مشكل عائلي

[مشكلتي]

السلام عليكم و رحمة الله

لم أجد خيرا من هذا المكان أتوجه إليه لأفضفض لكم و أطرح مشكلتي هاهنا ، فطالما توجهت لكم و خرجت بما يسر خاطري و يرضيني ، حسنا دعوني أتكلم بالعامية أحسن حتى لا يكون كلامي منمقا مزوقا بدون أدنى فائدة ،

أنا راني شاب في 20 من عمري ، نقرا سنة أولى جامعي ، المهم كي طلعت للجامعة و للأسف شفت بنت تقرا معايا في نفس الكلاسة و عجبوني أخلاقها الله يبارك ، و كي تعرفت عليها أكثر زدت أعجبت بعقليتها و طريقة تخمامها و وجدت كل ما يوافقني فيها ،

المهم تفاهمت معاها و تفاهمنا على كلش أني مارانيش حاب نبقا هكذا بهاذ العلاقة لي لا تسمن و لاتغني من جوع كيما رانا نشوفو الشباب ضرك الكثير منهم يكونو مع بنات يتمسخرو عليهم و مبعد يرموهم و يخلوهم ، أنا راني حاب نكون صادق مع الله أولا و مع نفسي ثانيا و مع البنت ثالث ،

المهم بلا ما نطول عليكم البنت كيما قلتلكم تفاهمت معاها على كل و عرفتها على الوالدة تاعي و حتى هي اعجبت بها و حبو بعضهم البعض و بدون مشاكل الحمدلله حتى انها دايما تسألني على أحوالها ،

صراحة كنت متخوف من والديها بحكم اني نقرا و مازلت صغير فقلتلها اننا نخطبك و العرس ما يهمش على 4 سنين و لا 5 كي نلقى خدمة المهم تكون معرفتي بيك أمام والديك و امام جميع الناس و رسميا ، هي وافقت و بسرور و تكلمت معا امها و حتى امها ما لاقينا حتى مشكل معاها و لا مع والدها يعني موافقين ، جاء وقت عايلتي حكيت للوالدة على نيتي و وافقتني و فرحت اني نخمم هكذا تخمام ،

أما جات تقول للوالد ، خرج هو المشكل الأكبر ، ما رضاش بواش قاتله ، دايما يقولها ماراكي عارفة والو ، مزاال صغير ، ما تديريش عليه و كلام من هذا القبيل ،

الحمدلله و أعوذ بالله من قولة أنا و بدون ما نفتخر و لا أي شيء لكن هناك أشياء تحتسب لي في ميزاني ، حيث اني متربي في عايلة محافظة على أخلاق بصفة كبيرة و منيش كيما كل أقراني من حيث التخمام و عندي شوية ثقافة لا بأس بها و منفتح في عقلي على شتى العلوم ،

بالله عليكم كاين انسان ما يبغيش ولده يروح للحلال ؟ ما فهمتش اذا راه حابني نبقى فالحرام و لا نروح معا ذيك و معا هاذيك و معا هذيك و الا واش ؟
و الله يا إخوتي في الله ما عرفت كيفاش نتعامل معاه ، هاذي المشكلة الوحيدة لي ما لقيتلهاش حل في حياتي ،

رغم أني متفق معا البنت و هي بدورها متفقة مع والديها على كل شي من حيث المصاريف و العمل و كل شي تقريبا يعني ماكان حتى مشكل من هاذ النواحي ، لكن ما حبش يفهم بلي منقدر نبقى في علاقات كيما هاذو الله غالب هاذي هي عقليتي ،

ملاحظة : راني متأكد 200% بلي هي الإنسانة المناسبة لي من حيث الدين و الأخلاق و التطلعات للمستقبل و كل شي و حتى انها قابلة تسمح في قرايتها و كل شي و تبقى في البيت و هاذا شي كنت اظن انه مستحيل في وقتنا ،،


شكرا لكم مسبقا على نصائحكمو بارك الله فيكم و عليكم ....

[محارب الحمق]

حتى أنا راح نكون معاك صريح, المتدين لا يقيم علاقة مع أي بنت تحت أي ذريعة, ومن يريد احداهن فليطرق الباب. جميل أنك تسعى الى تدارك خطئك بخطبة البنت, ولكن وحتى وان خطبتها فهي ليست زوجتك ولا يحل لك الاختلاء بها ولا التحدث معها بخصوصية. أنا أتفهم الوالد, انت صغير بالسن ولا تملك أي شيء بعد, وكل المصاريف سيتحملها والدك لا أنت, وأستغرب كيف قبل أهل الفتاة بوضعك وانتظارهم لك لسنين. المعروف أنه كلما بعد الزواج كثرت المشاكل. ومن كان يصبر من أجلك الان قد يضيق ذرعا فيما بعد. على كل حاول أن تقنع والدك بالحوار وأن تستخير الله عز وجل, فان أبى وتعذر الأمر, أعتقد أنه من الأفضل أن تصبر وتقطع علاقتك بالفتاة. من ترك شيئا لله عوضه الله خيرا منه, فأنت ستترك الأمر طاعة لوالدك وحتى لا تتخذ الفتاة رهينة لك.. أعتقد أنك تسرعت قليلا بانشاء هذه العلاقة, وعليك أن تتحمل التبعات بكل مسؤولية. ربي يسر الامور

[النجمة القطبية]

الوالد ديالك عندوا الف حق يا الاخ
وانت نظرتك للزواج غير ناضجة وغير واضحة المعالم
انت مثل اللي داخل للحرب دون سلاح
حاب تخطب وتتزوج وانت طالب سنة اولى جامعي مازال حتى مستقبلك ما بانش
حتى سوق العمل مدخلتوش
معندك حتى فكرة على الزواج ومسؤولياتوا
وزيد اللي حيرتني اكثر قولك ان زعما باباك مشي حابك تروح للحلال وحابك تروح للحرام !!
يعني درك في ظنك لما تخطب الطفلة وتخليها قدامك خمس سنين وانتوما رايحين جاين خاصة انها تقرا معاك هل هكدا راكم في الحلال مثلا !!!ولا تخطبها وما راحش تهدر معاها حتى تتزوجوا ولا كيفاه
الخطة ديالك غير مدروسة ومزالك صغير تبانلي ركز في الاهم المستقبل ديالك واكيد كي تنضج وتبدا تخدم والدك راح يكون اول الموافقين
بالتوفيق

[هـــدوء]

حالة أهل البنت معاك هي حالة لي يشري الحوت في البحر
أعطوني بنتكم باسم واش ممـــــــــكن نحقق في المستقبل المجهول.
طريقة سيئة لتقنين علاقة غير سوية.
و الغريب موافقتهم !!!!

أول واحد كان لازم يعرف بموضوع الخطبة هذا بعد ماماك هو باباك
كيفاش تحكي مع والديها و تدي موافقتهم بلا حتى ما يوافق باباك ؟
وين علبالك بعد خمس سنين تلقى خدمة و دير دار و تكون جاهز للزواج؟
ووش يخليك واثق انك ماتغيرش رايك فيها و هي ماتغيرش رايها فيك!!

يعني منا على خمس سنين حي و ميت أولا و ثانيا رغبات الإنسان تتقلب بين ليلة و ضحاها فما بالك خلال 5 سنوات
مشروع زواجك كلو مبني على فرضيات و رهانات أما الصح ما عندك والو .

من جهة تحكي على الحلال و بلي الطفلة متخلقة و من جهة تقول بلي راك معاها في علاقة !!!
في رأيك رجال لي من 30 و طلع و مازوجوش غير هكاك برك ؟
حتى هوما دارو مخطط كيفك منبعد لقاو بلي الحياة مش بالسهولة لي راك تشوف فيها

تفكيرك بسييييط جدا و بعيد بزاف على الواقع .
جامي تخمم تتقدم لبنت و أنت ماعندك لا دار لا خدمة لا مستقبل واضح عدا عن الصحة النفسية و العقلية و الجسدية.
اقرا قرايتك عزيزي و ماتحرقش المراحل .مازالك صغير مش في السن برك و إنما بالخبرة.

[محمد جديدي التبسي]

وعليكم السلام ورحمة الله وبركاته
اه يا دنيا حيرتني علابالك راك في سن خويا الصغير اللي راه حاير فيا علاه ما تزوجتش لذرك
رانا تجاوزنا 30 سنة ومزال مش قادرين على الزواج رغم اني خدام والحمد لله
الزواج مش حاجة ساهلة ومش بالضرورة ادا ما تزوجتش راح تعيش في الحرام
حافظ على صلاتك واقرا على روحك وخالط ناس صالحين ومع الوقت تتعلم حرفة ولا كاش حاجة تجيبلك دراهم ثم تقدر تخطب وتتزوج ووالدك عندو الف حق لانو يعرف الواقع مليح.
كما ان ارتباطك بفتاة هكذا طول هذه الفترة عذاب نفسي وليس استقرار كما تظنه انت لذلك ينصح بعدم اطالة فترة الخطبة والاسراع بالزواج وفي وضعك انت هذا صعب وربما مستحيل لانك لست جاهز ماديا للزواج.ربي يفتح عليك

[sohaibdz]

"ما فهمتش اذا راه حابني نبقى فالحرام و لا نروح معا ذيك و معا هاذيك و معا هذيك و الا واش ؟ "
كايت بزاف ناس اكبر منك و مزالو متزوجوش و ماراحوش معا هاذيك و هاذيك كيما راك تقول
حبيت نقولك انت راك انسان و عندك عقل حاول تستعملو شوية بعتوك والديك تقرى و ليت تحوس على طفلة تتزوج بيها !!! و اول وحدة شفتها لصقت فيها ، و انت واش تعرف حتى تقول بلي تناسبك ولا لالا راك في سن المراهقة
و تفرضو خطبتها كيما تخطبها رايح تولي معاها في الحلال ؟؟ بالعكس لتم وين تزيدو تقربو لبعضاكم و توقعو في الحرام اكثر
و الطفلة هاذي مدام راهي في علاقة معاك واش يضمنك انها مادارتش علاقات من قبل و متزيدش تدير ؟؟
انا ننصحك تركز مع قرايتك و تنحي الخرطي هذا من راسك

[زبدة ذايبة]

مازالك صغير

20 سنة تخطبها

و25 سنة تتزوجها هذا إذا قدرت

وخلي الخدمة العسكرية

تقدر تلحق 30 سنة عادي

هذي 10 سنوات كاملين رايح تبقى نفس الشخص

ما تتبدل عقليتك

ما تتبدل نفسيتك

تبقى أنت أبو عشرين هو أبو ثلاثين

بصح الحق ماشي فيك انت

الحق والخطأ في أمك أولا

ثم في أهل البنت

قاعدين تلعبوا في لعب مايصلحش

وأول من يدفع الثمن هو البنت

الزواج مسؤولية وليس شهوة يابني

ومن كتابتك واضح أن البديل بالنسبة ليك جاهز

وكأنك تهدد بأنه إذا ماوافقوش على الحلال يمكن أن تذهب للحرام !!!!!!!!!!!!

وبالتالي ونستنتج أنك لاتحب هذه الفتاة سوى نزوة عابرة

وشهوة تنتهي بيقظتك وتخطيك لمرحلة المراهقة .

ذاك النهار تقوللها كنت صغير ومانعرفش

خير ألتهى بقرايتك وماينفعك

ماعندك علاه تخسر أخلاقك ودينك مع البنات

لأنك كما تدين تدان

وماتفعله في بنات المسلمين ستدفع ثمنه من أخواتك وبناتك

رب يهديك

[ابو سليمان10]

يعني اما الحرام اما ان تفعل شىء لا يقبله العقل...هذا دليل على انك غير قادر على اتخاذ قرارات صائبة
انت تحت تاثير الرغبة الجنسية فقط و اي فتاه غيرها كانت ستكون المناسبة لو اختلطت بها ...
الناس كملت القراية و لم تجد العمل الا بعد سنوات...و ناس وجدت العمل و ما زال لم تجمع ثمن مهر ...و من جمع ثمن المهر لم يجد اين يسكن

[نجاة^^]

وعليكم السلام
تصحيح مفهوم الزواج(تع هاذ الزمان) ليس فقط ايجاد المراة المناسبة ،ولا نسيت مصاريف العرس والمهر والخطبة ووووو
بعد عام تلقى ذراري كيفاه راح تعيشهم ،،تزيد شوي لمرا تقولك انا بغيت داري وانت حتى مستقبل الخدمة مجهول وبعيد عليك انا رأيي كون تقولها تسناك بدون خطبتها ولا التحدث معها خلي يماك تسقسي لك عليها انت اتهلا في قرايتك وابني مستقبلك شوف لبعيد مش حذا رجليك الدنيا راهي صعابت 20 سنة بالنسبة للذكر مزالك صغير على المسؤولية والدار عقلك مزال منضج نصيحتي ليك اقرا وابني روحك مليح علاه تعب في مخك بهاذ التخمام ولمرا والمشاكل هاذو ،انت راك مخلوع من بنات ثرك على بيها محبيتش تضيع فرصتك ،اذن هذا هو الحل خاصة مع رفض الوالد خلي البنت متحكي معها ما تكبار العلاقة وصدقني اذا كانت بنت حلال تسناك ولو 100سنة وحتى بدون اتصال المهم خمم مليح في روحك اقرا ،حوس، عيش هاذ الفترة ،والباقي خليه على ربي ان شاء الله يوفقك لما يحب ويرضى
سلام

[زهرة جوري]

لازم ترضي والديك

[رندة.]

20 سنة مازالك صغير على الخطبة والزواج، كمل قرايتك ودبّر خدمة وابني مستقبلك وامبعد ساهل الحال. أهم حاجة الآن هي تركز في قرايك باش تنجح وتتفوق و باش تقدر تحقق اهدافك.
نحي من بالك موضوع الزواج نهائيا مادامك مازال تقرأ. والاب نتاعك راهو عارف واش راهو يقولك. وكلامه كان على جال مصلحتك مش لأنو غاير منك ولا مايحبلكش الخير.
ربي يهديك ويوفقك ان شاء الله

[سيرين راجي]

شكون قالك كي تخطبها لمدة 4 سنين ولا 5 كيما راك تقول تقدر تولي تشوفها وتهدر معاها عادي
بدون عقد شرعي راها غربية عليك ما يجوزلك والوا
اسمع كلام باباك يعرف صلاحك كي توجد روحك وتتخرج اتكل على ربي واخطب وتزوج ديراكت
20 سنة مازال ماك فاهم والوا حنا ماعندناش خطبة فيها خرجات كيما الكفار حنا عندنا علاقة زواج ديراكت
ما تبعش المسلسلات هذاك هو الظلال المبين

[قدور بن عاشور]

لوكان جيت بلاست باباك ناخذ نفس الموقف و نزيدلك الصفعة ملفوق هههههه

[mohamed nadim]

باباك عندو الحق و علابالو بكلش

راني حاير باباها و يماها كيفاش قبلو بيك

انت مازالك دراري
مازالك 5 سنين تتخرج مالجامعة

5 سنين تحوس على خدمة

7 سنين باش دير التاويل

اول من سيسمح فيك هادي اللي راك تقول هي المناسبة

و كي تقول راهو حابني نروح للحرام و تهدد

روح للحرام راهو باين لكن انتظر العقوبة الالاهية بعد دلك

و هل تظن نفسك الان في الحلال

سيأتي يوم و تفيق بلي حتى الان و راك فالحرام


اتلهى بقرايتك ياوليدي بركا ما تتمسخر