بيتك جنتك و رضاء ربك مبتغاك 4 - الصفحة 24

ام امجد14 · 2013-12-24, 17:15

اقتباس:

المشاركة الأصلية كتبت بواسطة دائمة الحمد

اخت ام امجد راني كتبتلك رد مفصل الصباح في غرفة الدردشة لكن ما فاتش في الليل ينقص الضغط على المنتدى ونعاود رد اخر

اسمحيلى على الازعاج والله مشكوووووووووووورة

oum radja · 2013-12-24, 21:30

سمورة الله الله عليك يا الشاطرة
لوكان حسبت بلي فيها بياس مونتي و قلب اللوز لوكان جيت نعشوي هههههههه
يعطيك الصحة و ربي يقويك و يجازيك على فعل الخير
ام عبودة ديي رايك في الكوزينة راني حاسة بيك هههههههه

دائمة الحمد · 2013-12-24, 22:45

ام امجد حطيتلك الرد في الدردشة
تصبحن بالف خير

ام عبودة · 2013-12-25, 08:14

صبااااااحكم كله نشاااط وهمة
واش راكم. كنت حابة نحط اعمالي للثنين والثلاثاء بصح الصور ما بغاوش يطلعو راكم تسالوني الصور هههههه
الاثنين نظت كي العادة مع الفجر الصلاة ما كانش بصح الاستغفار لا يفارقني
تقهوينا وطلعت الشمس يا سلاااااااااااام. بعد ايام من الغياب توحشتك
شمرت على ذرعيا غسيل وتسياق برا والداخل كملت مع الفطور حطينا وفطرنا ودعتنا عزوجتي وراحت وهي تعاود تهلاي ورودي بالك على ولدي يعني زوجي ههههه
حكمت بلاصتي من بعد هذاك البرد ما قدرتش نتحرك العشاء ما درت والو بقات لوبيا ودرت اومليت بالطن والبطاطا للاولاد تعشينا ورقدنا
الجانب التجميلي
اعمالي تاعةالصبح كلها رياضة ارفد وحط اجري واقفز هههههه
مازالني مع شرب الماء واكل العسل
مع الترطيب وفرش الاسنان
التربوي
راني مع اولادي نرسم لهم وهم يلونو ومكافاتهم كي عاونوني الصباح درتلهم العشية مادلين المقدسية وعاونوني في التزين وفرحو بيه وزدت درتلهم تحلية تاع ام كوثر اممم تهبل وخملتهم غرفتهم وبدلنا الديكور على ذوقهم

الثلاثاء نهار التطبيقات راني انا مولات الكوزينة احم احم
بعد القهوة شمست الغرف وسيقت غرفتي كملتها رحت الى المطبخ. نظفت الثلاجة قبل ما تلحق الخضراء من السوق
غسلت علب التوابل ومسحت الحيوط السفلى وتاع البوتاجي ونقيت الكوشة من فوق برك ونقين حوض الغسيل راهو يبرق والسر كل في خلطة الصابون والخل
وااااو والله. يدي صبحو يبرقو وملوساء شكراااا لصاحبة الفكرة
لحقت الخضراء غسلتها وخبيتها في الثلاجة والفطور درت حساء البطاطا تاع ام راضية
سمبوسك تاع مونيا وسلاطة الجزر الع اكرام وفلفل تاع ام محمد تاج وخنمتها بعصير البرتقالة فقط تاع ام محمد يحي
التحلية درت مادلين تاع الفراشة للرائعة ام اماني
فطرنا وغسلت المواعن وعجنت التوست تاع ام كوثر وخمرتو وحطيتو في القالب ورحت تكيت نسيتو نصيبو وااااااااو راح الى السماء
طيبتو ودرت العشاء مرقة زيتون ومطلوع ام ماجد وبقالي من الفطور سلاطة وفلفل وسمبوسك وحريرة
تعشينا ولعبنا الاولاد ورقدنا
التجميلي
ترطيب وفرش للاسنان
التربوي
عبد الحق تعلم يكتب الاثنين والحمد لله هذا من فضل ربي
راوية تلون وتقولي صوريني باش يشوفوني صاحباتك غيرتها ببنات عطر ربي يحفظهم
وماهر كي العادة يهبل فيا ويمرض فيا البارح قريب عطيتو قيلة
راح فتحت الثلاجة اللي في بيتي وبدا يفتح في الياغوت ويفرق في الارض

ابداع جزائرية · 2013-12-25, 09:37

السلام عليكم ورحمة الله وبركاته
اصبحنا واصبح الملك لله والحمد لله
وش احوالكم حبيباتييييييي
بالعقل عليا يا بنات وش هذا
ماشاء الله عليكم
ام عبوودة ارحمينا اختي شوية الله يبارك عليك
ههههههههه
اختي سمرا ماشاء الله عليك
وعطر والمبتدئة وام رجا وام منيب وياسمين
سامحوني مازال ماتعرفتش عليكم كامل
انا البارح العشية برك روّحت من دار بابا بت يومين
جيت لقيت الدنيا تشفففف
اليوم ان شاء الله الكوزينة اولا مطلوع وعدس
ونحّي الدرسة نتاع القاطو نتاع العرس اللي درت...
وننظف بيتي باذن الله العشية
وليدي الصغير عداوه خاوتو بالزدرة اااااااااااااااااااااااااااااااه
ياربي نلحق
يعطيكم الصحة حبيباتي بالشوية ان شاء الله وننتظم معاكم في الخدمة وفي كتابة التقارير

ام امجد14 · 2013-12-25, 14:18

مساءالانوار اليوم اغتنمت فرصة غياب زوجى اليوم سافر ربى يرجعو بالسلامة نهضنا على الاذان الاول صلينا و تقهوينا هو راح فى امان الله و انا دخلت لغرفتى نضمتها على السريع
ووجدت سنية القهوة و الخبز و المعجون للاولاد و شمرت على يدى سيقت كاااااامل الطابق الاول بالماء و الازيس و صانبو الامير رووووووووعة
رغم البرررررد لكن يا جبل ما يهزك ريح ههههههههههههه
خرجت الكوشة نتاعى من نوع الكبي تاع 5 فورنوات حجمه كبير تقييييييلة نقيت وراها لقيت الحالة تبكى على روحه رجعت الحيطان رووووووووعة و عطيتلها هى تدويشة بالسينيال و ولات تشعل
شفت الثلاجة غيران و عينيها يرقرقو بالدمعة اعطيتلعا تدويشة شاااااااابة و بدلت ليناب تاع الثلاجة
طلعت للاوت كيما ليسبورتيف حكيتها مليح و خرجتها تشعل و غسلت الحيطان الى امامها
نضرت للساعة لقيتها 10 فرحححححححححححت هودت غملت دار الشوابين بالخف و مسحت الطابق الاول
وطلعت الفوق درت فريت و شوي مرقاز و السلام ختام فطرت و مباشرة الى النوووووووووووووووووووووووووووووووووووم ريحت شوى و كى سمعت الاذان نضت صليت و جيتكم

سمراء الدنيا · 2013-12-26, 09:11

السلام عليكم و رحمة الله و بركاته ....اعذروني على التقصير ووضع التطبيقات لظروف اقوى مني
ان شاء الله نقدر نرد عليكم كامل

بالنسبة لتحدي هاذ الاسبوع انا عن نفسي عندي ختمة الشهر راحة باذن الله نختم اليوم و ندعبلكم كامل (لكن الصيام ما قدرتش لظروف)
و انتم كل وحدة و ظروفها للي تقدر دير استغفار او صلاة على النبي او قيام المهم ليلة الجمعة نحيوها بالعبادة و ربي يوفق الجميع

قاربت دورة بيتك جنتك على نهايتها و الحمد لله كانت دورة ناجحة و موفقة بفضل نشاطكم و مشاركتكم .... نتمنى في الاخير كل وحدة تكتب ماذا استفادت من هذه الدورة و ماذا غيرت في حياتها ....و نقيمو انفسنا بانفسنا

دائمة الحمد · 2013-12-26, 10:06

صباح الانوار على الجميع فحلات الله يبارك
يحق لكن الافتخار بهمتكن ونشاطكن
كنت معاولة نكون معاكم في الدورة على الاقل في العطلة لكن الله غالب الظروف
تكون حائل دون ما نشاء المهم اني معاك ولو بالمتابعة
ام امجد ادا كان اطلعتي على الرد تاعي نتمنى انك استفدتي ولو بالجزء اليسير كانش ما سحقيتي اني هنا
تقريرك حلو فيه سيسبانس ههه
بقية الاخوات ربي يبارك ليكم في صحتكم

شوشو 11 · 2013-12-26, 12:08

الله يبارك عليكم بنات
راني متابعة ومعجبة وانشاءالله يستمر النشاط ولو بدورة اخرى المهم يبقى العنوان اللييجمع الاخوات ونشاطهم
ما شاء الله راكم تبثوا فينا الحيوية
مختصر اعمالي
حكيت المواعن ولاو يبرقو روعة----- غسلت حيطان الكوزينة ونقيت بلاكارها وخزين المواد الغدائية طبعا مع الفرز
المواعن اللي فالبيبليوتاك نقيتهم ومسحتها مليح بالبونيش ومسحت كل الخشبيات دراعي طاااااااااااح ههه
مازال نغسل زربية والبرد منعني
الالبسة نعملها فرز غير نشرو بلا ما نستعملو الكثير منها اصبحت مصدر قلق ----نصدقو بيها خير
الجانب الديني
دائما الاستغفار والادكار والصلوات وراني صايمة اللي فاتو تاني
لوتعملونا تحدي تع استغفار ونشجعوا بعضانا عليه مثلا حتى 1000
وراني مع مجموعة صحبة القرآن لحفظ سورة الحجرات---ربي يوفقنا جميعا والله مباد رائعةمن الاخت
الجمالي
زيوت للشعر زعمة هدوك الزغبات خلطت زيت الزيتون+جوز الهند+الخروع +حبات حلبة كلهم في قارورة وحدة
ترطيب لليدين ونقلكم حاجة ملي بديت في الخليط السحري يديا ارطابو وحدهم خير من كنت مع الكيمياويات
اااااااااااه يا سمورة
واش استفدت من الدورة
الحق انا متابعة اكثر مني مشاركة واكبر فائدة هي صحبتكم ما شاء الله عليكم وتاني كنتولي مصدر للنشاط والهمة وغيرتوني باش نهتم بروحي اكثر ونزيد من العبادات ونقوم بداري واولادي ربي يحفظكم كاااااااامل وخاصة انت سمرا القلب النابض فيالمجموعة
دوختكم اسمحولي

ياسمين1990 · 2013-12-26, 15:36

اهلا اخواتي تخلطت العبرات(لعين مفتوحة ) .مع العيبارات لا أدري ماذا اكتب بعد ما شفت واش كتبت الأخت سمراء(صليحة). كنت مع حلم جميل وانا معكن استرجعت فيه ذاكرتي التى اخدها الزمن والنسيان الى ماقبل التاريخ وبدءت اشعر بكياني من جديد …
كنت اتمنى ان لا افيق منه ابدا ولكن تجري الرياح بما لا تشتهي السفن …
ماذا عساني ان اقول الا ان ربي يكون معنا ويجمعنا تحت ظل عرشه يوم لا ظل الا ظله امين
ارجو ان تكون هناك لقاءات اخرى ومتنسونيش
طلبي اليك اختي سمراء (اسمحيلي نادلك صليحة ) لاني دخلت الى بيتك جنتك ورضى ربك مبتغاك رقم 2 وكنت وكاني واحدة منكم اتحرك معكم من مكاني افرح لفرحكم واحزن لحزنك ووجدت حوايجي لعرس الأخت منى ولكنها ماستدعاتنيش ماعليهش..بارك لها وبارك عليها وجمع بينهما في خير ورزقها جيش من الذرية الصالحة لتحرير فلسطين ان شاء الله.… بلغي سلامي لكل لاخوات في الدورة وخاصتا الأخت
فاطمة البشارية وقولي لها اني احبك في الله
لاتنسوني من دعائكم اتمنى من الله ان أراكم في الدنى قبل الآخرة .

عطرالذهب · 2013-12-26, 20:17

السلام عليكم و رحمة الله وبركاته
اخواتي توحشتكم كامل والمنتدى والنت عندي ثقال بالسيف باش يتفتحلي

عطرالذهب · 2013-12-26, 20:30

كلام الاخت سمراء احزنني ما حسيتش خلاص بالوقت معاكم وكنت في اسعد ايامي الله غالب هذه هي سنة الحياة

عطرالذهب · 2013-12-26, 20:39

استفدت من الدورة الكثير والحمد لله
الجانب الديني
بصراحة كنت مواضبة على الصلاة واقرا في المصحف احيانا ولكن الان بفضل الله راني دائمة الذكر والاستغفار ومواضبة على الصوم التطوعي وزيد راني كنت كثيرة النسيان والان بفضل الاذكار صرت نتذكر كلش وحاجة اخرى كنت كي تكون وحدة تحكي على غيرها قدامي نشد نشد روحي ونقول كلمة كلمتين حتى نلقى روحي غاطسة في النميمة والان بفضل الله صرت كي تحب وحدة تتكلم نقوللها اختي خلينا من القيل والقال راني من الصباح نلم في الحسنات مانيش حابة نريحهم يعني وليت جريئة راني عاجبتني روحي عاللخر
الجانب التنظيفي
الصراحة من قبل داري نقية وبشهادة الجميع احم احم بالصح ضرك داري نقية بنظام في العمل يعني من جهة راني نخدم ومن جهة مرتاحة لان الخدمة بدفعات متواصلة وليست دفعة واحدة نحس روحي خفييييييييييفة كي النملة رغم وزني هههههه وحتى كي نحل غرفة نفرزها بقية البيت جاهز لاستقبال اي ضيف غفلة ومع داري صغيرة وضاوية كلشي فيها مكشوف وكي تجيني ضيفة نديها معايا للكوزينة وانا مرتاحة لان عين الضيف ماضية ولكن ماعنديش واش نحشم بيه
الجانب الصحي لم يتغير فيه شيء لان همي الوحيد انقاص وزني منذ الصغر ولوكان لاحظتو ما نطيبش في لي قاطو كثيرا لانني ما نقاومهمش وادعولي في ليلة الجمعة هذه انو ربي يوفقني في مبتغاي والله خايفة من امراض اللي تسببها السمنة وانا مازلت صغيرة وحابة نبقى بصحيحتي نربي اولادي ونعيش حياتي بلا علل (غايضتني عمري لان اي واحد سمين يتخيلوه الناس غير ياكل ويرقد وما عندوش وعي وانا بالضبط العكس تماما من نهار عرفت صلاحي وانا متوسوسة من الماكلة هاذي تسمن ما ناكلهاش لدرجة اني كي نشوف وحدة رقيقة كي السكيلات نقول والله غير خير مني )
التجميلي
من بكري نسشور شعري دائما بالصح الماكياج الخفيف والترطيب تعلمتو من هنا
التربوي
الهوس بدراسة بناتي اولى اولوياتي لانني ماكملتش قرايتي قلتلهم حققولي امنية الديبلوم والدراسات العليا حابتهم يكونو من اكبر العلماء و كي قلت لباباهم على امنيتي قاللي بالصح راهم لازم يتزوجو ويخلفوا ههه قلتلوا ما عليه يتزوجو ويخلفو وانا نطيبلهم كل يوم وننظفلهم ديارهم ونربي ولادهم بالصح يبقو يقروا الى ما لا نهاية

عطرالذهب · 2013-12-26, 21:10

حبيت نزيد اضافة انو حتى عقلي كبر وليت نهتم غير بالاشياء المهمة وعلاقتي مع زوجي صارت احسن لانه لاحظ علييا تبدلت وطريقة تفكيري اخذت منحى اخر نهاري بروقرامي مش عشوائي بحيث حتى اعصابي استرخت
واجمل فائدة هي صحبتكن التي لاتقدر بثمن والله كي نتفكر بللي رايحين نغلقوا الدورة نحزن
وفقنا الله الى ما فيه خيرناو خير ازواجنا وابائنا واولادنا وادعوا الله ان لا نحيد عن كتابه وسنة رسوله (ص) وتصبحن على خير

نايليةوافتخر · 2013-12-26, 21:16

ماشاء الله عليكم ري يباركلكم في وقتكم
انا للاسف
كنت غايبة النت مقطوعة بصح كنت متبعة الدورة انا كملت لاني ماعنديش غرف اولاد
ماشاء الله الدورة كانت هايلة وخلاصت فيسع