اكتأبت بسببه

[مشكلتي]

السلام عليكم
ان شا الله تكونو كامل ملاح
راح ندخل في صلب الموضوع ديراكت و نتمنى تعاونوني في هذا المشكل
المهم انا فتاة في عمري 19 سنة فتاة ناجحة و استاذة مستقبلية ان شاء الله طوال 18 سنة كنت ديما زاهية فرحانة عندي ثقة كبيرة بنفسي
لكن جا اليوم وين تعرفت بواحد اكبر مني بقليل 23 سنة ه. من اسرة غنية و مثقفة جدا جدا يعني مستواهم الاجتماعي بعيد علينا بكثيير و ناوي يخطبني لكن مشكلتي اني نحس بالنقص و الضعف الشديد امامه على الرغم اني جامي بينتلو مما ادخلني في دوامة اكتئاب و وليت ديما نبكي و غايضني الحال و السبب انو مثلا يسقسيني واشمن سيارة لي خير ؟ علاش متشروش هذاك النوع او هذاك الطراز و يسقسيني علاش منروحش لباريس ياا اخي احنا لقمة العيش حاصلين فيها و نتا تقول باريس و ايبيزاا
نحس بالنقص امام عايلتوكيفاش يهدرو و مالهم و جاههم رح تقولو بلي متكبرين العكس تماما جد متواضعين و هايلين معايا لكن انل مقدرتلهومش
و الانسان هذا نحبووو و خايفة نخسرو و كي قالي نخطبك صراحة حشمت بدارنا ....الخ والله فرق كبير بينا و بينهم
وش ندييير؟ نخليه يجي يخطبني و ندير كيفهم ولا نبطل منو و نستنى ربي يجيبلي واحد زوالي كيفي
انصحوني لوجه الله

[مصطفى_س]

السلام عليكم
أولا انت في فترة مراهقة لازلت صغيرة لا تقلقي على الزواج
ثانيا هذا التعارف حرمه أهل العلم و الدليل انت في اكتئاب و دوامة ،يعني نفرض لو أعجب بك هذا الشاب و جاء قاصدا بيتك تكوني في راحة تامة
ثالثا هو أيضا 23سنة في هذا الزمان لازال صغيرا أيضا
رابعا اظن ان المستوى الاجتماعي سيؤثر بشكل كبير هذا إن تزوجك الشاب

لذا انصحك بالتركيز على ما هو أهم دراستك ان كنت تدرين و ان تتوبي الى الله
فرج الله همك و رزقك من حيث لا تحتسبي

[nihal159]

الوضعية لي راكي فيها من قلق و إكتئاب هي النتيجة الطبيعية لمثل هذه العلاقات.
لو نفرض أنّ إنسان غني و مثقف حب يتزوّج و يروح يقصد مباشرة بيت ناس زوالية لكن مشهود لهم بالأخلاق و التربية؛ في هذه الحالة مش رايحة تحسي بالنقص لأنو قبل مايتقدم سأل عليكم و عرف أوضاعكم و مايهموش فقركم بقدر ماتهمه أخلاق المرأة لي راح يرتبط بها.
لكن حسب كلامك؛ هذا الصديق راهو يسألك على نوع السيارة نتاعكم و السفر إلى باريس؛ يعني ماهوش عارف وضعيتك الإجتماعية و نهار يعرفها الله أعلم كيفاش يكون ردة فعله.
ثانيا راكي تقولي أنك حشمانة بداركم؟؟؟؟؟؟؟ هذي وحدها مهزلة و مندبة؛ يعني حتى لو خطبك رايحة تعيشي بمركّب نقص و إذا أهل خطيبك فاقو للنقص لي تحسي به رايحة تولي أضحوكة بيناتهم.
بصراحة قوليلو يتقدم لخطبتك في أقرب فرصة باش هكذا يعرف عايلتك و ضروفك عن قرب؛ إذا كان إنسان مليح رايح ربي يسهلك أمورك و إذا كان إنسان سطحي و تافه و تاع مضاهر رايح يجبد روحو؛ و في كلتا الحالتين أنتي تستراحي.

[عادل عبد الله]

السلام عليكم ، من حيث ما فهمت انه من النوع الذي يفتخر بماله او بعبارة اخرى مدلل ، نخشى ان تزوجت به ان يبقى على حاله ، ولا تستطيعين العيش معه ، لهذا انصحك ان رأيته الزوج المناسب فمبارك لكم ، وإن كان لا ، فلا تقبيلنه ، لانك ستعانين من تصرفاته .

[قمر الزمان رؤية]

يا اختي لو كان فعلا مثقفا كما تدعين مايقولش علاش ماتشروش و ماديروش... مواضيعه تكون لها فائدة ليك مش زوخ و فوخ
و الهاي بدراستك و فرحي والديك حتى يجيك اللي يعرف قيمتك و مايضحكش عليك

[om_hadil]

هذا زواخ ،،، اخطيك منو،،، انتبهي لدراستك و تميزي فيها و انجحي،،، و سافري الى باريس

افتخاري بأهلك مهما كانوا،،، بالتوفيق

[zineb_saib]

هاذي مش هدرة رجال
الرجال تجيب مواضيع تصلح
من رأيي اخطيك منو راهي باينة لعقلية

[رضاك يا ربي]

السلام عليك
انا تزوجت بإنسان فقير ولكن جد متواضع
انسان خلوق ومتدين انسان يحب والديه فوق
مايتخيل بشر في فترة الخطوبة يحكيلي على حلو لوالديه
والله والله والله عمرو ماشتكى من الفقر كان يفتخر باهلو
انا كنت من عائلة غنية والله والله كنت نحشم من روحي
كي نسمعو يحكي على أهلو وانا نبقى ساكتة
الفقراء والله والله والله عندهم اشياء مستحيل القائها في
الأغنياء...
ولما تزوجت لقيتهم ناس والله والله قمة في الطيبة
والأخلاق....حبيتهم والله من اول يوم
الغنى غنى القلوب والأخلاق وليس غنى المال
اما انك تحشمي باهلك لي ربوك و اشقاو على جالك
فهذه قمة نكران الجميل ليهم
أما الإنسان هاذاك لي مافهمتش واش هو صاحبك ولا زميلك
ولا.....الله اعلم فإذا حبك يجي يدقدق على باب دارك
ماشاء يقولك علاه ماروحتبش لباريس
تاكدي أن الأيام دول الغني يقدر يولي فقير والفقير يولي
غني...أن الله يعز من يشاء و يذل من يشاء
انت مافيكش الخير لأهلك....اهلك الطيبين لي ربوك
وتحوسي تتزوجي انسان غني باه تهربي من فقرك
الفقر عمرو و لكان عيب
تقراي و اتخرجي و فرحي اهلك
أما هاذاك تاع باريس اخطيك منو
السعادة لا تبنى بالمال و الفقر فقر الأخلاق اختي
اسفة انو ردي قاسي ولكن
اكره الناس لي تخجل من اهلها كره ليس له مثيل
احمدي ربي انو عندك اهل ربوك وقروك

[زبدة ذايبة]

راكي غير تخلطي.

اولا

ماعندك حتى حق ومبرر تهدري مع راجل أجنبي.

ثانيا

بما أنك راكي تهدري معاه احتمال تاع 99%كذاب.

ماعندك حتى دليل أنه جاي يخطبك!!!!!

وزيد من عائلة غنية جدا ومثقفة جدا جدا !!!!!!!
وين لقيتيه؟؟؟؟؟

يمشي ولا راكب في الحافلة و لا في نوع من السيارات

اللي باباك وخوك مايقدرش يكسبها ؟؟؟؟

هدر معاك وصدقتيه مليح يعطيك الصحة.

وش بيك هكذا ؟؟؟؟؟

واحد تلاقيتي بيه في الشارع أجنبي ماتعرفي لا أصله ولافصله.

ومايعرف لا أصلك ولا فصلك.

وليتي تبيعي وتشري معاه في أنواع السيارات وأسماء البلدان!!!!؟؟؟؟؟.

ريحي روحك.

ولا راكي حابة تخرجي صح أستاذة وتنجحي في دراستك
وماينتهيش بيك الحال في الشارع.

ماتخونيش والديك البسطاء اللي دارو فيك الثقة ورباوك على الأخلاق والشرف.
باش في الأخير تجيبلهم راجل من الشارع. هذا طبعا إذا جا يخطبك.

ردي بالك تصدقيه.

شحال من واحد يكذب على آلاف البنات وبمنيهم بالزواج.

يروح ويخليهم لا شرف ولا أخلاق ولا عرض.

راهم كبار عليك في السن وتمسخروا بيهم.

ماتصدقيش حتى واحد.

حافظي على دينك وأخلاق وتربيتك.

وماتذليش والدين تعبوا في تربيتك.


تقطعت فيا النفس وانا نقرى وش كتبتي.

معولة تخرجي أستاذة وانت تتصرفي تصرفات تاع

البنات الطائشات والساذجات

واضحة مشكلتك ماعندها حتى معنى.

اول واحد عطالك قصة دخلتي في الاكتئاب . ورديتي داركم

مايسواوش و حسبتيهم أقل قيمة من هذ الصعلوك اللي تعرفتي عليه!!!!!!

الحاجة الوحيدة اللي حقيقية في كل هذ الكذب

أنك راكي تخدعي في نفسك وفي أهلك.

وخيانة الله عزوجل في تحليل ماحرم.

الله يهديك ويعطيك لعقل.

[ام رضوان]

السلام عليكم
يابنتي راكي مزلتي صغيرة وطحتي في واحد ذيييب وراهو يلعب بيك
يحوسك تروحي لباريس وتكسبي السيارات وووو
ياوقلو
اذا هو وسعلو ربي في الرزق مايتمهزاش ببنات الناس
وزيد اللي رزقو يقدر يرزقك
طاوعتك نفسك وحشمتي باهلك اللي رباوك وعلموك
هذا راهو نكران الجميل راكي كي انت كي هو
كيما يقول لمثل مايتزاوجو نيشابهو
هذا اذا جاء خطبك وازوجك
على فكرة تقريبا رانا كامل حاصلين في لقمة العيش بصح دايما نقولو
نسال الله الكفاف والعفاف والرزق الحلال.
بصح حاباتك تجاوبيني على حاجة
اذا تخرجتي وعملتي استاذة واش راح تعلمي طلابك؟
واش من قيم واخلاق رايحة تغرسي فيهم؟
اذا حشمتي بفقرك في بداية طريقك!!!!
اسمحيلي على ردي
بصح لوكان جات بنتي او اختي راح يكون نفس الرد
سلااااام

[sohaibdz]

سبب دخولك في حالك اكتئاب هو ضميرك الذي يأنبك بسبب دخولك في علاقة محرمة مع شاب
وبخصوص الفارق الاجتماعي بينكما و خجلك بعائلتك امامه هذا امر طبيعي جدا ، انت تكلميه دقائق او حتى ساعات معدودة و لم ترتاحي فكيف تريدين الزواج به و العيش معهم في نفس البيت؟؟
عليك بالتوبة و قطع علاقتك به فورا الا تستحين من نفسك ؟؟ الا تشعرين بالخيانة ؟؟ كيف تنظرين في وجه ابيك
الله يهديك و يهدبنا

[ALHIKMA]

اقبلي بيه وتزوجيه
ما تعقدي روحك ما والو
ما تكثؤيش النفلسيف
تزوجي وكملي قرايتك... زوجك وحياتك خير لك من القراية
رانا نشوفو فيهم بشاهادات وقاعدين لا خدمة ولا زواج
تزوجي وربي يباركلك
والله الموفق

[mounir moon]

يا اختي مستقبلك الدراسي سيضيع ان اتبعتي هذا الشاب وحاولتي ارضائه
الاصح والاجدر بك التركيز على دراسة واوقفي جميع علاقات وتعارف محرم بعدما تتخرجي استاذة و تبدي تخدمي صدقني هذا الشاب سيركع امامك حياءا وسيخطبك شخص اكثر منك مستوى مدير او طبيب
اما حالتك الان قد تفشلين في دراسة و في الاخير تجدي ان الشاب استبدلك باخرى طالما ان المال بين يديه
لذلك حذار من مثل هذا

[مُحمد رازي]

السلام عليكم

كنصيحة أقدّمها لكِ و من الأخير اخطيك منّو
لماذا ؟ نعطيك 5 أسباب
أولا : ما زلتي صغيرة و تفكيرك ما زال مقتصر عند نيفك واش تاكلي واش تشربي واش تلبسي
ثانيا : أكذوبة راه ناوي يجي يخطب ففي هاد المسألة تكون الأفعال أبلغ من الأقوال فمن يريد خطبتك لن يمنعه أي شيء من التقدّم لكِ
أمّا من يمنّيك بالوعود و يرسم لكِ الأحلام الوردية فهذا الأمر لا يخفى على عاقل بأنّه يعتبرك فقط كتسلية له و تمضية وقت
و لهذا يلقي عليك حبال نيّته بالخطبة ليربطك بها و حتّى لا تفلتي من قبضته و تُصبحي أسيرة ذلك الوعد الكاذب و الوهم الزائف إلى غاية اكتمال المهمّة !
ثالثا : التباهي بما يملك و بما بعرف من سيارات و بلدان و خُرطي و تفاهات ما هو إلاّ استدراج لكِ و حتّى يسيل لعابك لدى سماعك لهذه المغريات
و للأسف أخشى بأنّ حيلته قد انطلت عليكِ حتى وصل بكِ الحال لدرجة ازدراء حياتك و ازدراء وضعية عائلتك المُحرجة معها
و تأكّدي بأنّه سيأتي في الأخير ليساومك بأن يحقّق لكِ حلما بأن تعيشي كأميرة مقابل شرفك
و ستكونين حينها مخدّرة بعطور شانيل الفرنسية و مستعدة للتضحية بأي شيء فقط مقابل الحصول على تلك المغريات
فالتعلمي أختي بأنّ السعادة لا يُمكن الوصول إليها أبدا بما نملكه من أموال و سيارات ووو
بل قد يرضيك الله و يُسعد قلبك حتّى و لو كنتِ تلبسين صبّاط مقطّع و تأكلين الخبز و الماء
فما يعيشه هذا البنادم ما هو إلا متعة زائلة يتوهم من خلالها بأنه في النعيم و غيره في الميزيرية الكحلة
و أكيد هذا لا يعني بأن كل الأغنياء حالهم مثل حال هذا الشخص المفتون بل الفيصل بينهم هو أن الأول قد أُشرِبَ قلبه حب المال و الدنيا الزائلة
أمّا الثاني فبالرغم من امتلاكه للملايير و لكن يعيش عيشة متواضعة لله بلا تكبّر بلا عُجبْ لأنّه يعلم بأنّ ما يملكه من أموال و غيرها
ما هي إلاّ رزق خالص من عند الله و لم يقم بامتلاكها هو بمحض قوته و خبرته
فيحمد الله و يعيش و يتنعّم بما أنعم الله عليه و فيما يرضيه
رابعا : تقولين بأنّ عائلته متواضعة و هايلة معاك لكنّك تناسيتِ بأنّكِ لستِ كنّتهم لتقيسي معاملتهم تلك
بل قد تكون معاملتهم لكِ بهذا الشكل فقط لاعتبارك صديقة لابنهم و من باب تدليل طفلهم و تحقيق رغباته
أمّا في الحقيقة و لو كنتي كنّة في قصرهم فأضمن لكِ بأنّهم سيمرّرون لكِ المعيشة و ياكلوك حيّة
ثمّ إن كانت عائلته على علم بعلاقتكما فالراجح بأنّ هذه عائلة متحرّرة فوق اللزوم حتّى لا أقول غير محافظة
خامسا : ازدراء وضعية عائلتك تُعتبر من نكران و نسيان الفضل عليكِ و قبل ذلك هي جحود على ما أنعم الله عليك من نعم
فلو نظرتِ لمن هو أسفل منك و من هو "حاصل في لقمة العيش" فعلا و ليس تعبيرا مجازيا كما وصفتِ حالك لتيقّنت بأنّكِ في نعمة كبيرة
أمّا نظرتك لمن هو أعلى منك مالا و جاها فأخشى بأن تصلي بهذا لمرحلة السخط و عدم الرضى بما قسمه الله لكِ .
أخيرا الخرطي تاع نحبه و خايفة نخسره قلعيه من راسك
الأهم عائلتك أمّك و أبوك الذان سهروا و تعبوا لأجلك و بذلوا الجهد و الغالي و النفيس من أجل تربيتك و الذان ينبغي أن تضعيهما فوق رأسك و تفتخري بهما دوما
أمّا فارس الأحلام الذي يأتيك على متن إيبيزا عوض أن يركب حصان فكيما يقولو طريق السدّ

[dede2000]

السلام عليكم ،أسمحيلي راح نعطي رأي بصراحة
1/ أنت من لي قال فيهم ربي ( متخذات أخدان) يعني دايرا عشيق......... ربي يهديك
2/تحشمي بأهلك لأنهم فقراء....خسارة عليك
3/ تحوسي تدي واحد غني باش تهربي من الفقر ......والله غير يلعب بيك ويخليك لا مال لا شرف.
المال مال الله ومتتخلعيش من المال و الدنيا الفانية والله ما تسوى عند ربي جناح بعوضة ،وانت خلعك بالإبيزا حشمتي بولديك
بئس الإبنة أنت.