وعليكم السلام ورحمة الله تعالى وبركاته
نعم علي منجلي 1 ...إقامة خاصة بطاليات المدرسة العليا للأساتذة
كنت فيها السنة الماضية
الإقامة مليحة . يعني عادي باه منخلعكش ... حلوها في 2004 بصح علابالك الغاشي تاعنا يفسد
الغرف أقل وحدة فيها 3 ... وأنت وزهرك ...ممكن تطيحي في وحدة فيها حتى 5
وكاين لي تزهرلهم تاع الصح وهاذو لي يروحو مع الاول ... يحطوهم مع صحاب الماستر ... هادو شوي حقارين
مي كاين لي ناس ملاح ... بصح ما يقعدوش في الإقامة خلاااص يعني ممكن غير أيام الامتحانات
الإقامة منظمة عادي وعاملات النظافة مدايرين خدمتهم مليح ما تخافيش من هذه الناحية خلاااص برك علابالك الغرفة تاعك أنت لي تنظفيها وتقدري تشريلها أوراق وتغلفيها وحدك على ذوقك
++ حاجة عانيت منها العام لي فات ... ديري في بالك بلي كي تروحي أنت لي تحوسي على السرير والخزانة والطاولة ...ما تلقايهمش في الغرفة كيما كنت انا متصورة ..عليها لازم تروحي في الأول وتسرقي ((هنا السرقة حلال))
أنا وحدة من الناس زهرتلي هاداك النهار لقيت طفلة قالتلي صحبتي تخرجت أرواحي نمدلك حوايجها مدتلي سرير + طاولة مي الخزانة الشهر لي قعدتو ثم قشي في الأرض في الحقيبة""
ماشي لازم تتخلعي هاذو الأيامات الاولى برك وأنا راني نقلك هكا باه تديري في حسابك ومايصرالكش كيفي
إن شاء الله هذا العام يفتحو المدرسة الجديدة لي توال الإقامة ولا مافتحوهاش .... هي بعيدة شوية حوالي ساعة في الطريق بالبيس كاين كل ساعة أو نصف ساعة واحد ...يعني ما تتقلقيش من هاذ الناحية ... بصح حطي في بالك بلي تروحي واقفة لانك عارفة النقل تاع الطلبة في 10 كراسي والباقي كامل واقفين
بالنسبة les agressions فلازم تكوني حذرة على قد ما تقدري خاصة في قسنطينة يعني في المدرسة العليا قالولي كاين أنا ماصراتليش شخصيا بصح سمعت كاينين ... على هاذي لازم ماتهزيش معاك أشياء ثمينة وحاولي داميا تكوني مع 3 بنات أو أكثر
خاصة إذا كان البرنامج تاعكم فيه حصص في l'annex قريبة من جبل الوحش والبلاصة مافيهاش الناس بزااف عليها لازم كي تروحي ما تكونيش وحدك على كل كاين لابوليس ثم بزااف
كاش أسئلة أخرى راني في الخدمة
بالتوفيق ...ونصيحة ووصية لكل بنت رايحة تسكن في إقامة بعيدا عن أهلها لازم تكوني فحلة بالمعنى الصحيح للكلمة واعرفي شكون تخالطي وما تضحكيش مع الناس كامل لأنهم كاين وكاين