** وصفات الشاف مصطفلى بسعدي بإذاعة الشلف **متجدد كل يوم أربعاء بإذن الله *

[faizarbh]

لالا اختي مازل ما جربو

[اولادي حياتي]

بارك الله فيك اختي وجعلها الله في ميزان حسناتك .

[kokotg]

يعطيك الصحة يا فيوزوتنا على الروابط
ربي يخلييييييييييييك

[hiba hajer]

ماشااااء الله وصفات رائعة

[دويغو]

مشاء الله على هذه الصافات نتمنى لكم مز يد ابتكار والنجاح ممكن طريقة المحمصة بالمرقة بيضاء وشكرا جزيلا

[zouzou42]

راني جلابت الصابلي جاني هايل و خفيف

[faizarbh]

المشاركة الأصلية كتبت بواسطة دويغو

مشاء الله على هذه الصافات نتمنى لكم مز يد ابتكار والنجاح ممكن طريقة المحمصة بالمرقة بيضاء وشكرا جزيلا

ربي يحفظك اختي لكن ما نعرفش هاد الوصفة ممكن البنات اللي يعرفوها يساعدوك

[faizarbh]

المشاركة الأصلية كتبت بواسطة zouzou42

راني جلابت الصابلي جاني هايل و خفيف

ممممم شفتي اختي انا تاني جاني هايل و الذوق روعة ما عندكش صورة لتطبيقك تحطيهالنا

[ام اماني77]

بارك الله فيك اختي فايزة وجعلها الله في ميزان حسناتك

[وردة حظي]

حبيبتي فيوزة اين هي وصفات اليوم راكي عودتينا على جديد تاع مصطفى دمت متالقة وجعلها الله في ميزان حسناتك

[faizarbh]

وصفات يوم الاربعاء 27 فيفري 2013

بيسكوي رولي مالح:

4 حبات بيض الصفار و حدو و البياض وحدو، مغرف صغيرة ملح ، نص مغرف صغيرة فلفل أسود ، من 200 حتى 220 غ فرينة ، مغرف موتاغد، ملعقة أكل كاتشب.
في ليان نضرب الصفار مليح ثم نزيدلو الملح و الفلفل و نضرب جيدا حتى نحسوه طلع ثم نضيف الكاتشب و الموتاغد و نواصل الضرب ثم نضيف الفرينة بالتدريج بمغرف حطب و نخلط و في الاخير نضرب بياض البيض جيدا مع شوية ملح حتى يولي مثل الثلج و نضيفو لخليط الصفار غير بشوية و نحرك من فوق لتحت بسباتول.
ندهن صينية الفرن بالزبدة و نرشها بالفرينة و من الاحسن ورق الطبخ ثم نفرغ الخليط في الصينية و نسويه مليح و نطيبها من 10 حتى 13 دقيقة في درجة فرن متوسط و نكونو شاعلينو من قبل.
ثم كي نخرجها نحطها على سربيتة مندية و نلفها و نخليها فيها مدة 20د ثم انحيلها السربيتة و تبقالنا ملفوفة ثم نطليها من فوق بالخليط التالي:
مغرف قهوة موتارد+ ملعقتين أكل جبن طري يعني سائل و نخلط مليح ثم نطلي بيه من فوق بالبانسو و نرشوه بشوية مكسرات او شابلير.


مقبلات للأطفال:

1* في ليان ندير 6 ملاعق أكل خبز مرحي+8مغارف فرينة + 3ملاعق أكل سميد رقيق تاع المقروط + ملح و فلفل + 4 ملاعق أكل زبدة ذايبة + نص مغرف صغيرة خميرة كيميائية.
2* في ليان نخلط 2 بياض بيض حجم صغير مع 2 ملاعق حليب ثم نضيف مغرف أكل معدنوس مقطع رقيق + مغرف أكل فرماج رابي + مغرف صغيرة طماطم مصبرة .و نخلط الكل.
ثم نفرغ الخليط الاول على الخليط الثاني غير بشوية حتى نتحصل على عقدة مثل العصيدة .
في مول السيليكون (هادوك الصغار اللي نديرو فيهم الشوكولا المحشية ) مدهون بالزيت نحط بمغرف أكل و نسطحهم من فوق و نطيبهم مدة 20د على نار متوسطة .

كريمة لامونة:
2 صفار بيض نضربهم + 75 غ زبدة بوماد + ملعقة كبيرة فاني + 2 ملاعق كبار مايزينة و نخلط ثم نضيف كاس و ربع حليب و نديرهم على نار هادئة و نحرك بملعقة حطب و كي تعقد الكريمة انحيها من على النار و نحركها شوية و هكدا تولي عندنا كريمة نحشي بيها لامونة.



قاطو ساك بالنيسلي:
هاد الحلوة اجي ب لي مول تاع الكرافات
كيما هادو تاه ام محمد


250غ زبدة بوماد، 100 غ سكر قلاص + حبة بيض + مغرف صغيرة خميرة حلوة + مغرف صغيرة فاني و الفرينة حسب الطلب .
نخدم الزبدة مع السكر جيدا + حبة بيض ثم الفاني و الخمارة و الفرينة و العجينة اجي مثل الصابلي
ثم ندير كويرات و نشطلهم داخل مول الكرافات بعدما نرشهم بالمايزينة ثم نشكل العجينة الداخل و نضغط باش تدي شكل لي مول و نطيبهم مدة 7 دقائق ثم نخرجهم و نحشيهم بالنيسلي و نلصق واحدة على واحدة و نزينهم من فوق بخطوط شوكولا .

غراتان البسباس:

كيلو بسباس بعدما انظفوه نقسموه إلى نصفين و نزع شوية من النصف باش يولي عندنا فراغ نعمروه بحشو ، ثم نديروه يفور بالملح و الفلفل و عصير ليمون مدة 20د ثم في مول مدهون بالزبدة نحط هاد لي باركات تاع البسباس .
في مقلة ندير حبة بصل رابي مع 2 فصوص ثوم رابي و معدنوس مقطع و نقلي في 2 ملاعق كبيرة زبدة مدة 10د بعدها نضيفلو 300 غ لحم مفروم و نقلي بعدها نقطع حبة طماطم مربعات صغار و نقلي 5د ثم نضيف جبن احمر مبشور و نطفي

مباشرة و الحشو سخون نديروه في الفراغ الموجود فالبسباس و نديروه على شكل هرم صغير ثم نحكم بياض بيض مضرب مع شوية ملح و كي يولي مثل الثلج نديروه في بوش و نزين بيه فوق اللحم و ندخلوه للفرن مدة 15د ثم نخرجوه.

[faizarbh]

المشاركة الأصلية كتبت بواسطة وردة حظي

حبيبتي فيوزة اين هي وصفات اليوم راكي عودتينا على جديد تاع مصطفى دمت متالقة وجعلها الله في ميزان حسناتك

اسفة حبيبيتي كنت شوية مشغولة البارح اتفضلي راني حطيت الوصفات

[أم عاتكة]

شكرا لك اختي فايزة على مجهوداتك
بارك الله فيك يا مبدعة
تستهلي كل خير .

[وردة حظي]

اشكرك جزيل الشكر لانك اخدت رسالتي بعين الاعتبار وجازاك الله على ما تبذلين من جهد

[aziza05]

بارك الله فيك اختي وجعلها الله في ميزان حسناتك .