احالة شركة مرسيدس للنيابة العامة في مصر

[مهدي أيمن]

احالة شركة مرسيدس للنيابة العامة لرفضها اصلاح محرك سيارة b-200

احال جهاز حماية المستهلك شركة مرسيدس بمصر للنيابة العامة بعد فشل مفاوضات الجهاز مع الشركة لإصلاح محرك سيارة مرسيدس موديل b200 بسبب البنزين، ونشرت صفحة جهاز حماية المستهلك ملابسات الخبر على صفحته على موقع التواصل الإجتماعي فيسبوك، وإليكم ما تم نشره:
:القصة كاملة مع صورة محضر اللي قدمه الجهاز لنيابة الدقي

مع العلم انه الاعلام محدش راضي ينشر الخبر و حهاز حماية المستهلك برده مش راضي ينشر الخبر حفاظا علي سمعة مرسيدس الفاضلة بالرغم من انهم قبل كده نشروا عادي خبر احالة نيسان و فورد و اسبرانزا للنيابة لكن الواضح ان مرسيدس فوق القانون و الدولة و العملاء و مسيطرة

اولا اتضح ان البنزين في مصر مغشوش و كله شوائب و ان شركة مرسيدس بتبيع عربيات هي عارفة كويس جدا ان موتورها لا يتماشي مع البنزين المصري و مصممة تكمل في خداع الناس خاصة ان الموضوع ابتدي يزيد و كم الموتورات اللي باظت رهيب هتلاقي كل واحد يعرف واحد علي الاقل حصلتله نفس المشكلة مؤخرا و مرسيدس مكملة تبيع و تلم فلوس و احجز العربية بالست شهور و ادفع مبالغ و هما عارفين ان تكلفة الموتور من 100 الي 150 الف جنيه و الضمان تنساه لان عندهم الاختراع السحري اللي هو تحليل البنزين لانهم عارفين انه البنزين 95 لما هيتحلل هيطلع في حدود 92 اما 92 بيطلع 86…….. و بكده نغسل ايدينا من عيب العربية و نلزقها فى البنزين و مفيش ضمان و نعمل مبيعات و نغش الناس باعلي معدلات بيع في الشرق الاوسط. اما بقي لو قررت تبعت شكوي المانيا فمش هيعبروك و هيقولولك احنا لينا وكيل في مصر هو المسئول و هيرد عليك واحد من مصر بني ادم بس مدي علي رسالة مسجلة مش بيقول غير كلمة “نعمل تحليل البنزين” انا العربية كانت ماشية معايا 8000 كيلو بس و في الضمان .. قدمت شكوي في جهاز حماية المستهلك و مشيت في الاجراءات و عملولي لجنة فنية من دكاترة في كلية الهندسة جامعة عين شمس و بعد دراسة الشكوي و بناء عليه اصدر الجهاز قرار ملزم لشركة مرسيدس باصلاح السيارة او احالة الشركة للنيابة… مرسيدس رفضت الاصلاح ! و تم احالة الشركة للنيابة العامةبتاريخ 2 اكتوبر، رقم المحضر 72/2014 جنح الدقي و سيتم استدعاء رئيس مجلس الادارة كريم سامي سعد للتحقيق معه و تحويل ملف القضية الي المحكمة الاقتصادية لعدم تنفيذ شركة مرسيدس لقرار جهاز حماية المستهلك الملزم و مخالفة القانون . في الحقيقة شركة مرسيدس لا بيفرق معاها عملاء و لا اجهزة دولة و لا قانون و لا بيحترموا حد ولا بيحترموا نفسهم و لو لا قدر الله حصل حاجة لعربيتك هما خلاص عملوا اللعبة بتاعت تحليل البنزين لانه حتي لو بتحط البنزين 95 اللي انت ماضي عليه في الضمان هيقوللك احنا اسفين مش هنصلح لان التحليل بيقول انك حطيت بنزين به شوائب 95. علي فكرة انا رفضت احلل البنزين لانه انا اشتريت العربية قبل ما يقرروا يمضوا الناس علي موضوع البنزين لكنهم برده حللوه بدون موافقتي و طلع 91.7 !!!!!! ما تشتروش مرسيدس و قدموا شكاوي في حماية المستهلك عشان كل ما الشكاوي بتزيد الضغط المجتمعي بيزود صلاحيات حماية المستهلك في الضغط علي الشركة لسحب السيارات و الزامهم بتعويض المشترين. العربيات الجديدة كلها فيها المشكلة دي c180, cla, b180 يا ريت تاخدوا بالكم لحد ما مرسيدس تقرر تعترف بالمشكلة و تتحمل المسئولية كاملة و تعدل الموتور زي بي ام دبليو و غيرها.