موضوع مميز الجزء الثالث من وصفات حراير واش طيبتي اليوم - الصفحة 26

idron0 · 2016-06-26, 13:16

طاجين الخوخ merry_mora

ندير مرقة بيضة عادية نقلي البصل مع السمن وشوية زيت وندير لحم او جاج مع ملح فلفل اسود وقرفة ومرات ندير كركم ومرات لالا ونمرق وندير حمص

ولي بولات نغلي البطاطا بقشورها باسك مرات كي نكون مزروبة نغليها عريانة خخخخخخخخخ وطيحلي فالمقلة ونقشرها ونعبزها برك بالفرشيطة ولا بهذاك تاع لابوري ونزيدلها حبة فرماج وسنينة ثوم وندير دي بولات تاع فيونداشي صغار نكون طيبتهم فالمرقة ونحشيهم بالبطاطا وندير بانور كيما اسكالوب جي مقرمشة وطرية من داخل يعني نجوز على الفرينة والبيض وشابلور ونخليهم فالفريجيدار على الاقل ساعة يشدو روحهم ونقليهم

المهم ماتحطيهمش فالمرقة وديري صوص بجيه وخليهم يسقو باسك يترنخو كي تقيسهم المرقة.

idron0 · 2016-06-29, 20:14

بوراك با الشكشوكة تع الفلفل و الطماطم رزيقة 16

باش نسهل عليكم شكشكوكة هايلك كنت درتها هاوليك رابط

https://www.djelfa.info/vb/showthread...1915308&page=7

ملاحضة استغناو علي البادنجان انا مدرتش لانو في رمضان تقيل شوية

الطريقة راهي موضحة في الصورة شكشوكة و الفرماج

إضغط هنا لرؤية الصورة بحجمها الطبيعي.

من بعد اقليوهم و ستمتعو

idron0 · 2016-07-02, 13:04

صابلي ام ياسين الزهراء

500 غ لابال هايلة للصابلي + 300غ سكر قلاصي +3 صفار بيض و2 حبات كاملين وفاني و1 خميرة وكاس نشاء ونلم بالفرينة هدي وصفتي قديمة ونخدم بالبيترا او الباتور .

idron0 · 2016-07-02, 13:12

المقروط مقلي lahna moka

حطي في اناء كيلو سميد المقروط(أنا شريت تاع الميزان الي يديروه للطمينة ما يجيش حرش بزاف) زيدي عليه كاس و نص سمن ذائب (الكاس الي كيلت بيه تاع 250 ملل) و رشة ملح و نص كاس فرينة و نص كاس سكر و حكي مليح مليح بين يديك حتى تشوفي الخليط تبسس مليح ديريه في ساشي و من الاحسن يبان حتى الغد
خذي شوية من الخليط و رشي عليه خليط ماء و ماء الزهر (ما تكثريش ماء الزهر باش ما يجيش المقروط يابس) تتلم عندك عجينة و بلا ما تعجنيها شكلي كويرات قد حبة الجوز احشيها بكويرة غرس تكوني وجدتيه و اغلقيها مليح ثم ديريها في المول الخاص بالمقروط و اطبعيها
واصلي العمل مع بقية الخليط بصح غير بكميات قليلة باش ما تيبسلكش العجينة
كي تكملي طيبي المقروط تاعك في زيت تكون سخونة على نار متوسطة و كي يتحمّر نحيه و ديريه مباشرة في العسل خليه يتشرّب شوية و قطريه و رشي عليه جلجلان
بالصحة و الراحة

إضغط هنا لرؤية الصورة بحجمها الطبيعي.

idron0 · 2016-07-02, 13:25

وصفات منقولة و مجربة lahna moka

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

idron0 · 2016-07-03, 11:26

كريمة الفدج ام محمد تاج

كيلو بات اقلاصي بيضاء حطيها في حمام مائي ضيفيلها باطة نيستلي كاراماليزي و3 مغارف كبار لحظة غبرة ومغرفة اكستري تاع الكارامال راح توليلك كتلة هزيها وحطيها على طبقة الكاوكاو وسوي الوجه مليه وحطيها تشيح.

samira135 · 2016-07-03, 14:20

السلام عليكم
الله يحفظكم شكون عندها لمشوك نتاع اسمهان دارتو في مول سليكون التاج تمدولي

idron0 · 2016-07-03, 18:12

مقروط الكوشة ام ياسين الزهراء

انا ندير الوصفة التقليدية هنا تاع باتنة وهي

3 كيلات سميد المتوسط + 1 كيلة ليدام انا استعنل السمن المدينة دايبة وباردة وشوي ملح ونمحر مليح مليح ونبل بالماء مخلط مع ماء الزهر ونفتل بلا ماتعجني حداري افتلي مليح تقريبا يدي نفس كيلة الي كيلنا بيها كلش طبعا كيلة وحدة.

idron0 · 2016-07-06, 19:13

وصفة الحلزون lahna moka

شريت علبة شكلاطا بيضاء فيجيكاو و بديت نذوب فيها بالشوية لاخاترش كان عندي غير مول حلزون واحد
ديت طرف من الشكلاطا و بشرتو و حطيتو في كاسرونة حطيتها فوق حمام مائي بصح مالازمش تتلمس الما (درت الشكلاطا في كاسرونة كبيرة و حطيتها فوق كاسرونة صغيرة فيها ماء يغلي على النار ) خليتها تذوب براحتها ما تديش وقت و بعدها دهنت بيها المول بواسطة البانسو يعني درت طبقة اولى دخلتها للثلاجة 5 دقايق باش تجمد و عاودت خرجتها و دهنت الطبقة الثانية و دخلتها تجمد و في هاذ الوقت جهزت الحشوة الي هي:
بيمو مرحي+ خليط من المكسرات تكون مرحية (أنا درت لوز و جوز و شوية برك بيستاش) + جلجلان محمص+ حلوة الترك مبشورة و جمعت الخليط بالمربى حتى تحصلت على مزيج متجانس يعني ما يكون قاسح ما يكون سائل
خرجت المول من الثلاجة و درت فيه ملعقة صغيرونة نستلي كاراميليزي ما تكثريش باش ما يخرجلكش و فوقو درت ملعقة الحشوة و سوّيتها مليح مليح و دهنت من الفوق بالشكلاطا باش نغلق عليها و عاودت درتها تجمد. و أخير نحيت الحواشي و ديموليت الحلوى تاعي.
الحلوى هاذي صح مذاقها روووعة بصح تاكلي وحدة تشبعي لاخاترش كلشي فيها حلو يا حلوة.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

ملاك ملاكي · 2016-07-07, 19:14

صحة عيدك اختي وبارك الله فيك على مجهوداتك في ميزان حسناتك ان شاء الله

أ م ساجد وسيم · 2016-07-07, 19:30

كل عام وانتي بالف الف خيرررر

idron0 · 2016-07-19, 11:38

وصفات منقولة oum islem

RIMA.87 · 2016-08-01, 17:39

السلام عليكم
جزاك اللّٰه خيرا اختي idron0 و جعل كل ما تقدمينه في ميزان حسناتك
و الشكر موصول لكل الاخوات اللواتي لا يتأخرن في مشاركة بعضهم البعض للوصفات القيمة و المميزة .

انا هي رزيقة:
بوري بصوص فخذ الداند محشي و زيتون من عند kahina maam

لازم اولا فخذ داند مخلي العظام تفرشيه مسطح و تذرذري عليه فلفل اكحل و ملح و تدخليلو ما بين الشقوق قطع صغيرة من الثوم ثم حطي على السطع كفتة لحم مداوية بفلفل اكحل و ملح ثم روليه و فيسليه مليح بخيط الطهي و حضري خليط من الملح و الفلفل الاكحل و الزعفران و حكي بيه مليح الرولي تاعك من الفوق و زيدي حطيلو قطع من الثوم ما بين الشقوق و تكوني حضرتي بصلة كبيرة او 2 بصلات متوسطة (هنا لازم كمية مليحة من البصل) مقطعة رقيق جدا مشي مسكرفجة و حطيها في كسرونة او مرميطة تديلك هذاك الرولي تاعك و حطي معاها فلفل اكحل و زعفران و ملح و كاس ماء و ملعقة صغيرة سكنجبير و طرف مرغارين يعني حوالي ملعقتين كبار و فوقهم رولي الداند و شعلي عليهم نار قليلة و نزيدو ورقتين رند و ربطة قصبر و خليهم يطيبو دون متقليهم يعني تحطي كلش بارد في بارد و شعلي النار و عسي على الرولي تاعك حتى تشوفي الما نشف و البصل ذاب كامل و بدا يتكرمل يعني تشوفي لونو حمار مائل الى البني لازم تتحصلي على هذ اللون و الما نشف تماما هنا يكون الرولي طاب اذا شفتيه مطابش زيدي شوية ما و عسي عليه حتى يطيب سينو نحيه و زيدي ماء مع زيتون منزوع النوا ومغلي و خليه ياخذ غلوتين في ديك الصوص تع البصل المكرمل هذيك هي الصوص لي رايحة تسقي بها البوري تاعك. و االرولي حمريه في شوية زبدة و قطعيه .ملاحظة الزيتون و الماء تزيدي قد احتياجك الى الصوص يعني عينك ميزانك المهم هذاك البصل المكرمل و لي طاب فيه الرولي هما القاعدة تع الصوص و صدقوني بنينة فعلا و رايحة نطبق الوصفة في اقرب وقت . و البوري بطاطا مفورة عادي و فيها حليب و زبدة*

انا هي رزيقة · 2016-08-01, 18:52

الف شكر اختي ريما جعله الله في ميزان حسناتك انتي و الاخت ايدرون عندي فقط اضافة صغيرة لو ممكن تضيفيها في الوصفة و لك جزيل الشكر نسيت مقلتش نزيدو ورقتين رند و ربطة قصبر في الكسرونة كي نحطو الرولي يطيب

ساجده 82 · 2016-08-01, 23:42

ماشاء الله مشكوره اختي ادرنو