الطمينة بطريقة جديدة

sarah3113 · 2012-02-29, 14:27

السلام عليكم ورحمة الله وبركاته
ليوم جبتلكم طريقة جديدة لصنع الطمينة عطاتهالي حبيبة ماما جابتها من تلمسان انا راح نحط صور ولي تعجبها نمدلها الطريقة بلتفصيل

faizarbh · 2012-02-29, 14:30

شهيتيني اختي اله يبارك تبان بنينة

الباديسي · 2012-02-29, 14:32

بــــــارك الله فيك...........بــــــارك الله فيك....

سيرينا لبنينا · 2012-02-29, 14:47

الله يبارك مذابيك تعطينا لاغوسات انا منعرفش الطمينة نعرف البسيسة مي نسمع بالطميتة.

بشرى2008 · 2012-02-29, 15:28

اقتباس:

المشاركة الأصلية كتبت بواسطة سيرينا لبنينا

الله يبارك مذابيك تعطينا لاغوسات انا منعرفش الطمينة نعر البسيسة مي نسمع بيها .

البسيسة هى الروينة فى بعض الولايات الي هي القمح محمص ومرحي فى الرحي نتاع الحجرة انا منحبش البسيسة نهائياااااااااااااااااااااااااااا

نصيرة أمي الحبيبة · 2012-02-29, 15:42

يعطيك الصحة او واش هي الطريقة الجديدة راني نشوف فيها كيما نديروها و لا السر راهو لدخل ؟؟

remadna · 2012-02-29, 18:19

يعطيك الصحة
هات الطريقة
في بسكرة تجي ( قمح حب+حمص حب+لبلابي حب) كل شئ محمص ثم يرحى عند الرحى، هذه نعملوها للنافس
ماما تزيد فيها العدس للفائدة و تجي روعة

الصوامعية · 2012-02-29, 18:22

هذي متشبهش للطمينة نتاعنا مرهيش تبان مخدومة بالسميد

sarah3113 · 2012-02-29, 20:00

اقتباس:

المشاركة الأصلية كتبت بواسطة remadna

يعطيك الصحة
هات الطريقة
في بسكرة تجي ( قمح حب+حمص حب+لبلابي حب) كل شئ محمص ثم يرحى عند الرحى، هذه نعملوها للنافس
ماما تزيد فيها العدس للفائدة و تجي روعة

لالا ياحبيبتي هادي ماتجيش بهاد الطريقة بصح تاعكم دقتها وعجبتني بزاف

sarah3113 · 2012-02-29, 20:05

راح نعطيكم المقادير بصح يا ريت تجربوها وتردولي لخبر انا شخصيا عجبتني ان شاء الله تعجبكم
فيها 250 غ زبدة + كاس اتاي زيت ونخلوهم في طاجين ثقيب يدوبو من بعد نضيفلهم 500 غ سميد متوسط ونبقى نخلط بملعقة خشبية لازم مانحبسوش حتى يولي خليط دهبي وانا على خلط دراعي ضرني لخطرش كنت وحدي وماصبتش لي يريحني هههههههه وكي تشوفو سميد اصبح دهبي نخلط 250 سل يعني ربع لتر ماء مع 10 ملاعق سكر علدي وغير نطفأ على نار نحد ماء شوية ولازم نبعا وجهنا ونغطي القدر بسرعة وكي نشوفو حس حبس نعاود نحل ونفرغ كامل الماء المتبقي ونغطي القدر حتى يبرد تماما
نحلو طمينة بملعقة خشبية ونظيفلها عسل عينك ميزانك حتى تولي متماسكة وهاي طمينة تلمسان جديدة

اميره 2008 · 2012-02-29, 20:07

شهيتيني اختي اله يبارك تبان بنينة

سيرينا لبنينا · 2012-03-01, 11:21

اقتباس:

المشاركة الأصلية كتبت بواسطة بشرى2008

البسيسة هى الروينة فى بعض الولايات الي هي القمح محمص ومرحي فى الرحي نتاع الحجرة انا منحبش البسيسة نهائياااااااااااااااااااااااااااا

اختي الروينة هي نحوها من المرمز كي يكون مرحي .

والبسيسة هي قمح وحمص محمصين مرحين مليح ونزيدولهم المكسرات مرحين ونديروها عادي بالزبدة والعسل.

شكرا اختي .

سيرينا لبنينا · 2012-03-01, 11:23

اقتباس:

المشاركة الأصلية كتبت بواسطة remadna

يعطيك الصحة
هات الطريقة
في بسكرة تجي ( قمح حب+حمص حب+لبلابي حب) كل شئ محمص ثم يرحى عند الرحى، هذه نعملوها للنافس
ماما تزيد فيها العدس للفائدة و تجي روعة

اختي رمضانة وش معنتها لبلابي حب ؟؟؟؟؟؟؟

remadna · 2012-03-01, 15:05

اقتباس:

المشاركة الأصلية كتبت بواسطة سيرينا لبنينا

اختي رمضانة وش معنتها لبلابي حب ؟؟؟؟؟؟؟

يشبه للحمص و هو صغير و طري و حلو روعة ناس زمان كانو يضيفوه لمخلوط الكاوكاو و الحلويات في الأعراس
اما الآن فنادرا اصبحو اغلبية الناس يستبدلوه و يديرو المكسرات كاللوز و الجوز و الشكلاطة و الدراجي
يوجد المحلي و تاع سوريا يباع 400 دج للكيلو على ما أظن

اللؤلؤة النادرة · 2012-03-01, 17:16

منحبش الطمينة بصح نحب نتعلم كل الطرق في صنعها لأن كل المحيطين بي يحبونها جدا ........ أين الوصفة رانى نستناو فيها وشكرا مسبقا