نقلت لك درس من دروس الأخت سطايفية متمنيّة أن يساعدك .....

السلام عليكم و رحمة الله و بركاته
مساؤكم جمييل
كيما وعدتكم.
راكم واجدين ؟؟
اجري مونسيوني صحاباتك 👭👭
((نبداو الدرس النظري )))
اححم قلتيلي حابه تتعلمي تفصلي و تخيطي
قبل اي شي لازم تتوكلي. على رب العالمين و على نفسك
و تستحظري نية التعلم باش يوفقك رب العالمين
اتفكري كامل الدوافع سلبيه كانت او ايجابيه لي خلاوك
تعتمدي على روحك و تحطمي كلمة مانقدرش و مانعرفش
راكي معايا اليوم ،و انا حبيت نعلمك خطوه. منها تبداي المشوار
يقولو مشوار الألف ميل يبدا بخطوه
و لي الشرف نكون معاك كي تخطيها
كامل نعرفو من بكري الناس تفصل و تخيط و تلبس
في وقت ما كان لا كرلاجه ولا ميطره و لا مقص و لا باترون ولا مشينه
انعم هاذيك هي راح نتعلمو ،،طريقة بدائيه او تقليديه
بعيده عن تعقيدات الحساب القسمة و الضرب
سميوها كيما تحبو المهم توصل الفكره
مانحتاجو فيها والو اهم حاجه يدينا 👋🏻
(طبعاً خاطر راح نعتمد القيس بالشبر و الاصابع )
والقماش و مقص. ✂️
هاذ الطريقه حساباتها صحيحه بصح ميش دقيقه
تصلح باش تخيطي حوايج منزليه و خفاف. ميش السواريهات و الملابس الرسميه
كي تتعلميها تتخطاي حاجز الخوف من بعد يسهل عليك قراءة الباترون
و بالشوي. طلعي المستوى ( حمريلي وجهي عيييشك☺️)
نبداو على بركة الله.
---------------------------------------------------------------------

اول شي
علابالي كي قلت مقص ✂️نصكم خاف
مابيه والو مسكين
هو لازم تحبيه. مافيهاش نقاش
اكيد خيري واحد ماضي. و بوقوص و يكون اورتوبيديك
يعني من اللخر يريحك في القصان
--------------------------------------------------------------------

لازم نتعرفو على كيفية القياس. شوفو الصور و اقراو التعليق و جربو نتوما ثاني
القيس تاع عبد متوسط ماهي وحده. طول و عرض و ماهي وحده صغيوره
باش نتفاهمو على قيس الشبر. الgrande de taille ترخف يدها شوي.
--------------------------------------------------------------------

هذا. نحتاجو قيسو بزااف و سيرتو في تاع لولاد تقريبا الشبر في تاع لكبار هو الفتر في تاع الصغار و نتي لكان خيطتي لطفله صغيره شبريلها وخلاص
--------------------------------------------------------------------

زوج صباع ثلاثة سم. صباعي مقدرين برك ماهم كبار ماهم صغار كيما لاطاي و الطول تاعي
--------------------------------------------------------------------

استناو ما تخلعوش 😳 بالشوي ابداي شوفي من الرقبه. و روحي و اقراي بتمعن راح تعرفي كيفاش وزعنا القياسات (هنا لازملك فنجال قهوة ثقيله ☕️و خرجي عليك لولاد من الشمبره و اقعدي غير نتي و انا &#128541

فتحة الرقبه اذا كانت دايره تكون اقل يجي فيها فتر برك وتحبي تزيدي عليه. انا درت هنا v ساهله من بعد نديرلكم كامل انواع الرقبات فكيني من هاذ الدرس و افهميه الله يسترك

و لكتاف كامل نعرف بلي كتافنا يجيو هابطين ماشي قدقد. انا هبطت في لي كوتي شوي (هاذي زدتها من عندي تاع بكري يديروهم قدقد&#128580

بالنسبه لقيمة الدورانات انا درت غير تاع الصدر شبر و خمس صباع يعني بالتقريب 28/29سم و نتي نقصي عليه شوي و ديري الخط الثاني تاع لاطاي و زيدي اكثر و ديري تاع الباسان لي هو الخط الثالث و باش تتاكدي من القيس تاع الدورانات بلي صحيح زيدي قيسي كل دوران بالميطره و اقسميه على اربعه. و زيدي زوج ولا اربعة سم حق الفضفضه

و جربي قدامك في ورقه ولا نيلو ولا كارطون المهم جربي ماتبقايش تشوفي بالعين راهي فرصه لا تعوض وواحده ما تمدهالك في الدنيا هاني نقولك انا نصححلك ماعليش جربي برك
--------------------------------------------------------------------

هذا قماشنا مفرشاتو. كامل راح نديرو مودال موحد عادي و منو لي راح تخرجي كل المودالات قيس الكتان قدامك
--------------------------------------------------------------------

نقيسو طول الروبه مثال درتو متر ونص و نحيو الزايد نخبيوه لليمونش اوكي
--------------------------------------------------------------------

نروحو نطبقو القماش على ثنين اتولهو لا ليزيار على الجوانب الخطوط لي يجيو على حواف اي كتان. و تقدري تفصلي العكس الا في القماش لي يتكسل
--------------------------------------------------------------------

ضك طبقناه على اربعه شفتو وين حاطه صباعي هاذا وسط الامام و داخلو وسط الظهر لحد هنا راكي فاهمه شوي ؟؟؟
--------------------------------------------------------------------

الطرف لي خليناه نفصلو لي مونش انا درتهم طوال و نتوما من بعد راكم دبرو ريسانكم
--------------------------------------------------------------------

طول المونش كامل زوج شبار و فتر الرسمة تاع راس المونش تتعلموها بالعين مكانش حساب هنا
--------------------------------------------------------------------

هاذو هوما لي مونش نتاوعنا شفتو الطرف الزايد هذاك من بعد نقولكم واش نفصلو بيه المهم نقضيو على لقماش مانخليو منو واالو
--------------------------------------------------------------------

هكذا طراسينا على الكتان
--------------------------------------------------------------------

شوفوها عن قرب تبان ساهله ولا راني. نخرف
--------------------------------------------------------------------

مفهوم هنا ؟؟
--------------------------------------------------------------------

كي حلينا الطراف و بعدناهم على بعضاهم
--------------------------------------------------------------------

السجاف هذا ماشي سفاج كيما البعض يقولولو هو يساعدنا ندوبليو الرقبه باش جي واقفه و كي نحبو من بعد كشما نديكوريوها تساعدنا في لخياطه اجبدي الطرف لي خبيناه كي فضل من لي مونش نفصلو بيه هنا سجاف الخلف
--------------------------------------------------------------------

نفس الشي سجاف الامام هذا
--------------------------------------------------------------------

شوفو وين بلاصتهم. شوفي في حوايجك لمخيطين تلقاي الفكره هاذي. عرضهم نتي تتحكمي فيه كيما تحبي انا بالتقريب درتو سته او سبعه سنتمتر قيمة اربع صباع
--------------------------------------------------------------------

هاذو واش نحتاجو فيريفي كشما ناقص صراتلي من قبل غلطت طيشت لي مونش في لا بوبال و لصقت مالا خبيهم مع بعضاهم حتى يحين وقت الخياطه
--------------------------------------------------------------------

هذا منظر من الهيليكوبتر. شوفيها من فوق باهيه تباان
--------------------------------------------------------------------

شوفوها واجده. واش رايكم.
هذا درس نظري من بعد نروحو للخياطه راكم مستعديين نخيطوها ليوم ولا نخليو لغدوه راني عييت هاذي ثالث مره نحط الورشه و ماتصلحش ماتقولوش السطايفيه ماعندهاش الكلمه هيا الى الغد ان شاء الله نخيطوها مع بعض و لي عندها ولو سؤال مهما كان تافه في نظرها تقولو مايهمها في حتى واحد ابروفيتي ياطفله. ماتلقايش فرصه كيما هاذي
تصبحون على خير
دعواتكم
stayfiya

[سميرة3940]

بارك الله فيك و جزاك الله عني كل الخير

[ام هاديل وياسين]

ادخلي لليوتيوب في قناة اسمها تعلمي الخياطة معي وكاين ضحى للخياطة وتفصيل

وابدعات زهرة والمبدعة هادو كامل يفصلو بالمتر وبشبر وشرحهم بسيط ومفهوم