زوجة أخي

[مشكلتي]

السلام عليكم
أرجو وضع الموضوع في قسم دردشة بنات

موضوعي باين من عنوانو مشكلتي مع زوجة أخي و أرجو من الأخوات مساعدتي في حل مشكلتي بالعقل و ليس بالعاطفة لأني لاحظت كاين عضوات عندهم مشاكل مع أهل أزواجهم و غير يسمعو كلمة زوجة أخ ينوضو يدافعو على الكنة بكل قوة بدون محاولة فهم التفاصيل .
المهم عندي زوجة أخي ستوتة كيما نقولو و هذي صفة مليحة مع زوجها على خاطر خويا راهو يعتقد أن زوجتو ملاك تمشي على الأرض لكننننننننننن باش توصل بيها تستعمل هذي الصفة مع كل من دب و هب و أي رجل هاذي لي ما يتقبلهاس العقل .
اتخيلو مرة جات لداري هي و أخي و كي جاو خارجين قعدنا قدام الباب أنا وزوجي و اخي و هي قدام زوجي قعدت تحط يدها على راس خويا و تمسحلو بدون حياء و تقولي بكل خضوع .....بيبي إذا تحب نروحو نروحو و إذا تحب نقعدو نقعدو كيما تحب .....و راجلي قعد غير يشوف فيها و يضحك و أنا أكيد قلبي طلع .........و مرة أخرى كنت ثاني أنا و راجلي عندهم و كنا قاعدين في الصالون و هي جات بلا حشمة قعدت لاصقة في خويا و تمسحلو على راسو قدام راجلي و العجيب أن خويا ساااااااااااكت و ما قاللهاش كامل بلي عيب و مالازمش هكذا قدام الناس .
و مرة حتى اختي قالتلي راحت هي و راجلها لدار خويا و كيف كيف زوجة خويا حطت البانان قدام راجل اختي و قعدت كل شوية تقولو بخضوع ....فلان كول البانان ...........حتى راجل اختي رجع كي يحب يزعق مع اختي يقوللها تاكلي البانان يعني فهمها بلي عييييييب !
علابالي كاين لي يقولو راكم في اختلاط علابيها صاري هكذا مي الله غالب أولا حنا فاميليا واحدة يعني زوجي هو ابن عمي و زوجة أخي هي بنت خالتي يعني رانا قراب و زيدو تقريبا ما نقعدوش كيف كيف غير للضرورة القصوى و زوجة أخي يعني حتى في الباب تاع برا و ما تراطيش تبين روحها قدام الرجال و الله رجعت نعجز نزور خويا غير على جالها و المشكلة كي تجي هي يكثرو هذو المواقف و كاين مواقف بزااااااف و الله لوكان نحكيهم تحيرو ........مرة رحنا ليهم هي تسمع في صوتي قدام الباب و صوت راجلي يحكي مع ولادها صغار و الباب مفتوحة و كانت لابسة نويزات ......باش تروح تجري لشومبرتها تبدلها لالا.........هي زعمة جات تجري للباب تاع برا باش تغلقها !
رايو عليا كيفاش نتصرف معاها ؟

[زبدة ذايبة]

والله مرت خوك هذي قليلة حياء إّذا كانت بالشكل الذي ذكرته

من المفروض لما يكون البيت محترم يكون فيه قواعد مضبوطة للأخلاقيات

وبما أنها ماتفهمش أو تتعمد أنها ماتفهمش

عليك وعلى المواجهة


أهدري معاها ماخافيش منها

هذا منكر عظيم لايرضي الله عزوجل

نزلت آيات الحجاب والآية اللي فيها ولاتخضعن بالقول

لأمهات المؤمنين وما أدراك ما أمهات المؤمنين

زمن الطهر واليقين والتقوى سواء من الرجال الصحابة ومن النساء المؤمنات وزوجات النبي صلى الله عليه وسلم

فمابالك بالزمان اللي رانا فيه

هايليك ماتسكتيلهاش وقفيها عند حدها

هذا الميوعة والتخنث والدياثة في الرجال أفسدت الدنيا

من المفروض خوك يبرم شلاغمو شوية

لكن للأسف

وزيدي أهدري مع أمك وحتى خواتاتك

تخلوها على حالها تخليلكم الدنيا

ماتحشمو منها ماوالو

العصا لمن عصا

درءا لمفسدة كبيرة في البيت

ومنعا لقلة الحياء والفسق ينتشر عندكم


والله عيب كبير هذا

نسأل الله العافية والسلامة

رب يفرج عليكم

[وردة الرمال43]

انصحيها لوجه الله تنحي التصرفات هذو قدامكم بالنساء بالرجال وكي تكون وحدها تعوم بحرها .....فهميها الاصول

[كاميلا]

اسمحيلي معنديش نصيحة انت قلتي كيفاش نتصرف معاها الامر ميعودش ليك انت معندو مدخلك يرجع لخوك يعني ان كانت صح هك مكنتوش علابالكم بيها وانت تقولي بنت خالتي والا بين عشية ونهار قلبت عادت بلا حياء وزيد حكيتي زوج او 3 مواقف ممكن حكاية البنان سمحيلي انت فهمتيها للنقص وهي هدرت بنيتها في المشرق مثلا يقولوا كلمة حبيبي عادي هنا عندنا عيب وحرام اما في ما يخص الصوت نعرف وحدة من عايلتي وشاهدة عليها نبرة صوتها خلقها ربي هكاك ومتقدرش ترفع صوتها الفوليم ناقص
بنت خالتك المفروض علابالكم باخلاقها قبل متتزوج منظنش تغيرت بين ليلة وضحاها احنا النسا والعياد بالله اغلبنا نستعملو خاصية تكبير وتضخيم الامور كي نكونوا غايرين من وحدة
المهم المرة جاية زوري خوك وحدك مش شرط يجي راجلك ادا راكي غايرة منها والمفروض تقولي مشكلة اخي يعني ولدكم سمحيلي طرطور قدامها وتعيبوا فيها العيب فيكم وفيه
وليس دفاعا عنها بل بالفعل عائلة الزوج حتا وان كانو اقارب يخرجوا لعجب ولو بدرجات ميفترضوش النية الحسنة حاكمين للكنة على الوحدة
هدا رايي وانت راك معندك متقضيلها ادا هو معمل شي هدا ادا كانت صح وش تقولي مش بهتان

[هـــدوء]

كل وحدة تلم راجلها و تفرق السوق
لازم يعني تتلمو كل تقصروا مخلطين معزة و عتروس
انت ديتي راجلك ليها بيدك و تحوسي تقادركم؟؟ حال لي جاب الدب لكرمو .
المرأة لوكان تلقى تخبي راجلها في جيبها تخبيه و انتيا هازاتو تجري بيه عند مرأة عارفتها بلا حياء.
المفروض من اول مرة قللت فيها أدب تزوريها بلا زوجك.
بالنسبة لتصرفات بنت خالك غير الطبيعية حلها في الحوار .
تكلمي معاها و بيني بلي راكي ضد تصرفاتها و بلي كي تشوفك مع راجلك تقادر روحها .
و احكي مع خوك ثاني يلم مرتو و يحط حدود لتصرفاتها كي تكون مع الأجانب.
اذا اهتدت بعد كلامك معاها يعني تصرفاتها تنم عن جهل و قلة ذوق لا أكثر
.اذا كررت تصرفاتها بعد الحوار يعني راهي قاصدة الشي هذا و هنا وجب الحذر منها .
ملاحظة أخيرة موضوعك مطروح في قسم مشكلتي يعني مخلط فيه رجال و نسا و كاين كلمات ذكرتيهم مالازمش يتقالوا حنا نسا ماننتبهولهمش ما يأثروش فينا بصح بالنسبة للرجال...!!

[ع.عيسى]

هذه المرأة غير سوية ، نحن ايضا عايلة كبيرة ومكانش الحجبة بيناتنا ومع ذلك جامي صرا هذا الموقف ، هذه المرأة تريد ان تبين انوثتها قدام ازواجكم باش تبدا المقارنة بينها وبينكم ، وتحسس الرجال الاخرين انهم متزوجين بنساء فاقدين للانوثة ، لازم تقولوا لخوكم ان يضع حدا لتصرفاتها الغير سوية

[mina2004]

روحي لاخوك قوليلوا يبين رجولتو و يبرم شلاغمو قدام مرتوا نقولوا هاذي خامجة و مش متربية ديوثة نتاع رجال مالا خوك واش نقولوا عليه ولا عاجبوا الحال ماعلابالوش باللي عيب يديروا هكا قدام الناس اسممحيلي مي حتى خوك الحق فيه هذي حكاية ما بتسكتش عليها و لا راجلك هذا قاعد يشوف و يضحك ههههههههههههههههه النهار كامل و هو يشوف في هاد الافلام على المباشر اجري على روحك احسن ما تديلك راجلك هذا اللي يتفرج في السيناريوهات و الافلام هادي و عسي على راجلك اكثر من هذه المخلوقة لانوا واضح انوا الحشمة ماتسعاهاش و راهي باينة وواضحة وضوح الشمس راهي مقمرة على رالك باه تديهولك اتونسيون منها القولها حل في اقرب وقت و مابعد السواهي دواهي نظن باللي فهمتي واش قصدي درك هديك الضحكات لم تاتي هباء منثورا و ماكانش دخان بلا نار انقذي زوجك من الحفرة التي سيقع فيها مكيدة زوجة اخوكي المصونة اسفة اذا بالغت في الكلام الاانني لما قرات الموضوع انفجرت قنبلة ثرثرتي اللامنتهية لهذا اعتذر في امان الله

[sohaibdz]

الحل ساهل كيما تبدا دير هكاك نوضو نتوما و قولولها نخليوكم على راحتكم و في كل مرة هكدا حتا كاش ما تحشم شوية هي و خوك ، و خوك تاتي عيب عليه كيما ساكتلها

[lalib40]

راجلها هو السبب يعني خوك

[سيرين راجي]

المشكل فالاختلاط كيما قلتي احنا ما عندناش هاك حتى اذا المرا راحت لدار خوها الرجال ياكلوا وحدهم والنساء وحدهم المرا كي تتزوج خلاص مابقى ولد عمها ما بقى ولد خالها لا زم رجالكم يكون عندهم غيرة على نساهم باه ما توصلوش لهذا الحد بطلوا الخلاط ارجعوا للدين

[أم رقية نسرين]

سلام ختي
اولا نقولك الأمر كيما ذكرتي الإختلاط و متقوليش عائلة وحدة هدا ميبررش هاد الإختلاط لازم النساء يقعدو وحدهم و الرجال وحدهم
و حاولي نتي او خواتتك كي تروحو لدار خوكم ادخلو وحدكم ميدخلوش ازواجكم يعني يوصلوكم من بعد يجيو باه يديوكم لانو اسمحيلي راهي دير في فتنة كبيرة
ثانيا هي تعدات كل الحدود و مدامها كيما ذكرتي لازم تهدرو نتي و اخواتك معاها وجها لوجه بكل صراحة و انصحوها تبدل هاد ااتصرفات اامخجلة و اخوك تاني راهو مقصصصصر بزاف
ربي يهدينا و يهديها

[nihal159]

صراحة المشكل راهو في خوك؛ كيفاش خوك يسمح بقلة الحياء هذي قدام نسابو؟؟؟؟؟؟؟؟؟ لاحول ولا قوة إلا بالله.

[ام شرفو]

اسمحولي كاين اختلاط و اختلاط هاذي عائلة واحدة يعني صلة القرابة ما تخليش مرت خوك تتصرف بهذا الشكل و انتوما تشوفو ساكتين
الحكاية فيها ان
انا بحكم تجربتي جيت لعائلة تبعد على دارنا 600 كم اول حاجة نعرفوها هي العادات و التقاليد تاعهم و اذا جات وحدة كيما مرت خوك راهي يا تتربى من زوجها اولا او والديها او حماتها و حتى لوسات تاعها فما بالك بوحدة من صلب العائلة

[oumhana]

المراهذي كارثة

[النجمة القطبية]

اسمحيلي يا اختي لكن انا اللي لاحظتووا ان كامل العايلة تعكم مخلطة وحتى انتم تتحملوا جزء من المسؤولية
مثلا حكاية انها راحت تجري ولابسة نويزات اكبر دليل انكم تروحوا ليها في مواعيد غير مناسبة وبدون موعد مسبق وانتوما اصلا عارفين عقليتها وتزيدو في الطين بلة
واش حبين تلقاو في دار امراة عايشة مع زوجها وحدها وانتوما زادمين عليها فجاة حابين تلقاوها بالنقاب مثلا !!
ثم انتم رحتوا ليها وشفتوا وقاحة تصرفاتها ورغم دلك تكركروا في رجالكم ورايحين جايين ورجالكم داخلين معاكم وعاجبهم الحال !!!
المفروض من مرة واحدة يتبينلكم مثل هده المواقف ميروحوش ويعتدروا وتروحوا وحدكم على الاقل ميكونش فيها احراج بصح لالا رجالتكم عاجبينهم الحال وكل مرة رايحين جايين لدار الناس
اسمحيلي على صراحتي والجزء الاخر من المشكل يتحملوا خوك اللي مفهمتش وراه عقلوا عاجبوا الحال وساكت
انا الحل اللي نمدهولك قصروا الزيارات وادا رحتوا متدوش الرجال وادوا الوالدة او الوالد مشكيتش تبلغ بيها الوقاحة تتصرف هكا قدام الشيخ والعجوزة
واخطيكم منها عيشوا حياتكم واخططيكم من خوك ومرتا