[اعلان:] ملتقى تلاميذ السنة الرابعة متوسط 2017

[آيـــات]

في اي المواد ستقومون بدعم دعاء

[☆دعـــــــاء☆]

لحد الآن ما نحن متأكدون منه اننا سنقوم بالاجتماعيات والعلوم ولكن غدا سيخبرونا بالباقي

[اكرام براءة]

عدنـــا

أهلا بعودتك شبيهتي

اشتقت لك

كيف حالك غاليتي ؟

[اكرام براءة]

بخصوص الدعم نحن ندرس في العطلة 4 أيام ابتداءً من يوم السبت + ساعتين في كل مادة

توقيتنا للدعم

السبت : علوم + فيزياء
الأحد : رياضيات + فرنسية
الاثنين : اجتماعيات + انجليزية
الثلاثاء : لغة عربية

[أﻣ̲ـيےـږة]

السلام عليكم
لقيت هاد النصائح،نتمنى يفيدوكم
*كاين مشكلة يعاني منها كامل الناس في هذا الزمان خاصة فئة الطلاب و هي قلة الوقت و مع اقتراب موعد شهادة التعليم المتوسط راهو يزيد القلق و الخوف خاصة لانو مابقاش الوقت لذلك جبتلكم طرق لحسن تنظيم الاوقات و استغلالها بشكل مفيد، نتمنى انكم تستفادو:
- اول حاجة تديرها انك تحكم جدول التوقيت تاعك تدير فيه 7 ايام، تعمرو بجدول التوقيت المدرسي، كي تخرج مالمدرسة عندك حوالي الساعة (ما تديباصيش) استراحة بعدها 45 دقيقة تحل فيها الواجبات اللي عطاوهملك الاساتذة عندك موراها ربع ساعة استراحة، اذا ماعطاولكش ولا كملت قبل الوقت ابدى فالمراجعة لانك حتما بالاك غدوة مايكفيكش الوقت باش تراجع بروفيتي، تانيك ما تنساش تدير الوقت اللي تمارس فيه الهواية تاعك فالجدول، و كيما الجمعة وقت الجمعة الولاد يروحو للجامع و البنات يقراو القرآن كي تكمل هاذو كامل تحكم الوقت الفارغ و تعمرو بالتالي: كل يوم خصص وقت تقرى فيه، هذا الوقت ما يتبدلش من سمانة لسمانة، و ما تديرش فيه زعما الاحد مالستة للسبعة نحفظ تاريخ لالا ماشي هكا، تدير نهار الاحد نقرى مالستة للسبعة يلزم عليك تحدد هدف لكل مرحلة مثلا تقول ماليوم لنهار الجمعة الجاية نكون حفظت من الدرس كذا الى الدرس كذا فالتاريخ و حليت موضوع شهادة التعليم المتوسط تاع العام اللي فات و اللي قبلو فالرياضيات، و راجعت مليح الدرس كذا فالعربية (ملاحظة: حجم الاهداف يصعب ان احدده لكم فكل تلميذ يحدد لنفسه الهدف حسب ما تبقى له من الوقت قبل موعد الامتحان، عدد الدروس اللي مازال ما حفظهمش، قدرته على الحفظ/الفهم في مدة قصيرة...)
الافضل ان تكون مدة هذه الاهداف أسبوع، اقصد انك تحدد هدفك لهذا الاسبوع، و ماتديرش اهداف تعجيزية، دير هدف معقول لكن ما تتهاونش كامل و يروح الوقت و نت مادرت والو.
بعدما حددت الهدف الاسبوعي تاعك دير هدف يومي مثلا يوم الاحد نحل موضوع الرياضيات، الاثنين نحفظ 6 صفحات تاريخ، الثلاثاء نراجع من القاعدة x الى القاعدة y فالعربية...الخ ←كاين بعض الشروط الواجب مراعاتها:
-من الافضل مراجعة مادة علمية ثم ادبية ثم علمية و هكذا ما تراجعوش تاريخ و جغرافيا و عربية و مدنية مع بعضهم و مباعد رياضيات و فيزياء مع بعض و اذا حبيتو تراجعو اكثر من مادة فاليوم ديرو نفس الترتيب ادبي/علمي/ادبي.
-احرصوا على اخذ 10 دقائق راحة بعد كل 45 دقيقة دراسة (و ماشي 45 دقيقة ڨصرة ولا نت غايس فالكتاب اومبعد تجي تدي راحة، كون سيريو مع روحك)
-فوقت الراحة ماتدورش كامل بالتيليفون، ني التيلفزيون، اخرج شم الهوا، اتكسل، كول حاجة خفيفة اومبعد ولي تقرى
-ما تعمروش كامل وقتكم، ما تخنقوش رواحكم خلو شوية وقت مثلا كي تجي للدار ريح وحد الساعة اومبعد روح تقرى. -صح يقلك الحفيظة مع الصباح ساهلة مي بزاف ناس ما يقدروش يقراو الصباح، الكونترار فالليل اللي يفهمو و يحفظو بالخف، نتوما سيوهم للزوج و شوفوا واش يخرج عليكم.
-كامل التلاميذ كي يجو يقراو يبانلهم التيلفون (و انا منهم) و كاين حل لهاذي كي تجي تقرى اعطي تيليفونك ليماك/باباك/خوك الكبير و قلو رايح نقرى من كذا لكذا حتى هذا الوقت التيليفون يبقى عندك مغلوق ما نحب نشوفو ما نسمع بيه
-من الافضل ما تقراش في غرفة النوم و اذا ماكانش عندك خيار اخر ريح عند التاقة و اعط ظهرك للسرير لان العقل مبرمج اليا كي يشوف السرير يفهم بليك هنا الرقاد ماشي القراية
-وفر اضاءة جيدة و مكان مافيهش الضجيج
-اقعد و ظهرك مسڨم، ما تعوجش ظهرك
-نظم المكتب و الغرفة اللي راك تقرى فيها و خير مكان واحد تقرى فيه دايما ماشي اليوم هنا غدوة لهيك، هكا عقلك يولي غير تروح لهاديك البلاصة يوجد روحو للقراية
-ما تحط فوق المكتب غير الادوات اللي تسحقها و نظمهم مليح
-دير قائمة قدامك كاتب فيها واش الاهداف اللي حاب تديرهم اليوم و كلما تكمل هدف خربشو
-اخر حاجة و هي الاهم اعرف كيفاش ترتب الاولويات، شوف المواد اللي ماخدمتش فيهم و فيهم معامل كثر هوما اللي تراجعهم كثر بلا ما تهمل اي مادة
-الجدول هذا اللي هدرنا عليه مع اللول ديرو نهار الخميس عشية ولا الجمعة عشية -في نهاية كل مرحلة (أسبوع/يوم) شوف الاهداف تاعك ويلا حققتها كامل اذا لالا شوف وين راه الخلل و صلحو*
بالتوفيق

[أﻣ̲ـيےـږة]

تفضلوا موضوع عن طريقة التعامل مع مواد الحفظ *من هنا*

[اكرام براءة]

نصائح كافية وافية أختي أميرة

بارك الله فيك و جزاك عنا كل خير

موفقة بإذن الله أخيتي

+


معليش نسقسيك

كم أخدتِ في الشهادة ؟

[طالبة رياضيات]

معدل أميرة هو : 19.21 في الشهادة
حسب ما أتذكر

[اكرام براءة]

ربي يبارك

ماشاء الله

[آيـــات]

شكرا غاليتي اميرة افدتني حقا سابدا بالتنفيذ وفي العطلة اذا سيقل دخولي للمنتدى

[أﻣ̲ـيےـږة]

المشاركة الأصلية كتبت بواسطة اكرام براءة

نصائح كافية وافية أختي أميرة

بارك الله فيك و جزاك عنا كل خير

موفقة بإذن الله أخيتي

+


معليش نسقسيك

كم أخدتِ في الشهادة ؟

و فيك بركة إكرام
شكرا لدعائك
ديت 19.21،لعقوبة ليك و لكامل لبنات
بالتوفيق لك

[أﻣ̲ـيےـږة]

المشاركة الأصلية كتبت بواسطة صديقتكم سارة

شكرا غاليتي اميرة افدتني حقا سابدا بالتنفيذ وفي العطلة اذا سيقل دخولي للمنتدى

هذا واجبي سارة
بالتوفيق

[أﻣ̲ـيےـږة]

بالنسبة للمواقع لي كنت نحل مواضيعها هي:
الموقع الأول للدراسة *نتوقع كامل تعرفوه،هو أفضل موقع بالنسبة ليا*
فيزياء غليزان *هذا تاني فيه مواضيع ملاح*
dzexams *هذا الموقع ممتاز ننصحكم بيه *
موقع الدراسة الجزائري
محفظة الأستاذ خليفة *عاونني بزاف في مادة اللغة العربية*
كاين منتديات كنت نحل منهم مواضيع كيما الطاسيلي و التعليم نت
و بطبيعة الحال ماننساش المنتدى تاعنا،منتدى الجلفة
اذا تفكرت مواقع أخرى،راني نقولكم

[آيـــات]

المشاركة الأصلية كتبت بواسطة أﻣ̲ـيےـږة

بالنسبة للمواقع لي كنت نحل مواضيعها هي:
الموقع الأول للدراسة *نتوقع كامل تعرفوه،هو أفضل موقع بالنسبة ليا*
فيزياء غليزان *هذا تاني فيه مواضيع ملاح*
dzexams *هذا الموقع ممتاز ننصحكم بيه *
موقع الدراسة الجزائري
محفظة الأستاذ خليفة *عاونني بزاف في مادة اللغة العربية*
كاين منتديات كنت نحل منهم مواضيع كيما الطاسيلي و التعليم نت
و بطبيعة الحال ماننساش المنتدى تاعنا،منتدى الجلفة
اذا تفكرت مواقع أخرى،راني نقولكم

شكرا غاليتي اميرة
ادعتي
شملتي كل ما يحتاجه تلميذ الرابعة متوسط
جزاكي الله خيرا

[أﻣ̲ـيےـږة]

المشاركة الأصلية كتبت بواسطة صديقتكم سارة

شكرا غاليتي اميرة
ادعتي
شملتي كل ما يحتاجه تلميذ الرابعة متوسط
جزاكي الله خيرا

العفو حبيبتي
ربي يوفقكم كامل إن شاء الله