الى الأخت zawali قريوش من مطبخي + قريوش على شكل قلب

[*زهرة اللوتس*]

السلام عليكم، كنت وعدت اختي zawali نحطلها طريقة القريوش كي نعاود نخدمو، خدمتو الأيام اللي فاتو وصورت المراحل ان شاء الله تكون الطريقة واضحة
المقادير:
كاس مرغرين او سمن او زبدة ذايبة وباردة (انا استعملت السمن)
4 كيسان فرينة + 2 ملاعق صغيرة خميرة كيميائية+ ملح
بيضة+ ملعقة كبيرة خل+ كاس تاي تاع ماء الزهر
التحضير:
نبسس (الفرينة + الخميرة+ الملح) بالسمن مليح ونضيف خليط (البيضة+الخل+ ماء الزهر) ونكمل بالماء البارد حتى نتحصل على عجينة متماسكة مش طرية
نقسمها على 4 او 5 كريات غطيهم مليح، خليها ترتاح على الأقل ساعتين فما أكثر


ناخذ بالوحدة نحلها بالحلال ونرشها بكمية قليلة تاع النشاء(ماتكثريش) وطبقيها على 3 كيما البارمي (permis de conduire) كيما نخدمو العجينةالمورقة



دوري العجينة عاودي حليها ورشي رشة خفيفة جدا من النشاء وعاودي طبقيها على 3(نفس طريقة العجينة المورقة)




حليها شوية وخليها بجهة حتى تكملي الكريات كامل

ابداي حلي بالواحدة(ابداي بالأولى اللي خدمتيها)حليها بالحلال حوالي 2 ملم ا اذا استعملتي المشينة حليها في 1 ثم 3 ثم 4
ثم ابداي التشكيل كيما تحبي الشكل سواءا الشكل التقليدي للقريوش او اشكال اخرى(كاين بزاااااف اشكال)،
انا خدمت هاذ المرة شكل القلب اللي تعلمتو من عند الفنانة طومة نشكرها على كل وصفاتها ربي يعطيها ماتتمنى ويحفظها من كل سوء ويوفقها في حياتها، والصور توضح الطريقة







كي تكملي كل العجينة اللي عندك حطي الزيت في كاسرونة يكون عندها علو، حطي كمية مليحة تاع الزيت، سخنيها مليح ومبعد نقصي للنار ازم تكون متوسطة باش يجيك لونه ذهبي باهي ويطيب من داخل في نفس الوقت، حطي الحبات في نفس الوقت بصح نتباعدين ماتكثريش العدد انا حطيت 5 ،كي يطلعو الفوق لوحي عليهم الزيت بالملعقة حتى يتنفخو، ماتطوليش وقلبيهم يزيدو يطيبو وياخذو لون على الجهة الثانية وماتغفليش عليهم حركيهم باش يجي لونهم متجانس


انا ماقطعتش 3 خطوط في الوسط كيما دارت طومة ، قطعت 5 خطوط باش تجيني الحبة كبيرة وشكلها اجمل وكل وحدة كيما تحب الشكل

شوفو كيفاه تجي الحبة

نحيهم وخليهم يقطرو في كسكاس، واحتفظي بيهم لوقت الإستعمال، اذا في نفس اليوم خليهم يبردو مليح وعسليهم بعسل مخلط بشوية ماء الزهر(العسل بكون ثقيل )



ان شاء الله نكون وصلت الفكرة مليح، واذا كاين استفسار انا في الخدمة وسامحوني على كثرة الصور