كيما وعدتكم قاطو الشمعة بالخطوات المصورة

ام سراج وملاك · 2015-09-05, 23:49

البسملة1

اليوم خدمت كمية من الترتولات وحشيتهم بالنسلي وحلوة ترك وكاوكاو بقاتلي كمية من الحشو زدت فيها نواد كوكو حتى تحصلت على حشو رائع وكانت عندي شيكولا بيضاء وفرمسال سوداء تفكرت مجموعة من العضوات بعد ماشافو موضوعي في قسم الوصفات المنقولة نتاع قاطو الشمعة لي عجبهم وعجبني وكنت جربتو عدة مرات بحشو مختلف وثاني كاينة اختي عضوة معانا ام ماسين جرباتو هيا ايضا وحطت تطبيقاتها في قسم الاطباق المجربة من قبل و كنت وعدت بعض من العضوات اني نصورلهم قاطو الشمعة بالخطوات بعد مقريت ردود نتاعهم في موضوعي نقلهم اسمحولي طولت عليكم باش صورتلكم الخطوات منطولش بزاف ونخليكم مع المقادير
مقادير الوصفة المنقولة
350غ كوك اي جوز الهند
حليب نستلي اي محلى
للتزﯾن
اعواد القرنفل
شكولاطة بيضاء
طريقة تحضير حلوة الشمعة بجوز الهند و حليب محلى
قومي بـجمع الكوك بحلﯿب محلى ونشكل منها حبال طوال ونلفوھم في السيلوفان
ونتركها فالثﻼجة حتى تتماسك ومن اﻻحسن ﯾبقى ليلة كاملة
ثم نقطعها حسب الحجم الذي نريده ونحاول ان تكون بنفس الحجم
نغرق بيدينا قليلا الشمعة من الوسط نذوب الشيكولا في بان ماري وناخذ بالملعقة ونصب
على الشمعة
وفي الوسط نعمل عود القرنفل بالمقلوب راسھا من تحت
ونبدا نحاول براس السكين نھبط دموع على الشمعة كما في الصورة لكي تصبح كالشمعة اتمنى ان تكون الفكرة وصلت.
وهذا رابط الوصفة لي نقلتها
https://www.djelfa.info/vb/showthread.php?t=1671664

هذا هو الموضوع لي نقلتو في الوصفات وطبعا جربتو بصح كل مرة نغير في الوصفة بطريقتي يعني حرفت في الوصفة الاصلية نخليكم مع بعض الحشو لي يكون داخل بدل من نواد كوكو ونسلي لي في الوصفة الاصلية
ممكن تستخدمي اي حشو ميطيبش تعرفوه ويعجبكم نخليكم مع الحشو لي درتو انا في قاطو الشمعة من قبل باش تكون عندكم فكرة عن تغير الحشو
الحشو الاول :
زوج باطات قاطو ماجور شيكولا مرحي + زوج كيسان لحظة مقلية + كاس كاوكاو مقلي ومرحي باط عسل متوسط +200غ زبدة ذايبة وباردة + زوج مغارف كبار كاكاو تشكلوهم صبيعات ووتعدلوهم مليح واكيد من صور رايجين تفهمو مليح
ومرة درتو بالحشو هذا
الحشو الثاني:
كاس جوز مرحي + كاس حلوة ترك مرحية+3 كيسان بيمو مرحين + باط قوفريط نتاع شيكولا مرحي + باط نيوتيلا شيكولا + باط عسل صغير
طبعا طريقة التحضير واضحة نلمو المقادير كامل ونشكلوهم صبيعات ونعدلوهم على شكل شمعة
التزين : شيكولا بيضاء ذايبة اعواد قرنفل او شيكولا فارميسال سودا ء
كبما قلت نشكلو صبيعات ندخلوهم لثلاجة ساعة اواليلة كاملة من قبل و كي نزينو الشمعة نوقفو الحشو فوق صحن ونصبو عليها بالمغرف شيكولا بيضاء نخليوها تيبس شوي برك نزينها بالخطوط نتاع شيكولا على لجوانب انا مستعملتش السكين استعملت مغرف صغيرة عمرتها شيكولا صبيت على لجوانب على شكل خطوط كيما تكون الشمعة ذايبة نحط اعواد قرنفل الراس دخلوه من تحت او شيكولا فارميسال ان شاء الله الشرح يكون واضح
بالنسبة للحشو لي درتو في هاذي الوصفة كيما ذكرت من الاول
في صحن حطيت نيسلي + كاوكاو مرحي + حلوة ترك ولميتهم بنواد كوكو حتى تحصلت على عجين شكلتهم صبيعات عدلتهم على شكل شمعة و التزين كان شيكولا فارميسال وشيكولا بيضاء
نخليكم مع الصور

هنا بالمغرف نصب على لحواشي الشيكولا البيضا نعطيها الشكل لي تكون ذايبة هنا انا مستعملتش السكين لقيت هاذي النتيجة احسن

وهنا الصورة النهائية تفضلو كولو الشمع ههههه بصحتكم

وهاذي الصور نتاع تطبيق اختي ام ماسين حطيتها هنا طبعا بعد اذنها باش تكون عندكم فكرة عليهم اكثر

وهنا درتو في عشوراء اديناهم لمرت خويا

نخليكم في امان الله واي سؤال انا في الخدمة
اختكم ام سراج وملاك