ملخص دورة الفراشات (بدون ردود)

[حبيييبة]

هذه المشاركة لفراشتنا نورة (jamaltahar)

اليسلام عليكم صباح الخير صديقاتي ومعلمتي راني نتبع كلش خطوة بخطوة وطبقت كلش عجبتني طريقتك في توصيل الفكرة و النشاط والهمة معلمتي حسيت براحة كبيرة حتى اني بديت نسترجع ذكريات الماضي كيوقفت قدام المراية وبديت نزغرد على روحي اما الماعن والحوض انا دايما نغسل الماعن قبل مانرقد لكن الوقت اللتالي وليت نبيتهم

[حبيييبة]

هذه المشاركة لفراشتنا ombouchra


صباح الخير حبيبة و كل الفراشات
عندي تطبيق في البورتابل يجيني فيه ادعية بمعدل 20 دعاء في اليوم و فيه اذكار الصباح والمساء بالاضافة الى الى الورد اليومي لكنه يجيني في الليل انا البارح اكتفيت بالاذكار والمعوذتان واية الكرسي وتركت الورد للصباح
انا اليوم صح راني حاسة روحي فراشة ربي يجزيك الجنة يا حبيبة والله بعثتي فينا البركة و النشاط انا البارح من كثرة ما عجبتني كوزينتي بايتة النوم فيها .......لكن كاين حاجة اللي ما نقدروش عليها واللي هي المنتدى واللي الاخت جيادا ربي يحفضها مست العصب الحساس نضم صوتي ليها وانظن كلنا عندنا نفس المشكل نتمنى تعطيلنا برنامج يضم وقت الدخول للمنتدى
اما عن مصروف البيت في الاول كنت انا نتصرف و من بعد رجعتلو المصروف ورجعت اول كل شهرنروح للسوبيرات نقضي للشهر ونجيب كذلك اللحم والجاج كذلك قيس شهر يعني في يوم لكن دركا ابتداءا من هذا الشهر حبيت انرجع المصروف لاني لقيت روحي نشري اشياء ما نستعملهاش هذاك الشهر .....وعندي عيب اخر يديلي كامل دراهمي هو انا انحب نشري لماعن تاع الدار حتى نقول خلاص لكن نلقى روحي رجعت
واش نقولك يا حبيبتي حراير اسم الجبار حياتي كامل وانا دايرتلو معنى اخر ربي ينورك كيما نورتينا ونتمنى تزيدي تمتعينا باسماء اخرى ان شاء الله

[حبيييبة]

هذه المشاركة لحبيبتنا فراشات العمر


السلام عليكم
بديت نكتب وخايفة لا نلصق في الميكرو ههههههههههههه
المهم نكتب شوية ونرجع من بعد نشوف البرنامج تاع اليوم
اول حاجة بدلت الديكور تاع شمبرتي من المغرب للعشاء طبعا بمساعدة منذر ومعتصم هما الجنود نتاوعي ربي يحفطهم بعد ما رضعت رائد ورقد رحت للكوزينة درت 10 دقايق يصوني البرتابل جيت قدقد خلصت ولمعت بالجافيل رغم انو مانقدرش او مالزمش نمسو بحكم المرض نتاعي بصح درتها كي رجع راجلي من الصلاة والله فرح وقالي هذا ليستاع اكل وين كان
انا نتحدى الوقت في انجاز الاشغال وكذلك نهز ورقة ونرسم كيفاش نغير في الديكور
اليوم نضت على الخمسة باه نعمر الماء ومن بعد لقيتو يبكي رضعتو وكي اذن صليت ووجدت لفطور راجلي يخرج بكري في هذاك الوقت مشطت شعري وكحلت وحمرت شويةهههههههه
فطرت وليت لبني عاودت كوشتو ومسحتلو ووجدتو باه يروح يدير الفاكسة نتاع 3 أشهر
اختي حبوبة بلاك نتباطء شوية علابالك بلي الفاكسة تسخن البيبي ولازم ما يبكيش نخاف تكبرلو الحبة نتاع لارني
والسلام عليكم وربي يوفق كل فراشة في الطيران في اجواء بيتها
الفراشات تحب غير الاماكن المضيئة

[حبيييبة]

هذه المشاركة لفراشتنا oummalak



البارح نقيت المطبخ ولمعت الحوض وكما قالت نافلة سبحان الله احساس اخر
بعدها رحت دوشت لبنتي وابني ورقدتهم وكلما تدكرت اسم الجبار دكرته ياجبار السموات والارض اجبرني
رجعت للمراات وتاملت روحي الحمد لله على نعمه ولكن
عندي عينان منتفختان لاادري ربما السمنة التي اعاني منها في كامل جسمي
تكلمت مع نفسي وقلت يجب ان احب سليمة لشخصها ولداتها لن افعل من اليوم شيئا لارضي به غيري وساحب نفسي لانها تستحق الحب اهملت وجهي اهملت يديا ورجليا دائما كان منزلي مليئا بالضيوف ولا اجد الوقت لاهتم بنفسي عندما انتهي من الاشغال ارتمي فوق سريري كجثة هامدة والبقية راكم عارفينها زعاف وتطناش

سابدا بالتدريج معكن
جهزت الكراس والمدكرة والقلم رايحة نرسم الجداول ونقولك
حبيت ندكر انو المصروف ماشي ليا ما يحبش اقترحت عليه كدا مرة وا بغاش
لكن مع هدا رايحة نتعلم معاكم هدي دنيا
حسيت هاد اليوم اني ناشطة ورايحة نتبدل معاكم اليوم نبدا نطبق ان شاء ربي يعاوني ويعاونكم

[حبيييبة]

فيما يخص ضبط التوقيت للدخول للمنتدى
هناك 3 اوقات ممكن كل فراشة تتواجد في واحد فيهم على الاقل فالمنتدى
1- الصباح الباكر بعد صلاة الفجر
او بعد ذهاب اولادها للدراسة و زوجها للعمل
و ان كانت عاملة قبل ذهابها للعمل

2- بعد الظهر بعد ذهاب زوجها للعمل و رجوع ولادها للدراسة
او اخذهم للقيلولة ان كانوا صغار

3- فالمساء بعد تحضير وجبة العشاء
لكن هاذ الايام بما انكن مشغولات بالمراجعة للاختبارات فالامر يتذر عليكم لابأس

على كل انا رايح نحاول نتواجد فالمنتدى في كل هذه الاوقات

على 07.00 صباحا، على 14.30 بعد الظهر، على 19.00 مساءا

هذا بالنسبة للدورة خاصة


اما بالنسبة للمنتدى و الانترنت عااامة
فانا افضل انو كل فراشة تحدد واش هي المواضيع اللي حابة تقرا فيها اليوم مثلا
و تاخذ ساعة من يومها (راهو فيه 24 ساعة)
و تقسم تلك الساعة على تلك المواضيع او تلك المواقع
مثلا ذا كانوا 5 مواضيع او 5 مواقع تعطي لكل موضوع 10 دقائق تتصفحه، تدرسه، تشارك فيه...
او اذا كان الموضوع مهم لدراسة ما او ماشابه تخصص له الساعة كلها يعني 60 دقيقة لتعطيه حقه


اما بالنسبة لمنتديات و مواضيع الطبخ و المسابقات
فبما انه الفراشة الجزائرية تحب الطبخ بشدة و تحب ان تسعد اسرتها بكلما هو جديد في هذا المجال
و تتفنن في اسعادهم
اقترح ان تخصص ساعتين في الاسبوع للبحث في الوصفات
على ان تختار هي اليوم المناسب لتلك الساعتين


معك الكناش و القلم اكتبي كل ما قررته على آخر صفحة فيه
و حدديمواضيعك كل يوم و حددي توقيتها
و معاك المنبه اضبطيه ان لزم الامر حتى لا ياخذ موضوع وقت موضوع آخر

و ان شاء الله نكون افدتكن في هذا الامر

[حبيييبة]

تطبيق اليوم:

في ورقة جانبية اكتبي كل الاماكن الساخنة في بيتك

ما معنى الاماكن الساخنة؟؟!!
الاماكن الساخنة هي التي تعج بالفوضا..
خزانة، درج، بيت كاملة، حمام، بلاكار، بيبليوتيك..
اي نقطة في بيتك فيها الفوضى ولازملها الترتيب
اكتبيها في تلك الورقة


ثم امسكي كل نقطة ساخنة و خصصي لها 15 د في اليوم فقط
قلت 15د فقط
نعرف هناكفراشات موسوسات تحب ان تقضي على المهمة كلها ضربة وحدة
و تاخذ فيها ساعتين و هي تعمل و من بعد اطيح فالفراش كي الدودة
و تعجز تقوم بباقي المهم اليومية نتاعها
و اول ماراح تتنازل عنه هو حقها اليومي في العناية و الاهتمام

اذا قلت تخصص 15 د يوميا للعمل على تلك النقطة الساخنة
اذا كملتها في 15د الله يبارك
اذا لا يمكنلها تكملها في الايام الموالية بمعدل 15د كل يوم

ما ستقوم به في تلك 15د:

نفرز ، نرمي، و نرتب

تقوم بالفرز: رايحة تفرز كل الاشياء التي في تلك النقطة الساخنة
ما تحتاجه، ما لا تحتاجه و يمكن التصدق به، مالا تحتاجه و يجب رميه

ثم نرتب ما نحتاجه و نخصص لكل شيء مكانه المخصص له
و الاشياء الموجهة للصدقة نرتبها في صناديق و نقدمها للجمعيات الخيرية في المساجد مثلا

هذا تطبيق اليوم حبيباتي
ربي يعينكم و يوفقكم و يسعد قلوبكم ياا رب آآآمييييييين

احبكن في الله

[حبيييبة]

هذه المشاركة لفراشتنا أم سوهيل


.صباح الخير يافراشات وش راكم اسمحولي على الغياب الله غالب كان عندي ضياف مقدرتش نتواصل معاكم لكن الفكرة تاع اليوم عجبتني

انا نضت الصباح وجدة القهو وصليت وراح ابني وزوجي ومن بعديها درت حبيبات مسمن زوجي طلبه ودرت الفطور ومن بعد مصحت الارض وخرجت الفراش يتشمس وروحت حمرة وكحلت هههههههههههههه وراني حاصة روحي فرحانة يعطيكم الصحة الى اليقاء في وقت اخر

[حبيييبة]

هذه المشاركة لفراشتنا لينا نور

السلام عليكم
موضوع جميل بارك الله في القائمين عليه ، أحب أن أشارك بمشكلة كنت أعاني منها وشطبتها من يومياتي

وأعتذر ان كان الكلام مكرر لم أطلع على الموضوع بكمله .

مشكلتي كانت مع المطبخ ، لا أحبه لا أحب الطهي لا أحب غسل الاواني ....وكنت أترك الاواني تتجمع الى حد لايطاق

لدرجة أني لا أستعمل حتى غسالة الاواني ..

وربما أيضا لأنه لدي مشاغل في الحديقة والتي أعشق العمل فيها وأنسى نفسي خارجا ولولا الصلاة لما دخلت البيت .

المهم سئمت من تلك الحال ...فقررت أن أنظم نفسي فقمت بترتيب المطبخ ولم أترك شيئ الا ومرت يدي عليه

جعلت كل الاواني الزائدة في علب وأعطيتها لحماي بمناسبة افتتاح بيته الجديد

وجعلت الاواني الاخرى التي ربما أستحقها في حال وجود عدد كبير من الضيوف في خزانة خاصة وقررت أن لا أفتحها ..

ولم أبقي في متناول يدي الى مجموعة قليلة جدا بعدد أفراد العائلة من صحون الى أكواب الماء الى الملاعق بأوناعها ....

وأصبحت بعد كل وجبة مباسشر أغسل ذلك الكم القليل من الاواني الذي لا يأخذ مني أكثر من عشر دقائق ...

والحمد لله لم يعد مطبخي بتلك الفوضى التي غرقت فيها ولم يكن ذلك من عادتي سابقا .

[حبيييبة]

سبحان الله جبار السماوات و الارض

[حبيييبة]

هذه المشاركة لحبيبتنا حراير


السلام عليكم و رحمة الله تعالى و بركاته

اولا نصيحتي لمن "ماتحكمش روحها قدام الميكرو" كي حالتي احيانا
طفيه و هني راسك

اولا حبيبة قوليل 15 دقيقة لمكان واحد او كل مكان 15 دقيقة يعني انا درك خممت في 4 بلايص يعني ساعة يوميا؟؟؟؟؟

و المدة شحال اسبوع و الا حتى وين نكمل لبلاصة و نبردها؟؟؟؟؟؟؟؟هيهيهيهيهيه

ربي يبردها علينا نهار غدوة و نلقاو الحبيب عليه الصلاة و السلام عند الحوض يسقينا شربة ماء لا نضما بعدا ابدا
قالك الي يذكر يوميا الجنة و يدعي يوميا انه يدخل للجنة
ربي يستجابلو و يدخلو للجنة

بالنسبة لبرنامجيحبيبتي حبيبة الناس كلهم يعرفوه
لكن ماعليهش نعاودو لعيونك

قبل نقلك انه السكن الوظيفي الي ساكنة فيه كبير و يعيي بزاف عدي صالون و صالون امونجي لكن انا درتو غفرفة جلوس و كوزينة و هول و 2 غرف و دوش تحسبيه حمام من وسعو و سيشوار و بالكون وااااااااااااااااسع كل يوم نسيقو لانه احنا عندنا الغبار بزاف
ربي يبارك ماشاء الله لا قوة الا بالله
لكن الحقيقة متعبتني الدار و كبرها و كبر مساحة غرفها

اولا برنامجي يبدا من الليل
تنظيف كوزينة و دوش و مرحاض
و نفوتو البالي على غرفة الجلوس و الصالون و نفوت ممسحة خفيييييييفة على وجه البيبيوتاك او ليفينغ

الصباح نوض بكري 5 كاقصى حد بعد الصلاة نفطر وحدي مع الميكرو بكري و درك نفطر وحدي و من بعد نلهى بروحي نوض الجماعة و نروح للكوزينة ندوزن زوج برم بلا ما نشعل عليهم النار

نفطر لبنيات و نتحكاو و يروحو للدراسة نفتح النوافذ نشعل على البرم و نغسل مواعن لفطور و نجوز نشاف على الدار
و من بعد الاعمال لخرى طي كي غسل ملابس

نقلك برك بلي غرفة لنات اختصاصهم اليومي يعني فراش و كيما نقولو "منين يشوف احمد" يعني يرجعو ادواتهم يعلقو ملابس النوم و هكذا

هاد البرنامج تبعتو منين بناتي صغار و قالك اذا غلبوك بالكثرة اغلبوهم بالبكرة


راني اختصرت زعم
درك نقلك على عادات مليحة فيا الويكاند للعائلة ماندير والو فيه اشغال
على هك عندي الاحد نهز لفراش و نسيق و نصب الماء مش جوز النشاف

العادة الثانية الصباح نطيب لغدا مع لعشا لعشية نفوتها مع لبنات و دراستهم
التعشيوة مش كل يوم نطيب على هك اسبوعيا ندير قاطو و حاجة معسلة بسبوسة او قلب اللوز
اما الهاي كلاس باتيسري او رولي او طارطولات فمرة شهريا فقط

البيتزات و مشتقاتها نطيبها للغدا منين لبنات يقراو باش ما نعطلش روحي عليهم ايضا انواع الكسرة و لو انه تقريبا يوميا نطيبهم

يعني بالمختصر ساعات 9 راني قاعدة و فم نبدا للعميق او اعمال اخرى

[حبيييبة]

صحا فطوركم فراشاتي
حبيت ندخل نجاوب على استفسارك حبيبتي حرة الحراير
15د في اليوم فقط
نعطيك مثال
راه عندك بلاكار المطبخ فيه الفوضى
و عندك درج التسريحة راه فيه الفوضى
و درج البيبليوتيك تاني فيه الفوضى
واش رايح اديري
اليوم حددي 15د بالمنبه تاع البورطابل او حطي الساعة امامك
و ابداي تشتاغلي على بلاكار المطبخ
كي تكمل 15د توقفي
و روحي كملي حياتك اليومية

غدا لما يجي وقت تنظيف الفوضى اللي حددتيه لنفسك صباحا او مساءا او اي وقت يساعدك
تاني حددي المنبه و ابداي تشتاغلي على البلاكار لمدة 15د
كي تكمل تاني توقفي و كملي يومك عادي و شغالك المعتادة

هكذا حتى تكملي مع البلاكار

و اليوم الموالي ابداي مع النقطة الساخنة اللي بعدها يعني درج التسريحة مثلا

[حبيييبة]

هذه المشاركة لفراشتنا حسناء القمر

السلام عليكم ماشاء الله عليكم كلكم نشاط بالنسبه لي انا عندي كل يوم العمل كدوده مانحبسش خلاص حتى نطيح من التعب كل مره نحاول نديربرنامج لكن الله غالب نحب الحركه ونتعب من الجلوس لكن هذا الشئ اثر علي كل من يشوفني يقولي راكي تباني تعبانه عن جد راني نحاول نمشي معاك ونمسك في روحي كل يوم اقوم بتنظيف المرحاض والحمام ونسيق بالماء والصابون ونشفهم ومن بعد روح لغرفة النوم تاعي نفتح النافذه ونحي الغطاءوننفظه وفي الغالب نبد لوكل3ايام هوغطاء المخايد ورتب السرير ونمسح الغبره ومن بعد روح لغرفة تاع كل يوم ماشي الصالون لان الصالون تاعي مغلوق كل يوم جمعه نرتبو ونشفوا ونغلقوا اقصد غرفة الجلوس نعطيها حقها انفض وامسح وبعد غرفة الاولاد ومن بعد المطبخ العزيز غسل اواني القهوه وابد تحضير الغداء وبعد الصلاة نخمم في شئ للقهوه وبع دبالخف وقت القهوه غسل الاواني نضرب طله على الغرف راكم تعرفوا الاولاد فوضى متنقله وبعد تحضير العشاء ونفس الشئغشل الاواني كي نكمل روح نظف المرحاض لاني نحب خليه دائما يشعل ومعطر طوال الليل وبعد.....
على بالي كثرت عليكم وللحديث بقيه..

[حبيييبة]

هذه المشاركة لفراشتنا نافلة


************************************************** *********
المشاركة الأصلية كتبت بواسطة حبيييبة مشاهدة المشاركة
ارجو ان تجبنني يا فراشاتي عن سؤالي:
- واش كان احساسكن اليوم بعدما ادركتن انكن مصدر سعادتكن الخاصة
و مصدر سعادة ابنائكن و ازواجكن و سرورهم و فرحتهم بكن؟؟
************************************************** ********
ههههههو الله كون نقولك بلاك تضحكو عليا
لي استنتجتو انو
الخير مرا و الشر مرا
ممكن الرسالة وصلت ما بغيتش نكثر الهدرة
ههههه

[حبيييبة]

هذه المشاركة لفراشتنا نافلة

بالنسبة ليا في الليل عندي اعزكم الله المرحاض و الدوش و المطبخ لازمهم يباتو نظاف و نفرز و نكنس الغرف ضروووووووووووري
كي نوض الصباح نلقى كلشي كالكادو ونقدر نواصل يومي و مخي مرتب اكثر شيئ
اما الغداء و العشاء عيت ندير قائمة لاني انا من النوعية لي نطيب بكمية كبيرة ولي يبقى اما نحطو فالفريgو او نزيد نتعشاو منو و مرات تكون باقية مرقة لازم الصباح او في المساء ندير بيها حريرة يعني الاطباق مرات هي لي تتحكم فينا
و وقت طياب الغداء و العشاء مرات كي يكون عندي وقت فالليل نطيب غداء نتاع غدوة مع العشا الا عندي خرجة مثلا نفور الطعام و تبقالي المرقا ساهلى فالصباح نديها بسرعة و مرات نطيب الغداء و العشاء الصباح كيما اختي حراير
يعني حسب الظروف و الخروج و الضياف و...........
هذا واش حضر في راسي الان .

[حبيييبة]

هذه المشاركة لفراشتنا جيادا

اختي حبيبة كي استيقظت حسيت روحي زدت جديدة حسيت روحي وردة جميلة كانت مخبية بين الاوراق الذابلة
عندي همة و نشاط عاليين و كيما قالت اختي نافلة بيدنا الخير و السعادة و بيدنا الحزن و ,,,,