السلام عليكم الاخت اللي سالت عن وصفة قاطو البسطولي و خبز الدار و الخبيزات نتاع اللحم المرحي راني حطيتهم في الصفحة الثانية
اختي مرام ما عرفتش وش بيه البسطولي نتاعك لازم كي تطبعي الحبة تعاودي طلعي هذيك الحديدة اللي لظيتي عليها كي طبعتي الحبة لازم تسمعيها كي تتطرطق على العموم راهو البسطولي سامط بزاف انا عندو سنوات و هو عندي هذه اول مرة يصلحلي و تعبني بزاف مرة يخرجلي الحبة صغيرة و مرة كبيرة
و اختتي اللي سالت على الحريرة تقدري ديري طماطم الباط بصح ما تكثريش نص مغرف كبير و ساعات ما نديرش فيها خاطر فيها الكابويا حمراء و طماطم الحب و الفلفل الاحمر
و الاخت اللي سالت علىفلان كراميل
نص ليتر حليب مغلي زيدي فيه شوي فاني و خبطي على جنب 4 بيض و كاس سكر حوالي 150 غ بالباتارو من بعد فرغي فيهم هذاك الحليب المغلي و خلطي بالمغرف برك
و ديري الكراميل في ليمول شوي من تحت برك تحبي الكراميل اللي تتباع و لا اخدميها ذوبي شوي سكر على نار هادية حتة يتكرمل و فرغيه بسرعة في ليمول قبل ما ييبس و من بعدي فرغي في ليمول الفلان و حطي ليمول في بلاطو فيه ماء مغلي و فيه طرف جورنال باه ما يطرش الماء الفلان كي يعود يطيب
وحطيه في الفرن 180 درجة حوالي 30 الى 45 د و خليه يبرد